raglay_2021_rgs_rlt_rom_book/rom/13.json

{
  "1": "Avih dơgrữq mơnuĩh ngãq tui vẽq mơnuĩh hũ ganuar dlòc drơi, mưng ôh hũ ganuar halơi la ôh trôh mưng Yàc Pô Lơngĩq, dơgrữq mơnuĩh hũ ganuar la mưng Yàc Pô Lơngĩq pơdỡc jơc. ",
  "2": "Yơu nữn, mơnuĩh halơi jơdrãq sì dơgrữq mơnuĩh hũ ganuar, nữn la jơdrãq sì gơnuar-pơđar Yàc Pô Lơngĩq, sì dơgrữq mơnuĩh jơdrãq nữn ròq ãt kaya ngãq gơnĩt dlaìq ga drơi. ",
  "3": "Dơgrữq mơnuĩh hũ ganuar ôh iơuq luơi ga mơnuĩh ngãq kaya siàp huaĩq ôh, yơu nữn luơi ga mơnuĩh ngãq kaya iãh mơsãc huaĩq. Hã ưng ôh huaĩq di mơnuĩh hũ ganuar mĩn, yơu nữn ngãq vẽq kaya siàp, sì ròq hũ pơnõq nhũ mơyòp. ",
  "4": "Mưng mơnuĩh hũ ganuar la mơnuĩh duh vruãq ga Yàc Pô Lơngĩq pioh ngãq ga hã jơc kwơ màc, yơu nữn mơyah-laìq hã ngãq kaya mơsãc nữn huaĩq vẽq. Mưng nhũ apãt đao ôh iơuq la ôh kwơ ôh. Nhũ la mơnuĩh duh vruãq ga Yàc Pô Lơngĩq, nữn la mơnuĩh sơđồq wơq kaya mvai prõc di mơnuĩh ngãq kaya iãh mơsãc. ",
  "5": "Yơu nữn, iơuq ngãq tui, ôh iơuq mĩn huaĩq di kaya mvai prong soh ôh, yơu nữn kung kayua mưng lơ-ùq hatai mĩn. ",
  "6": "Yơu nữn kung mưng pơnuaĩq nữn mĩn nữn adơi sơai pioh jia, kayua mưng dơgrữq mơnuĩh hũ ganuar la mơnuĩh duh vruãq Yàc Pô Lơngĩq, rđãp iãq jàc vruãq nữn. ",
  "7": "Vơyar wơq vẽq ga pơnõq nhũ kaya drơi iơuq vơyar, pioh jia vẽq ga mơnuĩh drơi iơuq pioh jia, suãq jia di kaya halơi drơi iơuq suãq jia, huaĩq vẽq di mơnuĩh drơi iơuq huaĩq, ki-ngam di mơnuĩh drơi iơuq ki-ngam.",
  "8": "Juơi kađòc sre sì mơnuĩh halơi, mĩn kađòc sre mưng kaya khiãng dôman sigơuq soh, mưng mơnuĩh halơi khiãng dôman di mơnuĩh gơuq pơlơi drơi nữn la song ngãq wil tãl kaya voh-va. ",
  "9": "Mưng dơgrữq kaya pơđar va nĩ: Hã juơi sỗq dlaìq rĩc-ar vơnar, juơi pamơtai mơnuĩh, juơi tlẽq sơwah, juơi ham, sì avih dơgrữq kaya pơđar va halơi tơmo, kaya pơgõm wơq dơlãp dơdiang nĩ: Hã iơuq anĩt mơnuĩh gơuq pơlơi drơi yơu drơi. ",
  "10": "Kaya khiãng-anĩt ôh ngãq iãh sì mơnuĩh gơuq pơlơi. Yơu nữn, kaya khiãng-anĩt ngãq wil tãl kaya voh-va.",
  "11": "Brõq dòq brõq adơi sơai thơu tũq harơi nĩ la tũq harơi adơi sơai iơuq đih. Juơi pìq tra, mưng tũq nĩ kaya dõc pơtlah song jẽq sì pơnõq drơi rlao sì tũq pơnõq drơi vơhrơu tin. ",
  "12": "Mơlãp jẽq avih harơi jẽq sơđah, yơu nữn pơnõq drơi iơuq tlàq prah avih kaya sồp kanãm, sì chồq ao vơsơi sơđah blãc. ",
  "13": "Nao sì ngãq vẽq savĩq tơpãq yơu tũq harơi. Juơi bõc mơnhũm sì mưvũq mưvier, kaya dri-drõc, kaya mơin-mơaĩq, kaya prơjai sì kaya palmùq. ",
  "14": "Yơu nữn adơi sơai tồq chồq vẽq Yàc Je-su Krist, juơi rchãc gah rlo-rồp pioh ngãq tui kaya ham ưng krơi nhũ hũ."
}