مملكة اسرائيل و مملكة يهوذا كلهم اخطاوا ضد الله . كسروا العهد الكان الله عملو معاهم فى جبل سيناء . الله رسل انبيائه ليحذرهم عشان يتوبوا و يعبدوه تانى ، لكن هم رفضوا يطيعوه .
عشان كده الله عاقب المملكتين و سمح لاعدائهم يدمروهم . الاشوريين كانوا امة تانية بقوا قويين شديد . برضو هم كانوا قاسيين شديد للامم التانية . هم جوا و دمروا مملكة اسرائيل . الاشوريين قتلوا ناس كتار في مملكة اسرائيل ، شالوا اى حاجة دايرنو و حرقوا جزء كبير من البلد .
بعد داك الاشوريين جابوا اجانب عشان يعيشوا فى الارض . الأجانب جددوا بناء المدن . اتزاوجوا مع الإسرائيليين الكانوا فضلوا هناك . نسل الشعوب ديل سموهم السامريين .
الشعب فى مملكة يهوذا شافوا كيف الله عاقب شعب مملكة اسرائيل لعدم ايمانهم و طاعتهم ليهو . لكن هم لسه يعبدوا الاصنام ، بيشمل الهة الكنعانيين . الله رسل انبياء عشان يحذرهم لكن هم رفضوا يسمعوا .
بعد حوالى ١٠٠ سنة من دمار الاشوريين مملكة اسرائيل ، الله رسل نبوخذنصر، ملك البابليين عشان يهاجم مملكة يهوذا . البابلية كانت امة قوية . ملك يهوذا قبل عشان يكون خادم لنبوخذنصر و يدفع ليهو كل سنة قروش كتيرة .
لكن بعد سنين بسيطة ، ملك يهوذا اتمرد ضد بابل . عشان كده البابليين رجعوا و هجموا مملكة يهوذا ، احتلوا مدينة اورشليم ، دمروا الهيكل و شالوا كلو ممتلكات المدينة و الهيكل .
نبوخذنصر و جيشه تقريبا شالوا كل شعب مملكة يهوذا لبابل ، بس خلوا الناس الفقراء عشان يزرعوا المزارع . فترة الزمن ده لمن شعب الله اجبروهم عشان يخلوا ارض الموعد سموها المنفى .
رغم انو الله عاقب شعبه على خطيتهم عن طريق النفى ، هو ما خلاهم وما نسى وعوده .الله استمر يرعى شعبه و كلمهم من خلال انبياءه و وعد انو بعد ٧٠ سنة حيرجعوا تانى لارض الموعد .
بعد حوالى سبعين سنة ، كورش ملك فارس هزم بابل . عشان كده امبرطورية فارس حكمت شعوب كتيرة بدل امبرطورية بابل ، الاسرائيليين فى الوقت داك سموهم اليهود , كتير منهم عاشوا كل حياتهم فى بابل . بسيط من اليهود العجائز كان بتذكروا ارض يهوذا .
الفرس كانوا قويين شديد ، لكن كان عندهم رحمة على الناس النفوهم . وبعد زمن قصيرمن كورش بقى ملك على الفرس ، ادى اوامر بانو اى يهودى عايز يرجع لليهودية ممكن يخلى فارس ، كمان اداهم قروش عشان يعيدوا بناء الهيكل ! عشان كده بعد سبعين سنة فى المنفى ، مجموعة صغيرة من اليهود رجعوا من مدينة اورشليم لليهودية .
See in Reader
