cor_2020_cua_clt_rom_book/rom/6.json

{
  "1": "Anưq yôôych, haay hnoq đnooy đaleq? Haay e duh dơơp đnoyq đom kadrôp maroh xôq vanong kaxaay athêêp rah 'ngưưng be?",
  "2": "Varơuq nưq leh xlih vlôh ik. Haay laa adro heq kaxêêt đôôiq dii kadrôp maroh yôôych dơơp aleq haay hnoq măn riilh đom ni?",
  "3": "Long oh ay leh xet đaneq atoh kơyq heq chiuq baap-teem đom Lôôk Wơt Dêh Jê-xu laa heq jah Baap-teem muut đom varơuq kaxêêt ku Kadraq long aleq?",
  "4": "Kơq nưq, haay heq jah up dii Kadraq gamưh pheep baap-teem muut đom varơuq kaxêêt, xôq ka dang đaji Lôôk Wơt Dêh gamưh tađnah tađnaak ku Vaq heq jah khienq riilh hlê xing aduq kaxêêt luleq, yôôych haay kung hnoq ik tawaak hooy đom varơuq riilh đơơu lunưq.",
  "5": "Vii atoh haay heq vlôh jêêk anguk muuyq dii kung muuyq dang varơuq kaxêêt ku Kadraq, yôôych mot kadrơơy, haay kung hnoq laa đanưq aduq varơuq riilh hlê ku Kadraq;",
  "6": "bơyh xet varơuq neq, đaneq koot manih duut ku haay heq biq đongq đin dii Kadraq, xôq xăk xamơk ku kadrôp maroh hnoq ik biq kaxêêt hlơơp, be măn khienq haay dơơp xapok ka kadrôp maroh đnoyq.",
  "7": "Vii kơyq heq kaxêêt yôôych jah 'nhuôt ka'lăăk kaluh rôôp xadrah xing kadrôp maroh.",
  "8": "Bơh atoh haay heq kaxêêt dii Lôôk Wơt Dêh, yôôych haay tuuôq đaneq haay kung hnoq riilh kung dii Kadraq,",
  "9": "vii xet đaneq atêq katuôôy jah khienq riilh hlê xing aduq kaxêêt, Lôôk Wơt Dêh paq măn kaxêêt đnoyq; varơuq kaxêêt paq măn dưk xanok tol Kadraq.",
  "10": "Vii varơuq kaxêêt đơu Kadraq heq chiuq, nưq laa Kadraq heq kaxêêt đôôiq dii kadrôp maroh muuyq yưk đuh dêq. Măn varơuq riilh đơu Kadraq riilh, nưq laa Kadraq riilh ka Kơy Plêêk.",
  "11": "Kung tyauq trôôk nưq, tabơh oh ay pheq 'yo kadih oh ay laa adro kaxêêt đôôiq dii kadrôp maroh, bơh laa riilh ka Kơy Plêêk đom Lôôk Wơt Dêh Jê-xu.",
  "12": "Anưq, te xôq kadrôp maroh dưk xanok đom xăk xamơk phuk 'lăălq varơuq kaxêêt ku oh ay, xôq yôôych tameen tyauq kaluh hmưch trôôch ku ni.",
  "13": "Kung te atăq kaluh xăk xamơk ku haay ka kadrôp maroh đaji valong dơơp ku varơuq be hyioh jăk. Bơh dayh tơk tưp kadih haay ka Kơy Plêêk, đaji đong riilh hlê xing adro kaxêêt, ji kaluh xăk xamơk ku haay đaji valong dơơp ku varơuq hyioh jăk ka Kơy Plêêk.\n",
  "14": "Bơyh kadrôp maroh hnoq be jah dưk xanok tol oh ay, vii oh ay leh măn 'lăălq ganuun, bơh laa 'lăălq vanong kaxaay.",
  "15": "Anưq yôôych luleq? Haay e duh lôôp kadrôp vii haay be măn 'lăălq ganuun, đơu măn 'lăălq vanong kaxaay be? Varơuq nưq leh xlih vlôh ik.",
  "16": "Oh ay leh xet đaneq oh ay atăq kadih oh ay ka varơuq kajoq đaji xapok đom varơuq tameen tyauq, yôôych oh ay vlôh jêêk xapok ka varơuq đơu oh ay tameen tyauq long aleq - paq kêê laa ku kadrôp maroh jarooy truh varơuq kaxêêt, long laa ku varơuq tameen tyauq jarooy truh varơuq hyioh jăk?",
  "17": "Bơh kuh kwaay Kơy Plêêk! Vii oh ay 'miêh dơơp jôôk tii ka kadrôp maroh, bơh oh ay heq dik xuum tameen tyauq dơơp atôôlh ku pato dayq đơu haay jah pato dayq.",
  "18": "Oh ay heq jah 'wơt xaloot klơlh kadrôp maroh, ji heq vlôh jêêk jôôk tii ku varơuq hyioh jăk.",
  "19": "Gô đnooy tyauq trôôk koot manih vii xăk xơmơơk ku oh ay leh kaalh paraat. vii đaji oh ay heq atăq xak xơmơơk haay dơơp jôôk tii ka varơuq a'moh nhơơy ji varơuq xơơk aak angôôk choch đaleq, yôôych juneq oh ay kung dayh tưp xăk xơmơơk haay dơơp jôôk tii ka varơuq hyioh jăk xôq jah jêêk hlăng vah lunưq.",
  "20": "Vii tuôôy oh ay măn laa jôôk tii ku kadrôp maroh, oh ay jah rayơơh rayơơy đôôiq dii varơuq hyioh jăk.",
  "21": "Nưq, tuôôy nưq, oh ay heq jah raak plaay kajoq xing kaluh varơuq đơu juneq oh ay hloq kamưưl? vii varơuq pơq hlê ku kaluh varơuq nưq laa varơuq kaxêêt.",
  "22": "Bơh juneq oh ay heq jah wơt xaloot klơlh kadrôp maroh ji jêêk vlôh jôôk tii ku Kơy Plêêk, yôôych oh ay jah raak plaay yuuôl hlăng vah, ji vlôh plaay laa varơuq riilh đơơy đơơy.",
  "23": "Vii jêêt hngơy ku kadrôp maroh laa varơuq kaxêêt, bơh kadrool ku Kơy Plêêk laa varơuq riilh đơơy đơơy đom Lôôk Wơt Dêh Jê-xu, Lôôk haay."
}