cor_2020_cua_clt_rom_book/rom/1.json

{
  "1": "Phao-lôô, xapok ku Lôôk Wơt Dêh Jê-xu, muuyq khơl jah rơơlh jah tayh tawoyh, jah rơơlh đêh ka Hêêl Kaxaay ku Kơy Plêêk,",
  "2": "laa varơuq đơu Kadraq heq taveek xing adrooyq gamưh khơl hnhư hlit ku Kadraq đom Rahlăăp Vah,",
  "3": "truh Koot Kadraq - Kơy jah pa iir vlôh xing adrơơk ku Đa-vik tyauq phoon xăk xamơk,",
  "4": "Kơy jah đnooy tayh laa Koot Kơy Plêêk bơyh taay yaak gamưh varơuq riilh hlê xing aduq kaxêêt tyauq Yaak Phool Vah Xarêh - nưq laa Lôôk Wơt Dêh Jê-xu, Lôôk haay,",
  "5": "Đơu gamưh Kadraq, 'wot heq nhonq xok<strong>vanong kaxaay </strong> ji varơuq dơơp khơl jah rơơlh wih truh varơuq kuh kuul ku xuum tuuôq katuul dêq hloay kaluh tamooi daak kadrơơy vii kơq yal Kadraq.",
  "6": "đom kasôôq nưq oh ay kung laa khơl adro jah tawoyh tayh laa manih ku Lôôk Wơt Dêh Jê-xu.",
  "7": "Atăq truh dêq hloay khơl adro đong măn kaduq Rô-maa, laa khơl adro xung xiaq ku Kơy Plêêk, laa khơl vah jah tawoyh tayh: Apôôy <strong>vanoong kaxaay</strong> truh dii oh ay kung varơuq hrok hrol xing Kơy Plêêk, Vaq haay, ji xing Lôôk, laa Lôôk Wơt Dêh Jê-xu.",
  "8": "Adrooyq dik, gamưh Lôôk Wơt Dêh Jê-xu, gô kuh kwaay Kơy Plêêk ku gô truh dêq hloay oh ay, vii xuum tuuôq ku oh ay jah đnooy avlôh looch dêq dih dêh.",
  "9": "Vii Kơy Plêêk laa manih xanưk ku gô, Kơy đơu gô hơu varơuq bơơn xuum phool gô đom Hêêl Kaxaay ku Koot Kadraq, nưq laa gô leh padơơy e varơuq ahmưk nhăk truh oh ay luleq,",
  "10": "tuôôy hloay hloay apôôy vôôch đom apok apôôy ku gô đaneq atoh hnoq ik, xôq yôôych muut katuôôy neq long katuôôy kadrơơy, gô hnoq e đơơt hooy tơl dal bơyh iq trôôch ku Kơy Plêêk xôq truh kung oh ay.",
  "11": "Vii gô thier trôôch jah tavơh oh ay, xôq ka gô hnoq ik padooh taboon dii oh ay vanong <strong>danơng kooy,</strong>  leq nưq, xôq oh ay jah dưk kaalh.",
  "12": "đơu varơuq nưq laa xôq gô kung jah ahmưk nhăk dii oh ay, gamưh varơuq măn đom tôôy dro, nưq laa xuum tuuôq ku dêq oh ay ji gô.",
  "13": "Wơơy oh ay, gô leh trôôch oh ay be laay xet đaneq 'ngưưng yưk gô heq e iq truh kung oh ay ( đơu gô heq biq klơl hlê dong truh tuôôy neq), xôq ka gô kung hnoq ik goch xok raak plaay leq nưq katuul oh ay, kung đaji katuul kaluh tamooi daak kadrơơy.",
  "14": "Gô laa adro pơq lôôkq dêq manih Hi-laap hloay ka adro thiuq văăn minh, hloay manih <strong>khôôt xet </strong>hloay adro vlôô apoop.",
  "15": "Lunưq, đôôiq dii gô, dik laa tôq xuum xôq kung đnooy vlôh Hêêl Kaxaay ka oh ay, laa khơl manih aduq Rô-ma.",
  "16": "Vii gô leh kamưưl truh Hêêl Kaxaay, bơyh 'ngưq laa taay yaak ku Kơy Plêêk xôq varơuq wơơt blaa jeen ka dêq hloay dro leq tuuôq, nưq laa jeen adrooyq dik ka manih Jo-Thaiq, yôôych truh ka manih Hi-Laap.",
  "17": "Bơyh varơuq hyioh jăk ku Kơy Plêêk jah kahnoq vlôh đom Hêêl Kaxaay nưq, xing xuum tuuôq truh xuum tuuôq, đaji heq jah vlơk đaneq:\" Khơl adro hyioh jăk hnoq riilh gamưh xuum tuuôq.\"",
  "18": "Vii đơơt tôq dayq ku Kơy Plêêk xing plêêk jah kahnoq vlôh tachơơl hlê dii tôôy varơuq <strong>leh tuuôq</strong> ji leh hyioh jăk ku khơl drơơy, laa khơl adro ahnaanh ahnuk varơuq dik đom varơuq be hyioh jăk,",
  "19": "vii varơuq hnoq ik xet truh Kơy Plêêk yôôych trơơ trơơ katuul oot, bơyh Kơy Plêêk heq kahnoq varơuq nưq ka oot.",
  "20": "Vii xing tuôôy <strong> panưk pajêêk dih dêh, </strong> kaluh kajoq leh hloq ik ku Kadraq, nưq laa hloay taay yaak hloay ka yaak xăk đơơy đơơy ku Kadraq, raay jah 'yo xet trơơ trơơ, tuôôy jah hlolh xet gamưh kaluh panưk pajêêk ku Kadraq, xôq ka oot leh e kajoq xôq đnooy tagêêh ik.",
  "21": "Nưq laa vii long 'yo xet Kơy Plêêk, oot heq leh kauh ayuuôt Kadraq laa Kơy Plêêk, kung leh kuh kway Kadraq. Tađôôi muut đnư, oot heq vlôh jêêk be e iich đom kaluh xuum biit oot, ji xuum ta'ngok khưlq ku oot heq biq varơuq kamưng jaluuk kluum katuuh.",
  "22": "Tuôôy kadih đnooy laa khôôt xet, oot heq ăm hloq oot vlôô apoop,",
  "23": "ji oot heq tađôôi tađnah tađnaak ku Kơy Plêêk be kaxêêt hlơơp bơơn varơuq daang đaji long lơuq ku koot manih hưư hlơơp, kung đaji ku kaluh xêêp, ôô gôk ji pii ahnoot.",
  "24": "lunưq, Kơy Plêêk heq pahnăp oot muut kaluh xuum hmưch ku xuum oot wih truh varơuq be xarêh xaraat, xôq xăk xamơk oot biq dơơp klơl yêq katuul bing oot,",
  "25": "nưq laa khơl adro heq tađôôi varơuq dik ku Kơy Plêêk bơơn varơuq pa ôôh lar, ji heq kuh ayuuôt kung hơu varơuq vâk pajêêk thaay vii Kơy Panưk Pajêêk, laa Kơy xưnq jah ayuuôt laat dong truh đơơy đơơy. Ameen.",
  "26": "Bơyh kakơq nưq, Kơy Plêêk heq pahnăp ka'lăk oot ka kaluh hmưch trôôch apuq atrăp, vii khơl kadrê ku oot heq tađôôi trôôk xa vik e 'miêh vlôh trôôk đêh ji e 'miêh,",
  "27": "kung anưq, khơl kanơu kung dang đanưq, têq katuôôy ka'lăăk trôôk xa vik e 'miêh dii kadrê, yôôych chiuq huur vuh đom xuum hmưch ku oot truh mamuuyq, tuôôy khơl kanơu dii khơl kanơu dơơp varơuq bơơyq baa, yôôych nhonq hlê ka kadih oot xadrah dook, laa varơuq taxưnq dii varơuq bơơyq baa ku oot.",
  "28": "Kung tyauq trôôk đơu oot heq leh 'yo hloq pheq e Kơy Plêêk đom nhonq xet oot laa tamaq kaxaay, yôôych Kơy Plêêk heq pahnăp oot ka xuum biit hưư hlơơp, xôq dơơp kaluh varơuq be troq jơq,",
  "29": "vii heq biq glôôp viik tôôy varơuq be hyioh jăk, xơk tauq, xuum hmưch, xuum xơk: glơh glaay kaluh varơuq ku varơuq tagliêh yarơ, păk kaxêêt, tayaat, aluut pa ôôh, xơk xuum; kaluh apok đnooy ramooy,",
  "30": "<strong> đnooy pa'hnhiq, xôq xuum yarơơ Kơy Plêêk, lienq xauq, laa ook,</strong> akwoe kwoak, 'ngưưng jooy dơơp xơk aak, leh tameen tyauq miq vaq,",
  "31": "thiuq hlolh xet, leh muuyq xuum dii kadrê, leh tabôông, leh e xuum biit angơuq. ",
  "32": "Nưq laa khơl adro long heq 'yo xet xưh xadrah hyioh jăk ku Kơy Plêêk, đaneq kơyq lôôp ,kaluh varơuq lunưq laa xưnq kaxêêt, bơh oot leh vơơ lôôp kaluh varơuq nưq, đơu oot măn patuut ahluk ka khơl adro leq lôôp dơơp.",
  "None": "<strong>Thơ ku Phao-lô</strong><strong>Atăq ka manih</strong><strong> Rô-maa</strong>"
}