cor_2020_cua_clt_rev_book/rev/11.json

{
  "1": "Atêq nưq, gô jah ăm gaay gơdeenq xôq duh dơơp gaay woolh, ji gô jah patăk: \"Dayh dưk tok woolh hnhư hơu ku Kơy Plêêk ji paraa hơu, kung khơl adro ayuôôt laat đom nưq.",
  "2": "Bơh dayh war hlê chaar pii gôk hnhư hơu, te woolh dơơp kajoq, vii ni heq jah kahniq ka khơl tamooi daak kadrơơy. Oot hnoq joaq nhek theng vah đom poot kưưl vaar xiêk.\n\\ts\\*",
  "3": "Gô hnoq kahniq qwuyen da uuh ka vaar dro xanưk ku Gô; hlưưp vayh ataat, oot hnoq đnooy hlit đom 1.260 hngơy.”",
  "4": "Vaar dro xanưk neq ji vaar ưưk ôô liiu ji vaar jôôk đeen dưk kangưưl Lôôk ku vari.",
  "5": "Atoh kơyq xung dơơp ra ơơh ka baalq yôôych e ôôlh vlôh xing huuy baalq vuh kaxêêt adro tachơơl oot. Atoh adro leq xung păk kaxêêt baalq luleq yôôych pheq biq păk kaxêêt đanưq.\n\n\\ts\\*",
  "6": "Baalq e qwuyen kađniip plêêk hlê xôq leh e jiit đom kawah baalq đnooy hlit. Baalq e qwuyen tol daak xôq dơơp daak vlôh jêêk vahaap ji dơơp ra ơơh vari bơơn đuh dêq kaluh pơơl daal paq kêê tuôôy leq baalq trôôch.",
  "7": "Tuôôy oot heq dơơp xanưk yôôych ôôq tok xing raluk leh e kalek hnoq tahmoch tadơơp dii baalq. Ni honq jaay iaq baalq ji păk kaxêêt baalq.\n\n\\ts\\*",
  "8": "Xaak ku baalq hnoq padooh tol trôôk kôt ku theng kôt ( e ơnơơng tayh tương trưng laa Sôô-đôôm ji Ai Kââp), kung laa aduq Lôôk ku oot biq đonq đin.",
  "9": "Đom pee hngơy rươyh, muuyq sôôq dro xing kaluh tamooi, palơơy tamooi, apok athêêk ji daak dêh hnoq 'yo xaak ku baalq ji leh ăm uup xôq kaluh xaak nưq.\n\n\\ts\\*",
  "10": "Koot manih tol vrii hnoq hlaah hlaak truh oot ji xa hlah. Oot măn đnoyq atăq qwua ka mamuuyq vii vaar hnhư hlit nưq heq khienq koot manih tol vrii pheq pơơl hwơơl.",
  "11": "Bơh atêq pee hngơy rươyh, ha ơơy riilh xing Kơy Plêêk hnoq muut đom oot; oot hnoq dưk tol jôôk oot, ji khơl adro 'yo hloq oot hnoq 'yôq vraal paq ik.",
  "12": "Yôôych oot hnoq tek muuyq apok kôt xing plêêk xanooh dii oot, đaneq: \"Dayh tok đneen!\" Atêq nưq, oot hnoq tok plêêk đom đôônq kluk, đong tuôôy khơl adro tachơơl ku oot 'yo oot.\n\n\\ts\\*",
  "13": "Muut wat nưq hnoq e muuyq đơơt ahrưưng vrii kôt ji muuyq phoon kưưl ku theng kôt hnoq gưưlh hrưưp. Hnoq e pơơh ravơu manih kaxêêt đom đơơt ahrưưng vrii, ji khơl adro măn riilh hnoq vraal 'yôq đơu tưp tađnaah tađnaak atok ka Kơy Plêêk tol plêêk.\n\\p",
  "14": "Taai hoaq nhưk vaar heq hlê. Hơq! Taai hoaq nhưk pee hnoq talaang daayh xalih truh.\n\n\\ts\\*\n\\p",
  "15": "Yôôych Kơy Hơu nhưk pơơh klôôp keen, ji e kaluh apok đnooy kôt măn tol plêêk, đaneq: \\q “Daak dêh dêh araak heq vlôh jêêk daak dêh ku Lôôk haay ji Plêêk chiuq paraa dơu ku Kadraq. \n\\q\nKadraq hnoq dưk xakaq đơơy đơơy, hloay hloay.”\n\n\\ts\\*\n\\m",
  "16": "Yôôych vaar kưưl poot khơl draq 'ngôôy tol ngaai oot kangưưr Kơy Plêêk kuul mot pôôt kuh ayuuôt Kơy Plêêk.",
  "17": "Oot đnooy: \\q “Kuh Lôôk ji Kơy Plêêk, Plêêk Qwuyen Da Uuh, Plêêk juneq e ji heq e, 'wot kuh kwaay Kadraq\n\\q\nvii Kadraq heq rôôp adrơk qwuyen da uuh thiek kôt ku Kadraq ji heq xaroop dưk xakaq.\\q\n\\f +\\ft Muuyq xôôq rahlaap đok: \\fqa Plêêk dưk xakaq kaluh araak, Plêêk juneq e, heq e, ji hnoq truh, \\fqa* bơh đa xôôq kaluh rahlaap đơơu neq be đok đanưq. \\f*\n\n\\ts\\*\n\\q",
  "18": "Kaluh daak tamooi tôq jaraq, \\q2\nbơh đơơt tôq daayh Kadraq heq truh. \\q2\n'Ngeq ji tuôôy xưư xadrah adro kaxêêt,\\q\nkahniq vanoong ka khơl xapok Kadraq, \\q2\n'ngưq ji khơl hlit kung khơl hlăng xatyauq, \\q2\nji ka khơl adro xet 'yôq yal Kadraq, \\q2\ndêq de hloay kôt, \\q\nji pok kaxêêt khơl adro đong pok kaxêêt vrii.”\n\n\\ts\\*\n\\p",
  "19": "Yôôych hnhư hơu ku Kơy Plêêk măn tol plêêk jah luh vlôh ji hoom jao ươk ku Lôôk jah 'yo hloq pii 'lăăpq hnhư hơu Kadraq. E xađneek chơơp, ahlôôk ôôm ôôm, ahlôôk xađneek kataa, ahrưưng vrii ji jiit prier kôt. \n\n\\ts\\*"
}