raglay_2021_rgs_rlt_jas_book/jas/1.json

{
  "1": "Ja-kơ, halỗt mơnãq Yàc Pô Lơngĩq hũ sì Yàc Dõc Pơtlah Je-su hũ, pơyua ga sa plôh dua apỗc pơtiàt dòq hadiuq chơlah chaluỡn: Lakơu chuãq rơwãc pơnõq adơi sơai dơlãp sơh sơr!",
  "2": "Pathơu pơnõq adơi sơai hlãq hũ, dơlãp tũq pơnõq adơi sơai tơmã dơlãp avih tãl kaya lòc , nữn iỡuq iãq mững nữn la kaya wil tãl. ",
  "3": "Kơyua thơu làiq kaya lòc voh-tui pơnõq adơi sơai  tơviãq jỡc kaya rgơi thơu ãt-ỡl. ",
  "4": "Nữn, kaya rgơi thơu ãt ỡl iỡuq ngãq wil tãl vruãq nhũ, pioh ga pơnõq adơi sơai hũ pơlih hũ haduc hlàq drơi hũ sì ngãq wil tãl, ôh siẽuq kaya halơi. ",
  "5": "Dòq mơyah làiq aràc asơi dơlãp pơnõq adơi saai siỡuq kaya jãc rgơi, mơnuĩh nữn iỡuq rãn lakơu mưng Yàc Pô lơngĩq, la Pitao vrơi kaya anĩt lanơng lơnai ga dơgrữq mơnuĩh lakơu nữn ôh gơloh pơkhè, nữn kaya jãc rgơi ròq vrơi ga mơnuĩh nữn. ",
  "6": "Nữn mơnuĩh nữn iỡuq rãn lakơu dơlãp voh-tui, ôh dỡq dỡng hagĩq. Kơyua mơnuĩh dỡq dỡng drưh yơu ia tơsìq, kađòc poh ryàq nao  mai tui yua angĩn vluh sì sỡm-nãiq tơgùq. ",
  "7": "Mơnuĩh yơu nữn juơi chơkhãq chàc laìq drơi ròq tồq mãq hũ hagĩq mưng Yàc. ",
  "8": "Nữn la mơnuĩh lơđãp dỡq dỡng, ôh gơjãp gơnĩt dơlãp dơgrữq jơlàt athua drơi. ",
  "9": "Pơnõq adơi sơai dòq dơlãp kaya sieũq rơbah iỡuq yeh drơi mưng anĩh dòq mơàc mơyàc drơi hũ, ",
  "10": "dòq pơnõq adơi sơai mơda gơnãp iỡuq yeh drơi mưng anĩh dòq ôh jỡc ôh chãq drơi hũ, kơyua mơnuĩh nữn ròq gãt tơpà vloh yơu vơngà pãq blàc rỡq. ",
  "11": "Ia harơi tơviãq tơgùq gãm sì kaya tluỡiq gơhuar chôh sì ngãq thô krò tơhiũ rỡq kayơu. vơngà nhũ thô jơrũh, kaya siàp makrờ nhũ tơal rơai. Kung yơu nữn, mơnuĩh mơda gơnãp kung ròq ãt thô thiãq dơlãp rài hadiuq nhũ. ",
  "12": "Lơngai ga mơnuĩh ãt lòc dleh dlàr, kơyua hadơi sì tũq song nao gãt kaya lòc vloh pơnõq nhũ ròq tũq mãq chrang mữh kaya hadiuq hũ grưh vrơi ga dơgrữq mơnuĩh khiãng duman Yàc Pô Lơngĩq. ",
  "13": "Tũq kađòc kaya aniãi, juơi hũ asơi đơp: \"Hlãq kađòc Yàc Pô Lơngĩq ngãq aniãi\", kơyua Yàc Pô Lơngĩq ôh kađòc kaya mơsãc ngãq aniãi, rùp phuỗt Pitrai kung ôh ngãq aniãi asơi. ",
  "14": "Nữn dơgrữq tãl aràc kađòc ơniãi kơyua mưng kaya hãm khiãng rùp phuỗt drơi hũ, la kaya mĩn dui-va pơnõq nhũ sì pa-gơla paluơ pơnõq nhũ. ",
  "15": "Hadơi sì tũq kaya hãm khiãng nữn ãt va, nhũ pajỡc tơviãq dlàiq dơnũh, sì hadơi sì tũq dlàiq dơnũh wil tãl, nhũ pajỡc tơviãq kaya mơtai. ",
  "16": "Pathơu pơnõq adơi sơai anĩt anar hlãq hũ, juơi luơi drơi kađòc pa-gơla. ",
  "17": "Dơgrữq kaya alĩn siàp mơkrờ sì dơgrữq kaya alĩn vrơi wil tãl kung la mưng dlòc dloòng. La kaya trôh mưng Ama kaya sơdah hũ. Pơweh sì Pitrai nữn ôh hũ vruãq ngãq pađuỡt hẽla sẽq vơngãq kaya pa-sơdua hũ. ",
  "18": "Yàc Pô Lơngĩq duỡt ruãh pajỡc pơnõq drơi tơviãq mưng pơnuaĩq tơpãq hũ, pioh pơnõq drơi ròq la sa voh akõq thũt dơgrữq kaya Pitrai chrơng pajỡc hũ. ",
  "19": "Pathơu pơnõq adơi sơai anĩt anar, pơnõq adơi sơai thơu pơnuaĩq nĩ: Asơi kung iỡuq sơmar hmỡq, rơlẽq đơp sì ôh drah nõng. ",
  "20": "Kơyua kaya nõng anàq hũ mơnuĩh ôh ngãq jỡc kaya tơpãq dãng Yàc Pô Lơngĩq hũ. ",
  "21": "Kơyua yơu nữn, iỡuq wàq prah avih dơgrữq kaya tơsỡuq nrãc vrũq lơmuĩq sigỡuq sì dơgrữq kaya iãh sàq vãq srè. Iỡuq mãq hatai vơviar rùp tồq mãq pơnuaĩq song dràq pơla, la pơnuaĩq pơlih dõc pơtlah vơngãq yuà pơnõq adơi sơai. ",
  "22": "Iỡuq la mơnuĩh ngãq tui pơnuaĩq, juơi mĩn la mơnuĩh hmỡq nữn pa-gơla pơgàt drơi. ",
  "23": "Kơyua mơyah-làiq mơnuĩh halơi la mơnuĩh hmỡq pơnuaĩq sì ôh iỡuq la mơnuĩh ngãq tui nữn drưh yơu sa aràc mơnuĩh wãq dơlãp rùp pơsàc iãq bòq mơta vơhiãn drơi hũ dơlãp krơh. ",
  "24": "Mơnuĩh nữn mững drơi dơlãp krơh viãq nĩq nũn vloh tlàq nao sì wơr dlai mư bòq mơta drơi la yơu halơi. ",
  "25": "Nữn mơnuĩh gơrhia iãq pơwih iãq voh-va wil tãl kaya lơnơng lơnai hũ, sì miẽt patui wỡq ngãq yơu nữn, ôh iỡuq mĩn hmỡq vloh wơr thĩt, nữn la mơnuĩh ngãq tui pơnuaĩq, nữn mơnuĩh nữn ròq hũ lơngai dơlãp dơgrữq vruãq ngãq drơi hũ. ",
  "26": "Mơyah làiq hũ asơi sơnỡng drơi hũ tui jơlàt kakôh tơlơvãt, nữn ôh iãq gơrhia dơlah drơi, vloh dòq pa-gơla pơgàt hatai drơi, nữn vruãq pãc tui jơlàt kakôh talơvãt mơnuĩh nữn la ôh kuơ hagĩq.",
  "27": "Hadiuq tui jơlàt kakôh talơvãt ngãq sơchih sì sơđah sơchih pãq anãq Yàc Pô Lơngĩq, la Ama pơnõq drơi la dõc mơnuĩh ôh hũ ama, mơnuĩh kamơi vlơu lakơi mơtai dơlãp kaya rũc rài pơnõq nhũ hũ, sì rơmiãq ga drơi ôh kađòc dun kơyua ngãq tơsỡuq nrãc. "
}