2.9 KiB
28. Zəngin və nüfuzlu gənc
Bir dəfə bir zəngin və nüfuzlu gənc İsaya yaxınlaşdı və soruşdu: “Ey yaxşı Müəllim, mən nə etməliyəm ki, əbədi həyata malik olum?” İsa ona dedi: “Mənə niyə yaxşı deyirsən? Tək Allahdan başqa yaxşısı yoxdur. Əgər əbədi həyata malik olmaq istəyirsənsə, Allahın əmrlərinə riayət elə.”
“Məhz hansı əmrlərinə riayət etməliyəm?” deyə, gənc soruşdu. İsa cavab verdi: “Qətl etmə. Zina etmə. Oğurluq etmə. Yalan danışma. Ata-anana hörmət et və öz yaxınını özün kimi sev.”
Gənc dedi: “Bütün bu qanunlara mən lap uşaqlıqdan riayət edirəm. Əbədi yaşamaq üçün mən daha nə etməliyəm?” İsa ona dərin məhəbbətlə baxdı və Öz cavabını verdi.
İsa dedi: “Əgər sən kamil olmaq istəyirsənsə, get və bütün var-dövlətini sat və əldə etdiyin pulu yoxsullara payla. Onda göylərdə xəzinən olacaqdır. Sonra qayıt və ardımca gəl.”
Gənc İsanın ona dediklərini eşidəndə çox təəssüfləndi və İsadan ayrıldı. Axı o, çox zəngin insan idi və malik olduğu hər şeyi başqalarına vermək istəmirdi.
İsa şagirdlərinə dedi: “Varlıların Allahın Padşahlığına daxil olması çox çətindir! Dəvənin iynə gözundən keçməsi, varlı adamın Allahın Padşahlığına daxil olmasından asandır.”
Şagirdlər İsanın bu sözlərini eşidəndə təəccübləndilər. Onlar soruşdular: “Elə isə kim xilas ola bilər?”
İsa şagirdlərinə baxıb onlara cavab verdi: “İnsanların özlərini xilas etməsi qeyri-mümkündür. Amma Allah üçün qeyri-mümkün olan heç bir şey yoxdur.”
Onda Peter İsadan soruşdu: “Biz, Sənin şagirdlərin, hər şeyi atıb Sənin ardınca gəlmişik. Bəs bizim mükafatımız nə olacaqdır?”
İsa cavab verdi: “Mənə görə evini, qardaş-bacılarını, ata-anasını, uşaqlarını və ya bütün mülkünü tərk edən hər kəs 100 qat artıq əvəzini alacaqdır. Həmçinin, əbədi həyata malik olacaqdır. Bir çox birincilər axırıncı, axırıncılar isə birinci olacaqdır.”
Müqəddəs Kitabdan hekayə. Matta 19:16-30; Mark 10:17-31 və Luka 18:18-30