bbm_reg/55-1TI.usfm

\id 1TI
\ide UTF-8
\h 1 Timoteo
\toc1 1 Timoteo
\toc2 1 Timoteo
\toc3 1ti
\mt 1 Timoteo
\c 1
\cl ESUKI 1
\p
\v 1 Polo motutiani mo Yesu Kilisito la otomo e Mwengei Mokalesi mosu Pe la Yesu Kilisito Elikia esu.
\v 2 Atie Timoteo, mana ombai omeemene ndondo e ogemei: Magba masungu, moteme magba, logoo e Mwengei Wawa pe e Yesu Kilisito Likumu lasu edjee la owe.
\p
\v 3 Ango ebalali mbai oki la Masedonia, iyowaselali otikale la Efeso, laate owahekele wadji mitindo ate watitiesakolake djeti mateya.
\v 4 Watiyahelese la masekpe ma moleho pe la matoto ma watata mango mati la kole, kasi enge ekopumbesaka ewedje la ebete okeleli otomo e Mwengei enge ekoengaka la ogemei.
\v 5 Gbondo e ma matiesakoli edjei libalano enge ekodjaka la moteme molangi, la oyewi enge elamu pe la ogemei enge edjangi moleho.
\v 6 Wadji walongoyi la ehele mboka wayahia la okpomakpomi edjangi ema.
\v 7 Wabali odjeyi watiesakoli wa pui, kasi watitenaka gbondo e sambo ndjinge ekoeneseke iwo la mohandja ate edjei meemene.
\p
\v 8 Sikala toyewi ate pui ekodjaaka olamu inga moto akelela eho la ndenge ewongi.
\v 9 La oyewi olamu ate etikelamali la wato walamu kasi la wato wadjangi omeemene, wato wa minga, wato wango wakodhendjiaka Mwengei la wato wa masumu, wato wango wadjangi motema magba pe wato wango wakodhendjaka wiho wisatu.
\v 10 Wato wa ndumba, wato wango wakolangalaka pele la pele pe wali la wali, watambi wa wato, wato wa moleho, wato wango wakolapaka la moleho pe la sambo kpaa enge ekoyamalelaka mateya mango makohaka kole.
\v 11 La obilei mboli ndamu e dombwa e Mwengei e mwemu enge wahekelali mbai.
\p
\v 12 Ikomodombwaka Yesu Kilisito Likumu lasu, ongo ohekeli mbai okulu, laate aeneli mbai meemene la ndenge ahali mbai otomo,
\v 13 te liwoso idjakali otangi pe oenesi odjidji pe idjakali moto o minga. Kaikonde wandjokelali mbai magba, laate itidjakali la oyewi pe itidjakali la ogemei.
\v 14 Kasi magba masungu e Likumu lasu etumali likolo la mbai la ogemei la libalano la ookani la Yesu Kilisito.
\p
\v 15 Li liloba lidjei meemene pe ewongi ondjimi ate Yesu Kilisito adjali la moki la okalesi wasumuki. Ndondo ewu mbai moto o liwoso.
\v 16 Kaikonde, waokelali mbai magba laate la mboka e mbai moto o liwoso, Yesu Kilisito aenesali motema molayi monde kpaa laate idje ekpangele e wango wakomogemeya inde la mokalo mo libela.
\p
\v 17 Sikalandjo, Likumu o libela, ongo okokiti oholi, ongo otieneneke, inde Mwengei mwesi, atote mogano la otwa libela la libela. Amina.
\v 18 Mana o mbai, Timoteo, ikohekeleke ehele otomo, la maokani e matiesakoli enge e oaselali, laate la mboka eho osanake kindo e molimo.
\v 19 Obanye ogemei pe mamungwene malamu, mango wadji walumbi pe ogemei wowu elindji nda andondoli.
\v 20 Imena la Aledjandela wango iwalumbi la mawo ma mondjili laate wayewe ate watimotangaka Mwengei.
\c 2
\cl ESUKI 2
\p
\v 1 Eho lenge, liwoso idjakali ohandjei ate wiyongolo, oyatati, owaongeli wadji, oho dombwa okelake eho la loyi e wato kpaa;
\v 2 la loyi e makumu pe la wango kpaa wadjei la wisuleli wisungu, laate todjake oyabati logoo pe te la ewedje la mokalo la ekaleli e nanganake la Mwengei,
\v 3 eho edjei olamu pe endjimami la maiso ma Mokalesi mosu Mwengei;
\v 4 ongo oani onde edjei ate wato wa ndenge kpaa wakale pe watote oyewi o meemene.
\v 5 Laate edjei la Mwengei sa mwesi, pe mookanesi sa mwesi ndondo e Mwengei la wato, moto mwesi Yesu Kilisito,
\v 6 ongo ayahali inde amene likawo likalesake enge eengi la wato kpaa. Eho nde loyi enge eengi ototolami la engele eho.
\v 7 Wabati mbai motiesakoli pe motutiani la ototoli eho-ikoasaka meemene, itikosaka-la otiesakoli witondo ogemei pe omeemene.
\p
\v 8 Ibali ate pele wayatatake wiholo kpaa la odjambi mawo malangi, te la limemu te la kokia.
\v 9 Ndenge kikima, ibali pe wali wawongele wenge wau la wisindje wiwongi, watietese molelo pe wadje la oyatitimisi, watinangake sue pe la wolo te la mapengo te la wisindji wa motio motetelake,
\v 10 Kasi la ndenge enge ewongi la wali wango wakoasaka ate wakomowangaka Mwengei.
\v 11 Moli ayabate bii pe ayekole oyatitimisi.
\v 12 Ibaliti atiesakole te odjei la okumu likolo la molome, kasi oyabati bii.
\v 13 Laate Adama akelamate liwoso, Eva mbuse.
\v 14 Adama atikosamate, kasi moli akosamate pe abukali pui.
\v 15 Kaikonde, wali wakobanyana la ligamesi e watake wana, inga wahelana la ogemei pe la libalano pe la osatisani mongindji la mamungwene malamu.
\c 3
\cl ESUKI 3
\p
\v 1 Lu loyi edjei meemene, inga moto abala odjei sindjili, abali otomo olamu.
\v 2 Ekoki ate sindjili adje moto ongo odjangi opundami la wato, molome o moli moikima, moto ongo otietesaka molelo la ekaleli ende, moto o mamungo malamu, moyambi wato, moto ongo ayewi matiesakoli.
\v 3 Akokiti odjei mokengi mo maana, moswi mo wato, motobi mo wato, te moto o sambo tetelake, te moto ongo obali wita, te moto ongo okobalaka wadjenge.
\v 4 Moto ongo akotiesakolaka monguta monde amene la ndenge elamu, ongo wana wande wadjei la otosi pe watitotaka sambo la odendeyi;
\v 5 meemene inga moto atiyewe osombisi monguta monde amene, nda ndenge ekoki inde osombisi molako mo Mwengei?
\v 6 Akokiti odjei moto ongo ogemei oholi, la owangi ate atitume la elolo pe atikwe la etumbu enge ekwate etota.
\v 7 Adje moto ongo wato wa saa wakomoaselaka sambo ndamu laate atikwe la soni pe la lisala e etota.
\p
\v 8 Wa diakona iwo pe wakoki odjei wato wango watitotaka sambo la mosimbo, wato wango wati la minoko miale, wango watiahe la bino, watidje wato walitema wango wakolukaka ototi asumbelia la ndenge mbe;
\v 9 Wakoyisaka liisami esatu, e ogemei la mamungwene malangi.
\v 10 Wakowamekaka liwoso la oyewi inga waengi, mbuse wadje wasali wa Mwengei, inga watipundane la loyi te liikima.
\v 11 Wali iyo pe waengi odjei wato wango watitotaka sambo nda mosimbo, wango watibukelaka wato moleho, wango watietesaka molelo la ekaleli ewu, wato wa meenene la sambo kpaa.
\v 12 Wadiakono wakoki oiki moli moikima, wato wango wakokambaka wana wawu olamu la watu wa minguta mawu la ndenge ndamu
\v 13 wango wakokelaka otomo owu la ndenge ndamu, wakototaka eholo e mogano, oasi la hoho pe la omeemene la ogemei enge wamogemei Yesu Kilisito.
\p
\v 14 Iyodhingeli dji sambo, te ndenge ekoanaka mbai odji atie owe mbuse e engele maa keke;
\v 15 kasi inga itidje sikala, laate oyewe ndenge okoki oyasombesi la munguta mo Mwengei enge edjei lingomba e mwengei o mokalo kpaa, likule aleti ema enge eheli omeemene.
\v 16 Iyowaseli te la ekosako, liyisami e wosatu enanganake la Mwengei edjei osungu: aeneneli la hoho la wenge, wamotangate moto owongi la elimo, aenanali la waahumbwa, wamotiesakolali la witondo, wamondjimelali la moki, akpalamate likolo la dombwa.
\c 4
\cl ESUKI 4
\p
\v 1 Ase elimo easi la hoho ate, engele e gboo, wadji wakodhe ogemei, la oyaheleli la easeli e milimo ma ekosako alidji la matiesakoli ma mindjili
\v 2 la ekosako e wato wango wakoasaka moleho, wango wabatani eleme nda enge e ebeha e misa la oyewi owu;
\v 3 wakotekisaka oikani, otomi wato watone olaki wilaka winge Mwengei akeli laate wato wango wadjei la ogemei pe wayewi omeemene walake eho la dombwa.
\v 4 Laate wiho kpaa winge Mwengei akeli edjei olamu, ase ema teeti ekokiti olumbami inga walaka eho la dombwa,
\v 5 laate esatisami la liloba e Mwengei pe la oyakongi enge wakeleli eho.
\v 6 Inga owaasela wa maangbasu dji sambo, okodjaa motuke molamu mo Yesu Kilisito, ongo olakesi mamungwene mande la maloba magemeyake pe la matiesakoli malamu enge ebilei owe olamu.
\v 7 Tona masekpe ma moleho e mbange wali. Alidji kela kpaa owume la ekaleli enanganake la Mwengei.
\v 8 Laate galasisi e wenge edjei olamu la maa sambo keke; ase enge enanganake la Mwengei edjei olamu la sambo kpaa, laate eho edjei la liwuna e mokalo mo keke pe la masio mageleli;
\v 9 Loyi luho edjei meemene pe ewongi ogemei eho te la oyaisi.
\v 10 Tookelaka otomo otetelake pe la oli wenge, laate tobati dombwa esu atie Mwengei mwesi o mokalo, ongo odjei mokalesi o wato wandenge kpaa.
\v 11 DJaaka ohi djinge tomani pe tiesakola eho.
\p
\v 12 Moto tueti atidendje olenge wo owe; kasi dja ekpangele atie wato wameemene la eyaseli, la esombeli, la libalano, la ogemei, la ekaleli elangi.
\v 13 Liwoso ate idje, yahekela otangi liwoso la wato kpaa, laate wato kpaa waene ate okokeeke liwoso.
\v 14 Otiene pamba likawo linge lidjei atie owe, enge ehekalami la owe la mboka e totoli pe la limbutukele e wiloko wabatali mawo likolo la owe.
\v 15 Sumbua djinge sambo, yahekele kpaa la eho, laate wato kpaa waene la hoho ate okokeeke liwoso.
\p
\v 16 Bata wokenge atie owe a mene pe la oineyi wowe; yahela la sambo djawo, laate inga okela ndjongo okoyakalesa pe okokalesa wato wango wakookaka.
\c 5
\cl ESUKI 5
\p
\v 1 Otimopamelake eloko moto la maloba matetelake, kasi yakongo la inde nda wawa, ndjenga dja pele nda wamaangwa wa pele;
\v 2 wali wiloko nda waima, wilenge wali nda wamaangwa wa moli la mamungene malangi.
\p
\v 3 Mogano la wali wango wangweli walome wango wati la moto owagamesi.
\v 4 Kasi inga moli mwesi agweli molome adja la wana, te wahahe, iwo wayekole okeleli ekaleli e nanganake la Mwengei liwosoyo la monguta mowu amene alidji wadjaake owakeleli wango wamoomusi la moki la wahahe wawu olamu enge waengi owawongoseli, laate eho endjimame la maiso ma Mwengei.
\v 5 Moli ogweli molome omeemene, edjei ongo otikali inde amene, abateli Mwengei elikya pe akoyahaka la yongolo pe la oyakongi likolo la wuse.
\v 6 Kasi moli ongo oyahi la mwemu mo wenge, agwi inga ate atoni.
\v 7 Waasela dji sambo laate watidje la obe te okikima.
\v 8 Inga moto mwesi atiwahaka wato wande, la oyeteli oliye wonde, awungani ogemei, adjei obe oeti moto ongo otigemeye.
\p
\v 9 Moli ongo ogweli molome laate adhinge kombo e inde la masia ma wango waengi owagamesi, wilanga wande witidje sese e tuku motoba, adjakali pe moli o molome sa mwesi,
\v 10 atidjaake moli mobe, inga awokolali wana olamu, inga okoyambakali wadjidji, inga akpoloki makolo ma wasatu, inga agamesali wango wadjei la otundake, inga abiliali la egalela otomo elamu kpaa.
\v 11 Kasi, longose seka djinge igweli pele laate ango ekowadjele posa ewu ewanesake wenge ekowatilesa atie Kilisito, wakoluka alidji oyiki,
\v 12 wakokuwaka laate watoni oengesi maloba mawu ma poo.
\v 13 Kasi la engele eho, watibala aladji okeli otomo, wakosomba somba sa la minguta, watikelaka kine otomo, wadjei wato wakokpomakpomaka, wakoyalingesaka la sambo dja wato, wakoaselaka sambo djinge eengiti iwo oasi.
\v 14 Eho lenge ibali ate seka wango wagweli pele waike, wawote wana, wabanye monguta laate watimohekele monguna mboka e otowaseli iso obe.
\v 15 Kaiko ase, wadji wawungi la obilei mboka e mondjili.
\p
\v 16 Inga mogemei mwesi o moli te o pele adjei la wali wagweli pele la olie wonde, inde awagamese, pe lingomba etikpale mungo mokpali. Djongo lingomba ewagamese wali wango wagweli pele wango wati la wato la owagamesi.
\p
\v 17 Dhe ate wikolo wango wosombesaka ndenge ndamu, watangame wato wawongi la mogano mbala iwale, la oeteli wango wakokelaka otomo otetelake e oasi pe e otiesakoli.
\v 18 Laate lidhingo liasi ate: Watihelaka ngombe bu e motonoko engele ekotaunaka inde pukapuka; pe alidji ate moto ongo okokelaka otomo awongi la liputa.
\p
\v 19 Otindimake loyi lungo emopundi iwo eloko, olongosi inga easama la wato waale, inga te wasato.
\v 20 Pamela la maiso ma wato kpaa wango wadjei la ekaleli ekelake lisumu.
\p
\v 21 Ikoyakongoko la owe liwoso la Mwengei, pe liwoso la Yesu Kilisito pe la wahumbwa wango waonana ate obanye dji sambo te la mamungwene mbe, ango ekokelaka owe sambo, otionoke mbanda e moto.
\p
\v 22 Otimobatelake moto mawo obangu obangu, otiyaboliake pe la masumu ma wato, langa masio kpaa.
\v 23 Otikengake sa malia, kenga pe ma bino la kole e likundu la owe pe la wikoni wingo wikookelaka.
\v 24 Masumu ma weeti wato ekoeneneke la hoho, ekokpalaka mbala kikima la masambi, kaiko masumu ma weeti wato ekodjaka oeneni mbuse la hoho.
\v 25 Ndenge kikima, sambo ndamu ikoeneneke la hoho, koto djinge iti ndamu itdhihanaka.
\c 6
\cl ESUKI 6
\p
\v 1 Wango kpaa wadjei mituke, adhendele makumu mawu laate waengi la mogano, laate kombo e Mwengei la matiesakoli mande matitonane.
\p
\v 2 Alidji, wango wadjei la wiloko wango wadjei wagemei watiwadendjiake, la ndenge edjei iwo wamaangbasu; kaiko wawakelele alidji olamu oeti, laate wango wakototaka kole la otomo owu e olamu wadjei wagemei pe wamaangbasu wa libalano. Tiesakola djinge sambo pe la ohekeli djinge egalela.
\p
\v 3 Inga moto akotiesakalaka djeti matiesakoli pe atindjimaka maloba mango makohaka kole, enge e Likumu lasu Yesu Kilisito, pe litiesakoli linge liokani la ekaleli e nanganake la Mwengei,
\v 4 Akundji la elolo, ayewiti ema, adjei la ekoni la moto, la obatani kokia pe la osuameli maloba; djinge sambo ekopumbesaka mohela, oswi, maloba ma iliko, obundoli weeti obe.
\v 5 Owumesani maloba obe la sambo pamba e wato wango wabiti mamungo pe wati la omeemene, wango wakobundwaka ate onangani la Mwengei edjei mboka etotake kole. Yakatola la ndenge eenge wato.
\p
\v 6 Ekaleli enge enanganake la Mwengei la ekaleli e oemeli la enge edjei owe la eho edjei mboka etotake kole e sungu.
\v 7 Laate totidjaali la ema la moki, pe totike la ema.
\v 8 Eho lenge inga todja la ilaka la wisindje, toemele la wiho waho.
\v 9 Wango wakobalaka wawume wagumake, wakokwaka la omekani, la lisala pe la posa ngbii e ekete pe enge ekookesaka ekoni, enge ekolindjisaka wato la obitani pe la libhoma.
\v 10 Laate libalano e wambele edjei ndjili e sambo mbe e ndenge kpaa, pe nda wadji wabekesi libalano laho wawusiga mboka pe wayalumbia iwomene la odjidji.
\p
\v 11 La owe, moto o Mwengei, tila djinge sambo, tutia olamu, ekaleli eyahelake la liloba, ogemei, libalano, odjéi la egalala, odjei logoo.
\v 12 Sana kindo elamu e ogemei; hela mokalo mo libela enge woowelelali owe pe ondjimaali la hoho lihoso la watotoli ngbii.
\p
\v 13 Liwoso la Mwengei, ongo okohaka mokalo la wiho kpaa, liwoso la Yesu kilisito, mototoli ongo oasali la hoho liwoso la Poso Pilato, ikootomaka,
\v 14 ate otemeye pui wuho e olangi alidji otipundane la loyi tee la oeneneni e Likumu lasu Yesu Kilisito.
\v 15 Oeneni woho, Likumu sa mwesi e mwemu akoinya la engele eho enge ebatana; inde Memene e wamemene, Likumu e makumu,
\v 16 ndji inde amene ongo oengiti ogwi, akoyabataka la hoho enge moto tueti akokiti omoeni; Atote mogano la okulu wo libela. Amina.
\p
\v 17 Waasela wagumake e ma masio watidje la elolo, alidji watibate mamungwene mawu la ogumake enge ekoki owungi keke te leekundu, kasi atie Mwengei, ongo okotohaka iso wiho kpaa sa bingo laate iso toemele.
\v 18 Wakele sambo ndamu, wadje wagumake e sambo ndamu, wadjake mawo petee, wato wayewi okawi;
\v 19 Wakoyaisela wiho wa motio la masio mageleli enge eyabati la esuleli elamu enge emayi iwo laate wahele mokalo mo libela.
\p
\v 20 Ee Timoteo, bania ema enge eisami atie owe, tona okpomakpomi pamba enge ekobitesaka sambo djinge edjei osatu pe maloba ma kokia e yewake moleho;
\v 21 nda wadji waenesali la elolo ate wadjei la oyewi ehonde wadhei ogemei.