raglay_2021_rgs_rlt_rom_book/rom/13.json

{
  "1": "Avih dơgrữq mơnuĩh ngãq tui vẽq mơnuĩh hũ ganuar dlòc drơi, mưng ôh hũ ganuar halơi la ôh trôh mưng Yàc Pô Lơngĩq, dơgrữq mơnuĩh hũ ganuar la mưng Yàc Pô Lơngĩq pơdỡc jơc.",
  "2": "Yơu nữn, mơnuĩh halơi jơdrãq sì dơgrữq mơnuĩh hũ ganuar, nữn la jơdrãq sì gơnuar-pơđar Yàc Pô Lơngĩq, sì dơgrữq mơnuĩh jơdrãq nữn ròq ãt kaya ngãq gơnĩt dlaìq ga drơi.",
  "3": "kayua Dơgrữq mơnuĩh hũ ganuar ôh iơuq luơi ga mơnuĩh ngãq kaya siàp huaĩq ôh, yơu nữn luơi ga mơnuĩh ngãq kaya iãh mơsãc huaĩq. Hã ưng ôh huaĩq di mơnuĩh hũ ganuar mĩn, yơu nữn ngãq vẽq kaya siàp, sì ròq hũ pơnõq nhũ mơyòp. ",
  "4": "Mưng pơnõq nhũ la mơnuĩh duh vruãq ga Yàc Pô Lơngĩq pioh ngãq ga hã jơc kwơ màc, yơu nữn mơyah-laìq hã ngãq kaya mơsãc nữn huaĩq vẽq. Mưng nhũ apãt đao ôh iơuq la ôh kwơ ôh. Nhũ la mơnuĩh duh vruãq ga Yàc Pô Lơngĩq, nữn la mơnuĩh sơđồq wơq kaya mvai prõc di mơnuĩh ngãq kaya iãh mơsãc. ",
  "5": "Yơu nữn, adơi sơai iơuq ngãq tui, ôh iơuq mĩn huaĩq di kaya mvai prong soh ôh, yơu nữn kung kayua mưng lơ-ùq hatai mĩn. ",
  "6": "kung mưng pơnuaĩq nữn mĩn nữn adơi sơai pioh jia, kayua mưng dơgrữq mơnuĩh hũ ganuar la mơnuĩh duh vruãq Yàc Pô Lơngĩq, rđãp iãq jàc vruãq nữn. ",
  "7": "Vơyar wơq vẽq ga pơnõq nhũ kaya drơi iơuq vơyar, pioh jia vẽq ga mơnuĩh drơi iơuq pioh jia, sơkãq jia di kaya halơi drơi iơuq sơkãq jia, huaĩq vẽq di mơnuĩh drơi iơuq huaĩq, ki-ngam di mơnuĩh drơi iơuq ki-ngam.",
  "8": "Juơi kađòc sre hagĩt sì digrỡq mơnuĩh, mĩn kađòc sre mưng kaya khiãng dôman sigơuq soh, mưng mơnuĩh halơi khiãng dôman di mơnuĩh gơuq pơlơi drơi nữn la song ngãq wil tãl kaya voh-va. ",
  "9": "viãq, dơgrữq kaya voh va, yơu: anàq juôi sũq dlaìq dri drõc, anàq juôi pamơtai mơnuĩh, anàq juôi tleh sơwah, anàq juôi ham hạ, sì mơyah laìq dòq hũ kaya halơi krơi tomo, ròq hũ pơtom avih dơlãp kaya pơđar vah nĩ; anàq iơuq anĩt duman mơnuĩh tơmo yơu rùpphap drơi.",
  "10": "Kaya khiãng-anĩt ôh ngãq iãh sì mơnuĩh gơuq pơlơi. Yơu nữn, kaya khiãng-anĩt la ngãq wil tãl kaya voh-va.",
  "11": "iơuq ngãq yơu nữn kayua pơnõq drơi thơu tũq harơi. ròq tal trôh tũq pơnõq drơi tơgùq mưng kaya đih. kayua tũq nĩ kaya dõc pơtlah pơnõq drơi song jẽq rlao sì tũq pơnõq drơi vơhrơu tin",
  "12": "Mơlãp jẽq avih harơi jẽq sơđah, yơu nữn pơnõq drơi iơuq tlàq prah avih kaya sồp kanãm, sì chồq ao vơsơi sơđah blãc.",
  "13": "pơnõq drơi nao sì ngãq vẽq savĩq tơpãq yơu tũq harơi. Juơi bõc mơnhũm sì mưvũq mưvier, kaya dri-drõc, kaya mơin-mơaĩq, kaya prơjai sì kaya palmùq. ",
  "14": "Yơu nữn adơi sơai tồq chồq vẽq Yàc Je-su Krist, juơi mĩn rchãc gah rlo-rồp pioh ngãq tui kaya ham ưng krơi nhũ hũ."
}