# التيهان  فى البرية

![OBS Image](https://cdn.door43.org/obs/jpg/360px/obs-en-14-01.jpg)

الله  انتهى  من كلامه مع  الإسرائيليين عن كل الناموس المفروض يطيعوا بسبب عهده معهم . بعد داك قادهم بعيد من جبل سيناء . هو داير يشيلهم لارض الموعد . الارض دى كان  اسمها كنعان . الله مشى قدامهم فى شكل عمود من السحابة  وهم  تبعوه .

![OBS Image](https://cdn.door43.org/obs/jpg/360px/obs-en-14-02.jpg)

الله  وعد ابراهيم ، اسحاق  و يعقوب  بانو  حيدي ارض  الموعد  لنسلهم ، لكن كان  فى مجموعات كتيرة من الناس ساكنين هناك . اسمهم الكنعانيين . و الكنعانيين  ما  كانوا بعبدوا  ولا  بطيعوا  الله . هم عبدوا الهة كاذبة و عملوا حاجات شريرة  كتيرة   .

![OBS Image](https://cdn.door43.org/obs/jpg/360px/obs-en-14-03.jpg)

الله كلم الاسرائيليين ، "بعدما تمشوا ارض الموعد ، لازم تتخلصوا من  كل الكنعانيين الهناك، ما تعملوا معاهم  سلام  ولا تعرسوا منهم . لازم تدمروا  كل اصنامهم  نهائيا .  لو انتو ما اطعتونى  ، نهايتكم حتعبدوا اصنامهم  بدل ما  تعبدونى".

![OBS Image](https://cdn.door43.org/obs/jpg/360px/obs-en-14-04.jpg)

لمن الاسرائيليين وصلوا حدود كنعان، موسى اختار اتنا عشر راجل ،  واحد من كل  قبائل اسرائيل ، اداهم  توجيهات  يمشوا و  يتجسسوا عن  الارض و  يشوفوها  عاملة  كيف. و برضو  يتجسسوا  على الكنعانيين  و يشوفوهم  كيف كانوا   قويين ولا ضعيفين  .

![OBS Image](https://cdn.door43.org/obs/jpg/360px/obs-en-14-05.jpg)

الاتنا عشر راجل مشوا  لكنعان لمدة اربعين يوم و رجعوا. و كلموا  الشعب ، "الارض خصبة شديد و المحاصيل كتيرة !" ولكن عشرة  من الجواسيس   قالوا، "المدن قوية شديد و الناس عمالقة. لو هاجمناهم ، اكيد بهزمونا  و بقتلونا !" .

![OBS Image](https://cdn.door43.org/obs/jpg/360px/obs-en-14-06.jpg)

طوالى الجاسوسين  كالب و يشوع  ، قالوا ، "صحيح  انو ناس كنعان  طوال  و قويين  ، لكن اكيد  بنهزمهم ! لانو  الله  حيقاتل  معانا !" .

![OBS Image](https://cdn.door43.org/obs/jpg/360px/obs-en-14-07.jpg)

لكن الشعب ما سمعوا لكالب و يشوع . وبقوا زعلانين من موسى و هارون وقالوا "ليه انتو جيبتونا  فى  المكان الصعب ده ؟مفروض نقعدوا  فى مصر . لو دخلنا  الارض ،  بنموت فى المعركة ، و الكنعانيين حيخلوا نسوانا و اولادنا يكونوا عبيد". الشعب دايرين يختاروا قائد تانى   يرجعهم لمصر .

![OBS Image](https://cdn.door43.org/obs/jpg/360px/obs-en-14-08.jpg)

لمن الشعب قالوا كده ، الله بقى زعلان شديد و جاء  لخيمة الاجتماع و قال ، "انتو اتمردتوا  ضدى ،  عشان كده  كلكم حتفضلوا تايهين  فى البرية. و اى زول  من عمر عشرين سنة  لفوق بيموت هناك و ما حيدخل الارض  بديكم  ليها.  فقط  يشوع و كالب بيدخلوا فيه".

![OBS Image](https://cdn.door43.org/obs/jpg/360px/obs-en-14-09.jpg)

لمن الشعب سمعوا الله قال كدا ، بقوا متاسفين لانهم  اخطاوا . عشان كدا قرروا يهاجموا شعب  كنعان . موسى حذرهم ما يمشوا  لانو الله  ما حيمشى معاهم ، لكن  هم ما سمعوا  .

![OBS Image](https://cdn.door43.org/obs/jpg/360px/obs-en-14-10.jpg)

الله ما  مشى معاهم للمعركة  ، عشان كدا الكنعانيين هزموهم  و ناس كتار منهم ماتوا  . بعد  داك الاسرائيليين  رجعوا من كنعان  . الاربعين سنة  الجاى  ، حيكونوا  تايهين فى البرية .

![OBS Image](https://cdn.door43.org/obs/jpg/360px/obs-en-14-11.jpg)

فى فترة الاربعين سنة الكان الاسرائيليين فيها تايهين فى البرية ، الله  سدد  احتياجاتهم و جاب ليهم رغيف من السماء اسمه  "المن" . هو  برضو رسل  مجموعة من السلوى  (طيور متوسطة الحجم) لمعسكراتهم  عشان يكون عندهم  لحم ياكله . خلال الفترة دى الله حفظ ملابسهم و نعلاتهم  عشان ما تخرب .

![OBS Image](https://cdn.door43.org/obs/jpg/360px/obs-en-14-12.jpg)

بطريقة معجزية الله خلى الموية تطلع من الحجر عشان يشربوا . لكن رغم ده كلو شعب اسرائيل اشتكوا  و اتذمروا ضد الله و موسى  . وبرضو الله  لسه  كان امين معاهم . هو تمم الوعد الكان وعد  بيه ابراهيم ، اسحاق ، يعقوب ونسله .

![OBS Image](https://cdn.door43.org/obs/jpg/360px/obs-en-14-13.jpg)

مرة تانية لمن الشعب كان ما عندهم موية ، الله قال لموسى  ، "قول  للحجر و الموية بتطلع منه" . لكن موسى  ما اتكلم مع الحجر بدل ما يقول  ضرب الحجر بالعصا مرتين . بالطريقة دى هو ما احترم  الله . موية تطلع من  الحجر لكل زول  يشرب  ، لكن الله كان  زعلان من موسى . و قال ، "عشان عملت كده  انت ما حتدخل  ارض الموعد" .

![OBS Image](https://cdn.door43.org/obs/jpg/360px/obs-en-14-14.jpg)

بعدما الاسرائيليين ضاعوا  فى البرية لمدة  اربعين سنة ،  كل  الكان اتمردوا ضد الله ماتوا ، بعد داك الله قاد الشعب لطراف ارض الموعد تانى . موسى كان بقى كبير شديد و الله اختار يشوع عشان يساعده  فى قيادة  الشعب . الله كمان  وعد موسى انو  يوم من الايام ، حيرسل للشعب  نبى  زى موسى .

![OBS Image](https://cdn.door43.org/obs/jpg/360px/obs-en-14-15.jpg)

بعد داك الله كلم موسى يمشى لراس الجبل عشان هو يقدر يشوف ارض الموعد . موسى شاف ارض الموعد لكن الله ما سمح ليه يدخل . بعد داك موسى مات  ، و الاسرائيليين حزنوا لتلاتين يوم . يشوع بقى قائدهم الجديد . يشوع كان قائد كويس لانو هو صدق و اطاع الله .

_القصة من الكتاب المقدس ماخوذة من سفر الخروج الاصحاح ١٦ - ١٧ و سفر العدد ١٠ - ١٤ ؛ ٢٠ ؛ ٢٧ ؛ و  سفر التثنية ٣٤ ._