bbm_reg/62-2PE.usfm

\id 2PE
\ide UTF-8
\h 2 Petele
\toc1 2 Petele
\toc2 2 Petele
\toc3 2pe
\mt 2 Petele
\c 1
\cl ESUKI 1
\p
\v 1 Simoni Petelo, motuke pe motomani mo Yesu Kilisito, atie wango watoti ogemei, wango watoti mogano nda iso, la sambo ndamu e Mwengei osu pe e mokalesi Yesu Kilisito.
\v 2 Magba masungu pe logoo ngbii edje la ino la oyewi womeemene e Mwengei pe e Yesu Likumu lasu.
\p
\v 3 Laate okulu e womwengei wonde etohekeli iso la motema kpaa wiho kpaa winge wa mokalo pe edjeeli enanganake la Mwengei, la ligamesi e oyewi womeemene e moto ongo atowelali iso la otwa pe edjeeli elamu.
\v 4 La mboka e wiho waho atohekelali iso la motema kpaa liwuna e motio pe e osungu, laate la mboka eho, owumeni wilimo nda Mwengei, nda etili ino obitani enge edjei la moki la loyi e ehoha etetelake.
\p
\v 5 Eho lenge la omowongoseli olamu wungo wokeli inde, kelani ndenge kpaa laate okpobeni ogemei wonu la widjeli wilamu wiyewi ino,
\v 6 La lokenge wonu e oyatekesi, la oyatekesi e ino edjei e odjei la mohandja, edjei enanganake la Mwengei,
\v 7 la esombeli enu enanganake la Mwengei libalano e wouma, la libalano lanu e wouma libalano.
\v 8 Laate inga odjani la djinge sambo pe otumiani la eho, ekootekisani odjeni wato wango watikelaka wotomo te wato wango watiwotaka pukapuka la oyewi wo meemene e Likumu lasu Yesu Kilisito.
\v 9 Laate inga moto atidje la djinge sambo, adjei moto ongo ogwi maiso, ongo okonangaka maiso liwoso la hoho, pe akowusaka ate alangaali la masumu mande ma gala.
\v 10 Eho lenge, wamanima, kelakani kpaa enge eengi la ino la oyeteli la ebili ate obanyeni owelani wonu pe oononi wonu, laate inga okokelakani ndji djinge sambo otikwani te ma keke.
\v 11 Ndenge eho nde wakohekeleni ino mboka e lingelake la okumu e libela e Likumu lasu pe mokalesi mosu Yesu Kilisito.
\p
\v 12 Eho lenge, engele kpaa ikoemele o okundueli ino sambo djaho, inga te ate oyewi eho pe omaanini la omeeene enge edjeini ino la eho.
\v 13 Kasi ikoeneke ate edjei olamu la ehele engele edjeiyo mbai la ehele ngoomba esatu, iyokundueleni ino sambo laate iyosusoleni.
\v 14 Nda eyewi mbai ate etikali ma keke ngoomba esatu e mbai elongwe, ndji ndenge Likumu lasu Yesu Kilisito pe aeneseli mbai eho.
\v 15 Eho lenge, ikokela pe kpaa enge eengi la mbai engele kpaa, laate mbuse e oki wo mbai, ino amene oaseleni sambo djaho.
\p
\v 16 Eho lenge, eti la obilei masekpe ma moleho nde toinyali okulu wongo wodji atie Likumu lasu Yesu kilisito, kasi la ndenge toeneli wosungu wonde la maiso masu amene.
\v 17 Laate Wawa Mwengei amohekeleli mogano la otwa, ango ma maloba madjali tee atie inde la otwa wosungu: Oholo adjei mana o mbai o libalano, ongo mbai amene igemei.
\v 18 Tookali ango maloba maho malongwali ongo likolo edjali ango todjakali la inde la mokoli mosatu.
\v 19 Eho lenge, ogemei wungo wogemeli iso liloba e etiesakoli eumia alidji oteteli oyeti; pe okokelakani olamu la ndenge edjei ino obateli eho motema nda mwendji mungo mokololaka la ebete esi e molili ndondo e mitema manu, tee ango bhoo ekopota otani pe monoto mo bhoo mokopumba.
\v 20 Laate oyewini liwoso lu loyi, etiesakoli teeti e masia elongoi la ndjimbola esi e moto.
\v 21 La ebili ate etiesakoli etidja te mbala esi la mwano mo moto, kasi wato waasali sambo djinge ilongwali atie Mwengei ndenge elimo satu edjakali owatomi.
\c 2
\cl ESUKI 2
\p
\v 1 Kaikonde edjei pe la watiesakoli wa moleho ndondo e wato, ndenge kikima pe ekodja la wamwalimo wa moleho ndondo enu. Wato waho wakolingesa la lokenge ma masambo mango makobitisaka, pe wakomowungana te Likumu ongo owasombali iwo, wakoyadjeesele obitani galagala.
\v 2 Ngbii wakobileya sambo djawu e esombeli e ndundu, pe la loyi e iwo mboka e meemene ekotangema.
\v 3 La ononi owu, wakoolakelani ino wiho la maloba ma moleho. Kasi etumbu enge wawatenela iwo opoti gala etiumua kine, pe obitani wowu wotilangala kine ilo.
\p
\v 4 Inga Mwengei atiyatekisali ohekeli waahumbwa wango wakelate masumu etumbu, kasi awayetelali galagala, awanangali la mindjota pe awalumbia la liwela e molili, laate walambele osambisami.
\v 5 Pe inga atiatekisali ohekeli moki mo gala etumbu, kasi amobanyali Noa, motuke mo sambo ndamu, la wadji wato nsambo, ango edjeesali inde pela la moki mo wato wango wadjakali omodendeyi Mwengei.
\v 6 Pe inga aumesali gbata dja Sodomo la Gomola miwusu ma misa akweseli eho la loyi, ahekelali wato wango wakomodendjiaka Mwengei ekpangele e sambo djinge igeleli.
\v 7 Inga akalesali Lota moto o sambo ndamu, ongo odjakali oyakongi la bolo la loyi e wato wango wakobukaka pui wango wayahali la esombeli e ndundu-
\v 8 laate moto molamu oho, la loyi e sambo enge edjakali inde oeni pe ooki ango edjakali inde oyabati lisio la lisio ndondo ewu, adjakali ookesi molimo monde mo sambo ndamu magba la sambo djau e bukake pui-
\v 9 likumu ayewi okalesi la omekani wato wango wakonanganaka la Mwengei, kasi oyisi la lisio e osambisi wato wango wadjangi sambo ndamu laate waolame.
\v 10 Kaikonde, wango wakotutiaka wenge la ehoha e obitesi eho, pe wango wakodendjiaka okumu. Watiwangaka sambo, wadjei wamatioke, watingilimaka liwoso la wato wango wadjei la otwa, kasi wakotangaka.
\v 11 Waahumbwa inga te ate wayeti otetelake la okulu, watiwapundaka la maloba ma wiliko, la ebili ate wakomotemeyaka Likumu.
\v 12 Kasi wango wato, la sambo djinge eyewiti iwo pe wakotangakolaka, wakobitisana la mboka ewu enge ekokeke la logo, nda nama djinge idjangi lokenge wango wakowotamaka ndji ate wanangame pe waolame.
\v 13 Wakoyakelelaka obe iwo amene pe eho nde liputi dja tomo djau mbe. Atie ewu oemelisi wenge la use nde mwemu. Wato waungi mboka pe wato wa onalili, wakoyahekeleke la mwemu e matiesakoli mawu ango ekolakaka iwo yenga enu.
\v 14 Maiso mawu etumi la iteba, pe etiengaka odhei lisumu, pe wakogulaka milimo minge mimaaniti. Motema mou ehahani la ononi. Wadjei wana wa mbumakolo!
\v 15 Wadheiya mboka enge enanolani, waungi, watuteya mboka e Balama, mana o Beolo, ongo obalali liputi e sambo mbe.
\v 16 Kasi atotali pamela laate abukali pui; punda enge ekokpalaka mikpali pe enge etiasaka, easali la moli nda moto pe enangelali wokete e motiesakoli moho mboka.
\p
\v 17 Wadjei wiliwa witii la maliya, pe ligite linge ekokpalanaka la eheho etetelake, pe wawaiseli likolo eindake.
\v 18 La ebili ate wakopumbesaka maloba ma elolo enge eti akole, pe la ehoha e wenge la ekaleli e soni wakogulaka wango wapoti otili wato wango wakoyasombesaka la liwunga.
\v 19 Wakowawunelaka iwo lipanda, kaikonde iwo amene wadjei mituke ma obitani. Laate ongo olongami la odji moto aumiga motuke e ongo moto.
\v 20 Inga mbuse e otili osoto e moki la mboka e oyewi wo meemene e Likumu pe mokalesi Yesu Kilisito, wawongosia alidji sambo djaho pe walongania, gboo ewu eumia obe oyeti ndenge edjakali iwo liwoso.
\v 21 Laate eengali odjei olamu inga watiyewake pendja mboka e sambo ndamu la ebete ate wayewe eho ase mbuse wakukie mokongo la pui mosatu enge wawahali iwo.
\v 22 Liloba e li lisekpe enge e meemene eengisami atie iwo: Mbwa ewongwanelia wilaka winge witoholi inde, pe ngoya enge ekpoli iwo ewongoiya alidji oyabuluki la mokpodho.
\c 3
\cl ESUKI 3
\p
\v 1 Wamanima wa libalano, ehele edjei sikala ahala o wale mungo mokoodhingelakani mbai ino, enge ndondo eho, nda ahala e mbai e poo, idjaaki o okundueli ino sambo laate isusole atie ino lokenge enge elamu
\v 2 laate obundweni alidji maloba mango maasanali gala la watiesakoli wasatu alidji pui e Likumu pe Mokalesi la mboka e watomani wanu.
\p
\v 3 Oyewini liwoso lu loyi, la masio ma gboo wadendei wakodja la dendjia djau. Wakosomba la ototieyi wihoha wau amene.
\v 4 Wakoasa ate: eni owongoyi wonde enge ewunanali? Kaiko tee lisio linge lipotate ogwi watata wasu, sambo kpaa edjaki okelani ndji ndenge kikima nda lipotele e moki.
\v 5 La otutei ehoha ewu, loyi lokoosanaka iwo lele: Likolo lidjei tee gala la mbume tetelake enge epumbate la malia pe la ndondo e malia e liloba e Mwengei,
\v 6 pe la mboka eho moki e engele eho ebitanate ango e lindate eho la malia.
\v 7 Kasi ndji la mboka e liloba eho likolo la mbume enge edjei sika, eisani la gbondo e misa pe ekobanyanaka la obilei lisio lisatisamake pe e obitesi wato wango wakodendjiaka Mwengei.
\v 8 Kaiko nde, wamanima wa libalano, otiosanakeni lu loyi, la maiso ma Likumu lisio liesi lidjei nda wilanga mbuka esi pe wilanga mbuka esi nda lisio liesi.
\v 9 Likumu atiwumisaka sambo la liwuna lande, ndenge wadji wato wakodhendelaka oumisi sambo, kasi edjei nde oeneseli ino motema molai laate abaliti moto te mwesi aolane kasi abali nde wato kpaa wakukole motema.
\v 10 Kaiko nde, use wo Likumu wokodja nda moto iwa: Ase la use wuho likolo likoeta la modudu motetelake, kasi wiho waho nda ekouma eho misa wikosalamata, pe mbume la tomo djinge idjei ango ikoenene la hoho.
\p
\v 11 Ndenge moki mosu kpaa mokosalamata, bundwani nda ndenge e wato wango waengi ino odjei? Oengini nde odjei wato e esombeli esatu pe la okeli tomo djinge ekoeneneseke ate onanganini la Mwengei.
\v 12 Lambelakani pe banyakani la mamungwene manu lisio liwongwake e Mwengei, lisio linge likolo likolongola la misa, pe ekosalamata la wiho waho, nda ekouma eho misa mitetelake, ekonangwana.
\v 13 Kasi tokolambelaka likolo liholi pe mbume eholi, ndenge euni inde, pe ongo, sambo ndamu ikodja.
\p
\v 14 Eho lenge, wamanima walibalano, nda ekolambelaka ino djinge sambo, kelani djinge kpaa eengi la ino laate gboo eho atiogboteni la litono te la obe kasi la logoo.
\v 15 Alidji, dhendelani motema molai mo Likumu lasu ate edjei mokalo, ndji ndenge mangbasu o libalano Polo aodhingelalini pe ino la lokenge lungo wamohekeleli.
\v 16 Polo aaselali sambo djaho ndji ndenge pe akokelaka eho la waahala wande kpaa. Kaikonde la ndondo, djeeti sambo widjei paima ate moto ahele kole eho, enge wato wango watitiesame pe wango wamaaniti wakokukolaka eho ndenge eeti, ndji ndenge ekokelaka iwo la madhingo madji kpaa matikali, la obitani ewu amene.
\v 17 Eho lenge, ino wamanima wa libalano, nda eyewi ino eho liwoso, huakani laate otikpalaneni mongindji la iwo la liwunga e wato wango wakobukaka pui pe otidheeni edjeeli enu e omaani etetelake laate otikweni.
\v 18 Kasi djaakani ndji obeki ndondo e magba masungu pe e oyewi e Likumu lasu pe Mokalesi Yesu Kilisito. Otwa odje la inde keke pe la masio kpaa. Amen.