GRA_apd_obs/content/14.md

التيهان فى البرية

الله انتهى من كلامه مع الإسرائيليين عن كل الناموس المفروض يطيعوا بسبب عهده معهم . بعد داك قادهم بعيد من جبل سيناء . هو داير يشيلهم لارض الموعد . الارض دى كان اسمها كنعان . الله مشى قدامهم فى شكل عمود من السحابة وهم تبعوه .

الله وعد ابراهيم ، اسحاق و يعقوب بانو حيدي ارض الموعد لنسلهم ، لكن كان فى مجموعات كتيرة من الناس ساكنين هناك . اسمهم الكنعانيين . و الكنعانيين ما كانوا بعبدوا ولا بطيعوا الله . هم عبدوا الهة كاذبة و عملوا حاجات شريرة كتيرة .

الله كلم الاسرائيليين ، "بعدما تمشوا ارض الموعد ، لازم تتخلصوا من كل الكنعانيين الهناك، ما تعملوا معاهم سلام ولا تعرسوا منهم . لازم تدمروا كل اصنامهم نهائيا . لو انتو ما اطعتونى ، نهايتكم حتعبدوا اصنامهم بدل ما تعبدونى".

لمن الاسرائيليين وصلوا حدود كنعان، موسى اختار اتنا عشر راجل ، واحد من كل قبائل اسرائيل ، اداهم توجيهات يمشوا و يتجسسوا عن الارض و يشوفوها عاملة كيف. و برضو يتجسسوا على الكنعانيين و يشوفوهم كيف كانوا قويين ولا ضعيفين .

الاتنا عشر راجل مشوا لكنعان لمدة اربعين يوم و رجعوا. و كلموا الشعب ، "الارض خصبة شديد و المحاصيل كتيرة !" ولكن عشرة من الجواسيس قالوا، "المدن قوية شديد و الناس عمالقة. لو هاجمناهم ، اكيد بهزمونا و بقتلونا !" .

طوالى الجاسوسين كالب و يشوع ، قالوا ، "صحيح انو ناس كنعان طوال و قويين ، لكن اكيد بنهزمهم ! لانو الله حيقاتل معانا !" .

لكن الشعب ما سمعوا لكالب و يشوع . وبقوا زعلانين من موسى و هارون وقالوا "ليه انتو جيبتونا فى المكان الصعب ده ؟مفروض نقعدوا فى مصر . لو دخلنا الارض ، بنموت فى المعركة ، و الكنعانيين حيخلوا نسوانا و اولادنا يكونوا عبيد". الشعب دايرين يختاروا قائد تانى يرجعهم لمصر .

لمن الشعب قالوا كده ، الله بقى زعلان شديد و جاء لخيمة الاجتماع و قال ، "انتو اتمردتوا ضدى ، عشان كده كلكم حتفضلوا تايهين فى البرية. و اى زول من عمر عشرين سنة لفوق بيموت هناك و ما حيدخل الارض بديكم ليها. فقط يشوع و كالب بيدخلوا فيه".

لمن الشعب سمعوا الله قال كدا ، بقوا متاسفين لانهم اخطاوا . عشان كدا قرروا يهاجموا شعب كنعان . موسى حذرهم ما يمشوا لانو الله ما حيمشى معاهم ، لكن هم ما سمعوا .

الله ما مشى معاهم للمعركة ، عشان كدا الكنعانيين هزموهم و ناس كتار منهم ماتوا . بعد داك الاسرائيليين رجعوا من كنعان . الاربعين سنة الجاى ، حيكونوا تايهين فى البرية .

فى فترة الاربعين سنة الكان الاسرائيليين فيها تايهين فى البرية ، الله سدد احتياجاتهم و جاب ليهم رغيف من السماء اسمه "المن" . هو برضو رسل مجموعة من السلوى (طيور متوسطة الحجم) لمعسكراتهم عشان يكون عندهم لحم ياكله . خلال الفترة دى الله حفظ ملابسهم و نعلاتهم عشان ما تخرب .

بطريقة معجزية الله خلى الموية تطلع من الحجر عشان يشربوا . لكن رغم ده كلو شعب اسرائيل اشتكوا و اتذمروا ضد الله و موسى . وبرضو الله لسه كان امين معاهم . هو تمم الوعد الكان وعد بيه ابراهيم ، اسحاق ، يعقوب ونسله .

مرة تانية لمن الشعب كان ما عندهم موية ، الله قال لموسى ، "قول للحجر و الموية بتطلع منه" . لكن موسى ما اتكلم مع الحجر بدل ما يقول ضرب الحجر بالعصا مرتين . بالطريقة دى هو ما احترم الله . موية تطلع من الحجر لكل زول يشرب ، لكن الله كان زعلان من موسى . و قال ، "عشان عملت كده انت ما حتدخل ارض الموعد" .

بعدما الاسرائيليين ضاعوا فى البرية لمدة اربعين سنة ، كل الكان اتمردوا ضد الله ماتوا ، بعد داك الله قاد الشعب لطراف ارض الموعد تانى . موسى كان بقى كبير شديد و الله اختار يشوع عشان يساعده فى قيادة الشعب . الله كمان وعد موسى انو يوم من الايام ، حيرسل للشعب نبى زى موسى .

بعد داك الله كلم موسى يمشى لراس الجبل عشان هو يقدر يشوف ارض الموعد . موسى شاف ارض الموعد لكن الله ما سمح ليه يدخل . بعد داك موسى مات ، و الاسرائيليين حزنوا لتلاتين يوم . يشوع بقى قائدهم الجديد . يشوع كان قائد كويس لانو هو صدق و اطاع الله .

القصة من الكتاب المقدس ماخوذة من سفر الخروج الاصحاح ١٦ - ١٧ و سفر العدد ١٠ - ١٤ ؛ ٢٠ ؛ ٢٧ ؛ و سفر التثنية ٣٤ .