cor_2020_cua_clt_rom_book/rom/6.json

{
  "1": "Anưq yôôych, haay hnoq đnooy đaleq? Haay e duh dơơp đnoyq đom kadrôp maroh xôq vanong kaxaay athêêp rah 'ngưưng be?",
  "2": "Varơuq nưq leh xlih vlôh ik. Haay laa adro heq kaxêêt đôôiq dii kadrôp maroh yôôych dơơp aleq haay hnoq măn riilh đom ni?",
  "3": "Long oh ay leh xet đaneq atoh kơyq heq chiuq baap-teem đom Lôôk Wơt Dêh Jê-xu laa heq jah Baap-teem muut đom varơuq kaxêêt ku Kadraq long aleq?",
  "4": "Kơq nưq, haay heq jah up dii Kadraq gamưh pheep baap-teem muut đom varơuq kaxêêt, xôq ka dang đaji Lôôk Wơt Dêh gamưh tađnah tađnaak ku Vaq heq jah khienq riilh hlê xing aduq kaxêêt luleq, yôôych haay kung hnoq ik tawaak hooy đom varơuq riilh đơơu lunưq.",
  "5": "Vii atoh haay heq jah anguuk muuyq dii Kadraq đom varơuq kaxêêt dang varơuq kaxêêt ku Kadraq, yôôych haay kung hnoq jah anguuk muuyq dii varơuq riilh hlê ku Kadraq.\n",
  "6": "Haay xet đaneq koot manih duut ku haay heq biq đonq đin dii Kadraq, xôq xăk xơmơơk kadrôp maroh biq kaxêêt hlơơp. Varơuq xalih vlôh đanưq xôq haay paq măn biq kadrôp maroh rôp dơơp jôôk tii đnoyq.",
  "7": "Vii kơyq heq kaxêêt yôôych jah đnooy 'yo laa hyioh jăk đôôiq dii kadrôp maroh.  ",
  "8": "Atoh haay heq achung kaxêêt dii Kơy Christ, yôôych haay tuuôq đaneq haay kung hnoq achung riilh dii Kadraq.",
  "9": "Haay xet Lôôk 'Wơt Dêh heq riilh hlê xing aduq kaxêêt, đanưq Kadraq leh kaxêêt đnoyq. Varơuq Kaxêêt paq măn e qwuyen kajoq tol Kadraq.",
  "10": "Vii Kadraq kaxêêt laa kaxêêt đôôiq dii kadrôp maroh, vơơ muuyq yưk heq, ji Kadraq riilh laa riilh ka Kơy Plêêk.",
  "11": "Kung anưq, oh ay pheq ‘yo đaji xăk heq kaxêêt đôôiq dii kadrôp maroh, bơh riilh ka Kơy Plêêk đom Lôôk Wơt Dêh Jê-xu.",
  "12": "Nưq, te xôq kadrôp maroh dưk xanok đom xăk xamơơk ku oh ay xôq yôôych tameen tyauq kaluh xuum trôôch ku ni.",
  "13": "Te atăq xăk xamơơk haay ka kadrôp maroh xôq dơơp jôôk tii hơu varơuq leh hyioh jăk, bơh dayh tưp xăk ka Kơy Plêêk, đaji manih kaxêêt jah riilh hlê, ji tưp xăk xơmơơk haay ka Kadraq xôq hơu varơuq hyioh jăk.\n",
  "14": "Te xôq kadrôp maroh dưk xanok tol oh ay, vii oh ay leh măn pi'lăălq ganuun, bơh măn pi'lăălq vanong kaxaay.",
  "15": "Đa nưq laa aleq? Jơq be vii leh măn pi'lăălq ganuun, đơu măn pi'lăălq vanong kaxaay, anưq haay hnoq kưq lôôp kadrôp? Leh hmưq 'leq e varơuq nưq.",
  "16": "Oh ay leh xet laa tuôôy atăq xăk dơơp jôôk tii xôq tameen tyauq kơyq, yôôych oh ay laa jôôk tii ku manih haay tameen tyauq ih? Varơuq neq jơq, long oh ay dơơp jôôk tii ka kadrôp maroh, jarooy truh varơuq kaxêêt, long dơơp jôôk tii ka varơuq tameen tyauq, jarooy truh varơuq hyioh jăk.",
  "17": "Bơh kuh kwaay Kơy Plêêk! Vii oh ay 'miêh dơơp jôôk tii ka kadrôp maroh, bơh oh ay heq dik xuum tameen tyauq dơơp atôôlh ku pato dayq đơu haay jah pato dayq.",
  "18": "Oh ay heq jah 'wơt xaloot klơlh kadrôp maroh, ji heq vlôh jêêk jôôk tii ku varơuq hyioh jăk.",
  "19": "Gô đnooy tyauq trôôk koot manih vii xăk xơmơơk ku oh ay leh kaalh paraat. vii đaji oh ay heq atăq xak xơmơơk haay dơơp jôôk tii ka varơuq a'moh nhơơy ji varơuq xơơk aak angôôk choch đaleq, yôôych juneq oh ay kung dayh tưp xăk xơmơơk haay dơơp jôôk tii ka varơuq hyioh jăk xôq jah jêêk hlăng vah lunưq.",
  "20": "Vii tuôôy oh ay măn laa jôôk tii ku kadrôp maroh, oh ay jah rayơơh rayơơy đôôiq dii varơuq hyioh jăk.",
  "21": "Nưq, tuôôy nưq, oh ay heq jah raak plaay kajoq xing kaluh varơuq đơu juneq oh ay hloq kamưưl? vii varơuq pơq hlê ku kaluh varơuq nưq laa varơuq kaxêêt.",
  "22": "Bơh juneq oh ay heq jah wơt xaloot klơlh kadrôp maroh ji jêêk vlôh jôôk tii ku Kơy Plêêk, yôôych oh ay jah raak plaay yuuôl hlăng vah, ji vlôh plaay laa varơuq riilh đơơy đơơy.",
  "23": "Vii jêêt hngơy ku kadrôp maroh laa varơuq kaxêêt, bơh kadrool ku Kơy Plêêk laa varơuq riilh đơơy đơơy đom Lôôk Wơt Dêh Jê-xu, Lôôk haay."
}