# 28. Zəngin və nüfuzlu gənc

![Frame 28-01](https://cdn.door43.org/obs/jpg/360px/obs-en-28-01.jpg)

Bir dəfə bir zəngin və nüfuzlu gənc İsaya yaxınlaşdı və soruşdu: “Ey yaxşı Müəllim, mən nə etməliyəm ki, əbədi həyata malik olum?” İsa ona dedi: “Mənə niyə yaxşı deyirsən? Tək Allahdan başqa yaxşısı yoxdur. Əgər əbədi həyata malik olmaq istəyirsənsə, Allahın əmrlərinə riayət elə.”

![Frame 28-02](https://cdn.door43.org/obs/jpg/360px/obs-en-28-02.jpg)

“Məhz hansı əmrlərinə riayət etməliyəm?” deyə, gənc soruşdu. İsa cavab verdi: “Qətl etmə. Zina etmə. Oğurluq etmə. Yalan danışma. Ata-anana hörmət et və öz yaxınını özün kimi sev.”

![Frame 28-03](https://cdn.door43.org/obs/jpg/360px/obs-en-28-03.jpg)

Gənc dedi: “Bütün bu qanunlara mən lap uşaqlıqdan riayət edirəm. Əbədi yaşamaq üçün mən daha nə etməliyəm?” İsa ona dərin məhəbbətlə baxdı və Öz cavabını verdi.

![Frame 28-04](https://cdn.door43.org/obs/jpg/360px/obs-en-28-04.jpg)

İsa dedi: “Əgər sən kamil olmaq istəyirsənsə, get və bütün var-dövlətini sat və əldə etdiyin pulu yoxsullara payla. Onda göylərdə xəzinən olacaqdır. Sonra qayıt və ardımca gəl.”

![Frame 28-05](https://cdn.door43.org/obs/jpg/360px/obs-en-28-05.jpg)

Gənc İsanın ona dediklərini eşidəndə çox təəssüfləndi və İsadan ayrıldı. Axı o, çox zəngin insan idi və malik olduğu hər şeyi başqalarına vermək istəmirdi.

![Frame 28-06](https://cdn.door43.org/obs/jpg/360px/obs-en-28-06.jpg)

İsa şagirdlərinə dedi: “Varlıların Allahın Padşahlığına daxil olması çox çətindir! Dəvənin iynə gözundən keçməsi, varlı adamın Allahın Padşahlığına daxil olmasından asandır.”

![Frame 28-07](https://cdn.door43.org/obs/jpg/360px/obs-en-28-07.jpg)

Şagirdlər İsanın bu sözlərini eşidəndə təəccübləndilər. 
Onlar soruşdular: “Elə isə kim xilas ola bilər?”

![Frame 28-08](https://cdn.door43.org/obs/jpg/360px/obs-en-28-08.jpg)

İsa şagirdlərinə baxıb onlara cavab verdi: “İnsanların özlərini xilas etməsi qeyri-mümkündür. Amma Allah üçün qeyri-mümkün olan heç bir şey yoxdur.”

![Frame 28-09](https://cdn.door43.org/obs/jpg/360px/obs-en-28-09.jpg)

Onda Peter İsadan soruşdu: “Biz, Sənin şagirdlərin, hər şeyi atıb Sənin ardınca gəlmişik. Bəs bizim mükafatımız nə olacaqdır?”

![Frame 28-10](https://cdn.door43.org/obs/jpg/360px/obs-en-28-10.jpg)

İsa cavab verdi: “Mənə görə evini, qardaş-bacılarını, ata-anasını, uşaqlarını və ya bütün mülkünü tərk edən hər kəs 100 qat artıq əvəzini alacaqdır. Həmçinin, əbədi həyata malik olacaqdır. Bir çox birincilər axırıncı, axırıncılar isə birinci olacaqdır.”

_Müqəddəs Kitabdan hekayə. Matta 19:16-30; Mark 10:17-31 və Luka 18:18-30_