raglay_2021_rgs_rlt_rom_book/rom/9.json

{
  "1": "Hlãq đơp viãq dơlãp Pitao Krist, hlãq ôh đơp lor, Hatai tơnĩa hlãq ngãq chưng ga hlãq mưng Yàc Vơngãq sơđah laìq;. ",
  "2": "Hlãq ka-ùq ka-ãn viãq, hatai hlãq pơđìq pơđua bôh vơdơh. ",
  "3": "Mưng hlãq chơkhãq khiãng mơyah-laìq rùpphuôt hlãq kađòc sơtãp-lơmah, tơviãq tlah mưng Pitao Krist, cơyua mưng adơi sơai gơuq pơtiàt hlãq tui rlo-rồp. ",
  "4": "Nữn la Vual-vơla Is-ra-el. La vual-vơla hũ grơhiã la anàq, kaya gơhluh, dơgrữq pơnuaĩq hẽ sigơuq, kaya voh-va, kaya duh tơlơvàt sì dơgrữq pơnuaĩq hẽ vơguãt. ",
  "5": "La vual-vơla hũ pơjơc mưng dơgrữq ung-kõq, sì tui vơnah rồp-rlo, mưng Vual-vơla nữn vơjơc Pitao Krist, nữn la Pitao pãq dlòc avih dơgrữq kaya, nữn la Yàc Pô Lơngĩq iơuq sơuôt mơyòp gãm gãm. A-men.",
  "6": "Nữn ôh iơuq pơnuaĩq Yàc Pô Lơngĩq la ôh kwơ ôh. mưng dơgrữq mơnuĩh tơviãq mưng Is-ra-el ôh iơuq avih dơgrữq mơnuĩh nữn la mơnuĩh Is-ra-el ôh, ",
  "7": "Kung ôh iơuq mưng pơnõq nhũ la pơjẽh pơtiàt Abra-ham nữn avih dơgrữq pơnõq nhũ la anàq tacho nhũ ôh. Mưng song wãq laìq; nữn la mưng I-sac nữn nhũ ròq hũ sa pơjẽh pơtiàt hũ angãn tui angãn nhũ. ",
  "8": "Pơnuaĩq gơtha kaya nữn la ôh iơuq la anàq tacho gah rlo-rồp la anàq tacho Yàc Pô Lơngĩq, yơu nữn anàq tacho gah pơnuaĩq hẽ pơguãt nữn hũ grơhiã la pơjẽh pơtiàt Abra-ham. ",
  "9": "Mưng nĩ la pơnuaĩq grữh laìq: Kung iơuq di harơi nĩ kơu ròq mai wơq, Sa-ra ròq hũ sa aràc anàq lakơi. ",
  "10": "Ôh iơuq mĩn yơu nữn soh ôh, yơu nữn dơlãp tũq Re-be-ka, tũq nhũ mưng ung-kõq pơnõq drơi la I-sac nữn jơc mơtiàt, ",
  "11": "Mưng, tũq dua aràc anàq ka-ôh đeh tơviãq, pơnõq nhũ ka-ôh thơu ngãq kaya siàp hela kaya mơsãc, tồq kaya ngãq gơnĩt Yàc Pô Lơngĩq tui kaya duãt rơwah dòq gãm, ôh iơuq mưng vuãq ngãq, yơu nữn tui Pitao duãt rơwah. ",
  "12": "Nữn hũ pơnuaĩq đơp sì Re-be-ka laìq: Mơnuĩh sơai ròq duh vruãq ga mơnuĩh adơi, ",
  "13": "Yơu hũ wãq laìq: Kơu khiãng-anĩt Ja-kôp nữn mvai lơmùq E-sau.",
  "14": "Yơu nữn, yơu hayơu pơnõq drơi ròq ưng đơp lơiq? Hũ kaya ôh tơpãq dãng dơlãp Yàc Pô Lơngĩq yơh? Ôh iơuq yơu nữn ôh. ",
  "15": "Mưng Pitrai song đơp sì Môi-se laìq: Kơu ròq khiãng-anĩt ga mơnuĩh kơu khiãng-anĩt, kơu ròq anĩt anar ga mơnuĩh kơu anĩt anar. ",
  "16": "Yơu nữn, kaya nữn ôh iơuq mưng mơnuĩh halơi ưng hela mơnuĩh halơi duah tui hũ jơc ôh, yơu nữn la mưng Yàc Pô Lơngĩq khiãng-anĩt. ",
  "17": "Dơlãp Sơrãq sơđah song đơp sì Pha-ra-ôn laìq: Kơu song pồq pơdỡc hã pioh akhàt tơviãq nĩq-nũn kaya ganuar-chơnuãq kơu dơlãp hã, tồq angãn kơu hũ pơto akhàt vãq avih hlồq. ",
  "18": "Yơu nữn, Pitrai hũ hatai khiãng-anĩt ga mơnuĩh halơi nữn khiãng-anĩt, ưng ngãq khãc hatai ga mơnuĩh halơi, nữn ngãq yơu nữn. ",
  "19": "Yơu nữn, hã ròq tơnĩa kơu laìq: Kayua hagĩq Pitrai dòq chõc dlaìq lơiq? Mưng hũ mơnuĩh halơi rgơi jơdrãq sì hatai khiãng Pitrai lơiq? ",
  "20": "Yơu nữn, ơ mơnuĩh dih, hã la asơi nữn khin kamlah wơq sì Yàc Pô Lơngĩq lơiq? Kaya song chơpãq jơc rgơi đơp sì mơnuĩh chơpãq jơc laìq: Cơyua hagĩq hã chơpãq jơc kơu yơu nĩ? Mĩn yơh? ",
  "21": "Mơnuĩh chơpãq hlồq ôh iơuq hũ ganuar pãq dlòc hlồq ka-liãq, mưng dơlãp sa khũc-hlồq ngãq jơc kadoh pioh angui dơlãp vruãq kwơ màc, sì kơdoh tơmo angui dơlãp vruãq ôh kwơ ô yơh? ",
  "22": "Mơyah-laìq Yàc Pô Lơngĩq ưng akhàt tơviãq kaya anõc mvai sì ngãq ga thơu ganuar-chơnuãq pitrai, sì mãq hatai ãt-ơn prong sì ãt dơgrữq kadoh iơuq mvai rchãc lơih ga kaya lơhiãq thit. ",
  "23": "Pitrai kung ưng akhàt tơviãq kaya mơda-ganãp kaya gahluh Pitrai pơweh sì dơgrữq kalõq iơuq khiãng-anĩt sì Pitrai song rchãc hlơu ga kaya gahluh, ",
  "24": "Dơgrữq kalõq nữn la pơnõq drơi, la mơnuĩh Pitrai song duãt rơwah, ôh iơuq mưng mĩn dơgrữq mơnuĩh Ju-đa soh ôh, yơu nữn kung mưng dơlãp vual-vơla lơniao mĩn, ",
  "25": "Yơu Pitrai song đơp dơlãp s'rãq Ô-se laìq: Kơu ròq angãn mơnuĩh ôh iơuq vual-vơla kơu la vual-vơla kơu hũ, mơnuĩh ôh hũ khiãng-anĩt la mơnuĩh khiãng-anĩt. ",
  "26": "Pãq anĩh song đơp sì pơnõq nhũ laìq: Pơnõq hã ôh iơuq la vual-vơla kơu ôh, kung pãq anĩh nữn, pơnõq nhũ ròq hũ angãn la anàq Yàc Pô Lơngĩq dòq hadiuq gãm. ",
  "27": "Dòq E-sai đơp mưng vual-vơla Is-ra-el sì priao sãp prõc laìq; bôh-laìq katih anàq tacho Is-ra-el yơu choah pãq tơsìq, nữn mĩn sa vơnah dòq wơq ròq hũ dõc vơtlah. ",
  "28": "Mưng Yàc ròq ngãq tơviãq jơc pasơmũ yơu pơnuaĩq Pitrai savĩq wil tãl si sơmar hũ pãq dlòc tơnãh hlồq. ",
  "29": "Wơq kung yơu E-sai song đơp hlơu laìq: Mơyah-laìq Yàc tơpuôl ling ôh luơi wơq asar pơjẽh ga pơnõq drơi, nữn pơnõq drơi song tơviãq jơc yơu pơlơi Sô-đôm sì grữh pơlơi Gô-mô-rơ mĩn.",
  "30": "Yơu nữn, yơu hayơu pơnõq drơi ưng đơp lơiq? Dơgrữq vual-vơla lơniao ôh duah tui kaya tơpãq dãng, yơu nữn song hũ kaya tơpãq dãng, nữn la kaya tơpãq dãng tơviãq mưng voh-tui. ",
  "31": "Yơu nữn, vual-vơla Is-ra-el duah tui voh-va kaya tơpãq dãng, yơu nữn ôh trôh pãq kaya voh-va nữn. ",
  "32": "Cơyua hagĩq? Kayua mưng pơnõq nhũ ôh iơuq tui gơnang di voh-tui sì tui gơnang, yơu nữn ganang mưng vruãq ngãq, Pơnõq nhũ song lơvuh trôt di pơtơu gòq tơkai, ",
  "33": "Yơu song wãq laìq: Nĩ, kơu luơi pãq Si-ôn sa pơtơu gòq tơkai, la sa pơtơu ngãq sơnẽq sỗq. Mơnuĩh pãc tui pơtơu nữn ròq ôh mơlơu alah."
}