cor_2020_cua_clt_rom_book/rom/9.json

{
  "1": "Gô đnooy varơuq dik đom Lôôk Wơt Dêh. Gô leh đnooy pa-ôôh - xuum klaak gô dơơp xanưk ka gô đom Lôôk Phool Hiel,",
  "2": "đaneq đôôiq dii gô, e varơuq hlu rơu kôt ji jiq areh leh hlơơp đom xuum gô.",
  "3": "Bơyh gô 'miêh trôôch kajoq kadih gô biq kroay axaap, aklah vlôh klơlh Lôôk Wơt Dêh vii kơq oh ay gô, laa khơl adro takuul takiel ku gô tyauq phoon xak;",
  "4": "kadih oot laa tamooi I-sơ-ra-êl, đơu kaluh varơuq thuôk ku oot laa yal tayh koot văch, tađnah tađnaak, kaluh apok taveek, varơuq kahniq ăm ganuun, varơuq ayuuôt laat, ji kaluh apok taveek;",
  "5": "oot vlôh xing khơl mo kơy, ji Lôôk Wơt Dêh vlôh xing oot - ( nưq laa tyauq phoon xak ) - Kadraq laa Kơy galơh iaq dêq hloay, nưq laa Kơy Plêêk đanq jah vanê ayuuôt dong truh đơơy đơơy. A-meen.",
  "6": "Bơh leh e ka varơuq apok ku Kơy Plêêk heq hlơơp paq ik duh. Vii be aalq dêq hloay khơl leq vlôh xing I-sơ-ra-êl, yôôych nưq laa manih I-sơ-ra-êl.",
  "7": "Kung be aalq dêq hloay koot xaau laa adrơơk ku Aap-ra-haam. Bơh laa, \" Bơyh I-saak, adrơơk ku koot hnoq jah tayh ơnơng.\"",
  "8": "Iq laa koot xaau tyauq xăk xamơk, khơl adro nưq leh aalq laa khơl koot ku Kơy Plêêk. Wih hlê, koot xaau ku apok taveek yôôych jah 'yo đaji koot xaau.",
  "9": "Vii neq laa apok taveek:\" Muut kawat neq, Gô hnoq truh, ji hnoq e muuyq koot kanơu jeen ka Sa-ra.\"",
  "10": "Bơh leh vơơ đanưq, đơu Rê-bê-ka kung anưq tuôôy e bonq xing muuyq dro, laa I-saak, mo kơy ku haay - ",
  "11": "vii đom tuôôy koot koq jah pa iir vlôh, kung koq dơơp varơuq kaxaay long varơuq xơk leq, xôq ka iq đinq ku Kơy Plêêk tyauq varơuq rơơlh xok ku Kadraq hnoq ik jưư kajưk,",
  "12": "Leh aalq xing varơuq dơơp, bơh laa xing Kơy tayh tawoyh - varơuq heq jah ăm mo jah xet, nưq laa:\" Dro kôt hnoq dơơp xapok ka dro de,\"",
  "13": "Dang đaji varơuq heq jah vlơk: \" Gô xiaq Ja-kôôp, bơh Gô 'yarơ Ê-Saau.\"",
  "14": "Anưq, haay hnoq đnooy luleq? Dang aleq e varơuq be hyioh jăk aduq Kơy Plêêk ih? Varơuq nưq leh xlih vlôh ik.",
  "15": "Vii Kadraq xanoh dii Môôi-se đaneq: \"Gô hnoq kahnoq xuum biit angơuq dii paq kê kơyq đơu Gô trôôch kahnoq xuum biit angơuq, ji Gô hnoq biit angơuq paq kê kơyq đơu Gô xung biit angơuq.\" ",
  "16": "Lunưq be aalq xing adro leq ưnq trôôch, kung leh aalq kơq dro leq chrơơk đneen chrơơk kahơ, bơh laa jo xing Kơy Plêêk, Kơy kahnoq xuum biit angơuq.",
  "17": "Vii Rahlăăp Vah đnooy truh Pha-ra-ôôn đaneq:\" Vii jơq iq đinq neq Gô heq panưk xăk tok, xôq ahlê xăk Gô hnoq ik ăm hloq daa uuh ku Gô, ji xôq dơơp aleq ka yal Gô hnoq ik padooh pahêêl loch tol vari.\"",
  "18": "Lunưq, Kadraq kahnoq xuum biit angơuq đôôiq dii dro leq Kadraq trôôch, bơh Kadraq dơơp găk xuum dro leq Kadraq trôôch.",
  "19": "Anưq yôôych oh ay hnoq đnooy gô:\" Anưq, aleq Kadraq măn rôôp kadrôp? Vii kơyq tachơơl hlê iq ku Kadraq ik?\"",
  "20": "Nee dro hơq, bơh dong dik yôôych ay laa kơyq đơu hôôk tơơl tagêh hlê Kơy Plêêk? Dang aleq kua jah dơơp vlôh hnoq đnooy dii dro heq dơơp vlôh ni:\" Aleq kơy heq dơơp vlôh gô tyauq luneq\" ih?",
  "21": "Long laa manih thơq hu vari be e qwuyen tol vari dik, xôq dơơp vlôh muuyq vlong đôô xing kung muuyq đôônq vari, tabơh ưnq neq jeen ka varơuq kôt lơyq, bơh ưnq hơq jeen ka varơuq leh kôt lơyq?",
  "22": "Măn atoh Kơy Plêêk, vii trôôch ăm hloq đơơt tôq dayh ku Kadraq ji kahnoq vlôh taay yaak ku Kadraq, heq chiuq atuq đom varơuq atuq xuum thier raa kôt đôôiq dii kaluh vlong đôô jeen ka đơơt tôq dayh, heq jah xôq 'miêh ka varơuq kaxêêt hlơơp;",
  "23": "ji xôq Kadraq hnoq ik kahnoq vlôh varơuq kroh e ku tađnah tađnaak Kadraq tol kaluh vlong đôô jeen ka varơuq biit angơuq đơu Kadraq heq xôq 'miêh ka varơuq tađnah tađnaak - ",
  "24": "hloay ka haay laa khơl adro đơu Kadraq heq tayh tawoyh, leh vơơ xing manh JoThaiq, đơu măn xing kaluh tamooi daak kadrơơy, yôôych aleq?",
  "25": "Đaji Kadraq kung xanoh đom rahlăăp Ô-Sê, đaneq: \" Gô hnoq tayh xăk leh aalq tamooi Gô, laa ' tamooi Gô', ji adro be jah xiaq laa' adro xung xiaq'.",
  "26": "Ji ka varơuq hnoq e ka aduq đơu apok heq jah xanoh ka oot, đaneq: ' Êêp be aalq tamooi Gô' , yôôych jơq aduq nưq, oot hnoq jah tayh laa ' khơl koot kanơu ku Kơy Plêêk hloay riilh.\"'",
  "27": "Bơh Ê-saai vreoq tok truh tamooi I-sơ-ra-êl, đaneq: \"Long sôôq koot xaau ku tamooi I-sơ-ra-êl hnoq laa đaji choah tahlii, bơh vơơ muuyq phoon măn soot hlê hnoq jah wơơt,",
  "28": "Vii Lôôk hnoq dưk dơơp apok Kadraq tol vari, payôôych ji dayh talang.\"",
  "29": "Ji đaji Ê-saai heq đnooy adroyq:\" Atoh Lôôk ku kaluh waan kuun heq leh xôq hlê ka haay muuyq koot xaau, yôôych heq đol haay heq biq vlôh jêêk đaji theng Sô-đôm, ji kajưk laa heq biq dơơp ăm dang đaji theng Gô-mô-rơ.\"",
  "30": "Anưq, haay hnoq đnooy luleq? Nưq laa kaluh tamooi daak kadrơơy, nưq laa khơl adro leh hooy tyauq varơuq hyioh jăk, yôôych heq jah ik varơuq hyioh jăk, bơh varơuq hyioh jăk nưq xing xuum tuuôq.",
  "31": "Măn manih I-sơ-ra-êl, tuôôy hooy tyauq ganuun ku varơuq hyioh jăk, yôôych heq leh vrơyh truh ganuun nưq.",
  "32": "Vii kakơq kajoq? Nưq laa vii leh gamưh xuum tuuôq, bơh đaji gamưh varơuq dơơp. Oot heq xatôôlh jôôk muut kuuk phơu ku varơuq klơl jưư,",
  "33": "đaji e vlơk đaneq: \" Dayh 'yo nee, Gô xôq aduq Si-ôn muuyq kuuk phơu ku varơuq klơl jưư ji talaat phơu ku varơuq gưưlh lôôp, dro leq tuuôq aduq phơu nưq hnoq leh biq kamưưl.\""
}