cor_2020_cua_clt_rom_book/rom/11.json

{
  "1": "Anưq ăm gô vôôch: Dang aleq Kơy Plêêk heq ka'lăăk vlôh tamooi Kadraq? Varơuq nưq leh xlih vlôh ik. Vii kadih gô kung laa muuyq dro I-sơ-ra-êl, xing adơơk Aap-ra-haam, thuôk adrơơk tamooi Bêên-ja-min.",
  "2": "Kơy Plêêk heq leh ka'lăk tamooi Kadraq, laa tamooi Kadraq heq xet adroyq. Long oh ay leh xet Rahlăăp Vah đnooy kajoq truh Ê-lii, tuôôy kơy apôôy dii Kơy Plêêk tachơơl hlê tamooi I-sơ-ra-êl?",
  "3": "“Kuh Lôôk, oot heq păk kaxêêt khơl hnhư hlit Kadraq, oot heq pahrưp ka'lăk paraa hơu Kadraq, kung vơơ muuyq dro koot măn jah riilh, ji oot kung đong hooy axek păk kaxêêt koot.”\n\n\\ts\\*",
  "4": "Bơh Kơy Plêêk heq tơơl apok xanoh kung kơy laa kajoq? “Gô heq xôq jeng ka Gô pơơh ravơu khơl kanơu, laa khơl manih heq be kuul takuul kangưưr Ba-aanh.”",
  "5": "Anưq kung tyauq trôôk nưq đom kawah juneq, kaleq nưq măn muuyq phoon sook hlê tyauq varơuq rơơlh xok ku vanong kaxaay.\n\n\\ts\\*",
  "6": "Bơh atoh bơyh vanong kaxaay, yôôych be aalq bơyh varơuq dơơp đnoyq. Atoh leh, vanong kaxaay paq măn laa vanong kaxaay. \\f +\\ft Muuyq sôôq rahlăăp hnu athêêp: \\fqa Bơh atoh 'ngưq laa bơyh varơuq dơơp, yôôych paq măn laa vanong kaxaay đnoyq; atoh leh, varơuq dơơp paq măn laa varơuq dơơp \\fqa*. \\f*",
  "7": "Nưq laa đaleq? Varơuq đơu manih I-sơ-ra-el axek akhiim, yôôych tamooi nưq heq leh vrơyh jah ni, đơu dro leq jah rơơlh yôôych vrơyh jah, bơh sôôq măn hlê heq biq găk xuum.",
  "8": "đaji varơuq heq jah vlơk, đaneq: “Kơy Plêêk heq kahniq ka oot danưng koy kamưng jaluk, mot be hloq, tôôr be tameen, ăm truh hloay hngơy neen.”\n\n\\ts\\*",
  "9": "Ji Đa-vik yôôych đnooy: \\q  “Dayh xôq paraa ku oot yuuôl jêêk lươyq, xađook, \\q kuk phơu xatôôl jôôk ji varơuq blaa dook jeen ka oot.\n\\q",
  "10": "Dayh xôq mot oot bi apuul jaluk xôq be hloq, \n\\q\nji dayh dơơp krok oot kưq biq kadôônq hloay.”\n\n\\ts\\*\n\\p",
  "11": "Anưq, ăm gô vôôch: “E jơq oot heq xatôôl gưưlh xôq yôôych gưưlh riêp?\" Varơuq nưq leh xlih vlôh ik. Tađôôi muut đnư, bơyh varơuq  lôôp kadrôôp ku oot, varơuq wơơt blaa truh dii tamooi kadrơơy, xôq dơơp ka oot 'yara jaraq.",
  "12": "Mot kadrơơy, atoh varơuq lôôp kadrôp ku oot jarooy truh varơuq kroh e ku dêh araak, ji varơuq tayuuh dêq ku oot jarooy truh varơuq kroh e ku kaluh daak kadrơơy, yôôych varơuq xleep ku oot hnoq kơơn kroh e rah 'ngưưng iaq xet dong leq?\n\n\\ts\\*",
  "13": "Măn juneq, ăm gô đnooy dii oh ay laa kaluh tamooi daak kadrơơy. Anưq, kơơn bơyh vii kadih gô laa khơl jah rơơlh ka kaluh tamooi daak kadrơơy, gô xok dơơp hlah hlaak truh varơuq dơơp ku gô,",
  "14": "xôq long bơơn trôôk leq nưq, gô hnoq ik dơơp ka kaluh tamooi tyauq phon xaak ku gô 'yarơ jaraq ji hnoq ik wơơt ik muuyq sôôq dro xing aduq oot.\n\\ts\\*",
  "15": "Vii atoh varơuq biq ka'lăk vlôh ku oot jarooy truh varơuq tagu hlê ku dêh araak, yôôych varơuq oot'yo nhonq hnoq đaleq atoh leh aalq laa varơuq riilh vlôh xing aduq kaxêêt?",
  "16": "Mot kadrơơy, atoh phoon bôôt droyq dik laa vah, yôôych dêq đôônq bôôt nưq kung đanưq. Ji atoh rayah laa vah, yôôych kaluh đook kung anưq.\n\n\\ts\\*",
  "17": "Bơh atoh muuyq sôôq đook heq biq gôh hlơơp, măn oh ay, tuôôy laa đook ô-liiu gôk, heq jah tabôôk muut đom aduq oot, ji heq vlôh jêêk khơl adro kung jah nhonq jol riilh glơh glaay xing rayah ku ưưk ô-liiu nưq,",
  "18": "yôôych te liq akwoe haay glơh iaq kaluh đook kadrơơy. Bơh long oh ay akwoe akwoak, yôôych văch đaneq leh aalq kadih oh ay chiuq \nvăch rayah ưưk, đơu laa rayah ưưk chiuq văch oh ay.\n\\ts\\*",
  "19": "Anưq yôôych, oh ay hnoq đnooy:\" Kaluh đook nưq heq biq gôh ka'lăăk, xôq kadih gô hnoq ik tabôôk muut.\"",
  "20": "Jơq anưq! Oot heq biq gôh ka'lăk vii varơuq leh tuuôq, măn kadih oh ay yôôych dưk kajưk gamưh xuum tuuôq. Tee biit truh kaluh xuum biit atok xăk, đơu dayh xet yôq!",
  "21": "Vii atoh Kơy Plêêk heq leh alaay kaluh đook tyauq trôôk e 'miêh hơq, Kadraq kung hnoq be alaay oh ay.\n\n\\ts\\*",
  "22": "Anưq, dayh 'yo xet xuum biit angơuq ji varơuq ngiim khăk ku Kơy Plêêk: tyauq varơuq ngiim khăk đôôiq dii khơl adro heq gưưlh talaalh, bơh xuum biit angơuq ku Kơy Plêêk jeen ka oh ay, atoh oh ay kưq măn đom varơuq biit angơuq Kadraq. Bơơn leh, kadih oh ay kung hnoq biq goch ka'lăăk.\n\\ts\\*",
  "23": "Măn khơl adro hơq kung anưq, atoh oot leh miek ratuôôt đom varơuq leh tuuôq, yôôych oot hnoq jah tabôôk muut. Bơyh Kơy Plêêk e daa-uuh xôq tabôôk oot muut hlê.",
  "24": "Vii atoh oh ay heq biq kơơl klơlh muuyq ưưk ôôlh tyauq ưưk laa ưưk ô-liiu gôk, ji heq jah tabôôk đêh dii trôôk e 'miêh muut ưưk ô-liiu kaxaay, yôôych khơl adro nưq, nưq laa khơl adro dơơp tyauq trôôk e 'miêh, hnoq kơơn jah tabôôk muut ưưk ô-liiu ku kadih ni 'ngưưng iaq xet dong leq?\n\n\\ts\\*\n\\p",
  "25": "Vii oh ay lơơy, gô leh trôôch oh ay be xet truh varơuq kadook neq, xôq oh ay leh e varơuq khôôt xet tyauq xăk xamơk oh ay, bơyh varơuq găk xuum vlôh xing muuyq phoon tamooi I-sơ-ra-êl heq xlih vlôh, dong truh tuôôy đuh sôôq kaluh tamooi daak kadrơơy nhôôp  muut;\n\n\\ts\\*",
  "26": "ji đanưq, dêq I-sơ-ra-el hnoq jah wơt, đaji heq jah vlơk đaneq: \\q  “Plêêk wơơt xok hnoq truh xing Si-ôôn; \n\\q \nKadraq hnoq ka'lăk vlôh varơuq leh tuuôq vlôh klơlh Ja-kôôp.\n\\q",
  "27": "Ji nưq laa apok taveek xing aduq Gô jeen ka oot, \n\\q \ntuôôy Gô hnoq tawaay ka'lăăk kadrôp maroh ku oot.”\n\n\\ts\\*\n\\m\n\n",
  "28": "Xatyauq Hêêl Kaxaay, oot laa adro tachơơl vii kơq ka iit ku oh ay, bơh tyauq varơuq rơơlh xok, yôôych oot laa manih jah xung xiaq vii kơq khơl mo kơy ku oot",
  "29": "Vii kaluh varơuq kahniq ăm ji varơuq taayh tawoyh ku Kơy Plêêk laa kaluh varơuq leh ik tađôôi.\n\n\\ts\\*",
  "30": "vii pheq đnooy đaji kadih oh ay adroyq hơq heq leh tameen Kơy Plêêk, đơu neq heq jah biit angơuq aduq varơuq leh tameen ku khơl adro neq,",
  "31": "yôôych kung đanưq, khơl adro neq juneq heq leh tameen aduq varơuq biit angơuq oh ay, xôq juneq oot kung hnoq ik biit angơuq.",
  "32": "Vii Kơy Plêêk heq karuk tôôy dro đom varơuq leh tameen, xôq Kadraq hnoq ik kahnoq xuum biit angơuq tôôy dro.\n\n\\ts\\*\n\\p",
  "33": "Dik, tơn dik bê jaruq truh varơuq kroh e ji varơuq khôôt xet kung varơuq hlolh xet ku Kơy Plêêk! Luleq kaluh xanoh xadrah ku Kadraq be ik 'yo hloq ik, ji trôôk daak Kadraq leh hlolh xet ik!\n\\q",
  "34": "“Vii kơyq heq xet xuum biit ku Lôôk? \n\\q\nLong kơyq heq vlôh jêêk adro kôq vânq ku Kadraq?\n\n\\ts\\*\n\\q",
  "35": "Long kơyq heq ăm Kadraq adrooyq, \\q\nyôôych hnoq jah Kadraq blaa hlê?”\n\\p",
  "36": "Vii tôôy prooh vlôh xing Kadraq, gamưh muut Kadraq, ji awiih truh Kadraq. Tađnah tađnaak thuôk xuq Kadraq dong truh đơơy đơơy. A-meen.\n\\ts\\*"
}