raglay_2021_rgs_rlt_rom_book/rom/13.json

{
  "1": "Dơgrữq mơnuĩh iỡuq duh huaĩq dơgrữq mơnuĩh hũ gơnuar pãq dlòc drơi, kơyua ôh hũ gơnuar halơi la ôh trôh mưng Yàc Pô Lơngĩq. Dơgrữq gơnuar tũq nĩ hũ kung la mưng Yàc Pô Lơngĩq pơto ngãq gơnĩt. ",
  "2": "Yơu nữn, mơnuĩh halơi jơdrãq sì dơgrữq mơnuĩh hũ gơnuar, nữn la jơdrãq sì gơnuar-pơđar Yàc Pô Lơngĩq hũ; sì dơgrữq mơnuĩh ngãq yơu nữn ròq ãt mãq kaya ngãq dlàiq ga drơi. ",
  "3": "Kơyua mơnuĩh hũ gơnuar ôh iỡuq la kaya tơtơh huãiq ga mơnuĩh ngãq siàp ôh, nữn la ga mơnuĩh ngãq mơsãc. Pơnõq adơi sơai ưng ôh huaĩq mơnuĩh hũ gơnuar mĩn? Iỡuq ngãq kaya tơpãq, nữn pơnõq adơi sơai ròq hũ sơ-uỗt mơyòp. ",
  "4": "Kơyua pơnõq nhũ la mơnuĩh duh vruãq Yàc Pô Lơngĩq hũ ngãq vruãq pioh kuơ màc ga pơnõq adơi sơai. Nữn mơyah làiq pơnõq adơi sơai ngãq kaya mơsãc, nữn iỡuq huaĩq, kơyua pơnõq nhũ ôh tơ-iàq đao savĩq ôh hũ gơtha. Pơnõq nhũ la mơnuĩh duh vruãq Yàc Pô Lơngĩq hũ, la mơnuĩh ngãq dlàiq mơnuĩh ngãq mơsãc. ",
  "5": "Yơu nữn, pơnõq adơi sơai iỡuq ngãq tui, ôh iỡuq mĩn kơyua huaĩq kađòc ngãq dlàiq, nữn kung kơyua mưng tũc hatai drơi. ",
  "6": "Kung mưng nữn, nữn pơnõq adơi sơai iỡuq pioh sơkãq jia. Kơyua dơgrữq mơnuĩh hũ gơnuar la mơnuĩh duh vruãq Yàc Pô Lơngĩq, gãm ãt ngãq dơgrữq vruãq nĩ. ",
  "7": "Iỡuq vơyar ga dơgrữq mơnuĩh drơi dòq srẽ. Sơkãq jĩ ga mơnuĩh drơi iỡuq sơkãq jĩ, vuh jĩn ga mơnuĩh drơi iỡuq vuh; huaĩq mơnuĩh drơi iỡuq huaĩq; kĩ ngam mơnuĩh drơi iỡuq kĩ ngam. ",
  "8": "Juơi kađòc srẽ mơnuĩh halơi kaya hagĩq, lơniãu kaya khiãng duman pơweh sì gỡuq. Kơyua mơnuĩh halơi khiãng duman mơnuĩh tơmo nữn la ngãq wil tãl voh-va. ",
  "9": "Viãq dơgrữq pơnuaĩq pơđar-va, yơu: \" Anàq juơi sỗq dlàiq drĩ drõc, anàq juơi pa-mơtai mơnuĩh, anàq juơi tlẽq sơwah, anàq juơi ham guam,\" sì mơyah làiq dòq hũ pơnuaĩq halơi tơmo, kung wãq pa-katũt wỡq dơlãp gơnuar pơđar nĩ: \"Iỡuq anĩt duman mơnuĩh tơmo yơu rùp phàp drơi.\" ",
  "10": "Kaya khiãng duman ôh ngãq iãh sì mơnuĩh ga mơnuĩh tơmo. Yơu nữn, kaya khiãng duman la ngãq wil tãl voh-va. ",
  "11": "Iỡuq ngãq yơu nữn kơyua pơnõq drơi thơu sa-tũq lơwah, song trôh tũq pơnõq drơi mưng kaya pìq trôh kaya tơgùq dỡc. Kơyua tũq nĩ kaya dõc pơtlah pơnõq drơi song jẽq rlao pơweh sì tũq pơnõq drơi vơhrơu pãc tui. ",
  "12": "Mơlãp jẽq avih, harơi jẽq sơdah. Yơu nữn, pơnõq drơi iỡuq tlàq luơi dơgrữq vruãq sồp kơnãm, sì chồq ao pasơi kaya sơdah. ",
  "13": "Pơnõq drơi iỡuq yàp nao ga tơpãq iỡuq, yơu di khrãh dlài harơi, ôh bõc mơnhũm, mơvũq mơvẽl; ôh hadiuq drĩ drõc,  lơduh hadơ, kung juơi mơvlah kơchah, lơmùq mơvai. ",
  "14": "Yơu nữn, iỡuq tồq chồq vẽq Yàc Dõc Pơtlah Je-su; juơi mĩn rchãc gah rlo-rồp pioh ngãq tui kaya ham ưng krơi nhũ hũ. "
}