cor_2020_cua_clt_rom_book/rom/2.json

{
  "1": "Lunưq, nee dro hơq - paq kêê kơyq ragưy đnooy xadrah - ay leh e kakơq kajoq tagêh hlê ik, vii đom varơuq kajoq đơơu ay đnooy xadrah dro kadrưy, ay  atok xadrah kadih ay; bơyh ay, ji adro đnooy xadrah, kung lôôp kaluh varơuq nưq.",
  "2": "Măn haay heq xet aneq varơuq xưh xadrah ku Kơy Plêêk ji tamuut dii varơuq dik tachơơl hlê khơl adro lôôp kaluh varơuq đanưq.",
  "3": "Bơh, nee dro hơq, ji dro đnooy xadrah khơl leq lôôp kaluh varơuq đanưq đơơu kadih ni kung dơơp kaluh varơuq đanưq, ay biit truh varơuq neq, aneq ay hnoq xaloot chuh varơuq xưh xadrah ku Kơy Plêêk?",
  "4": "Long ji ay 'yo leh ra kajoq varơuq karoh e kua xuum kaxaay ji xuum atuq kung varơuq chiuq wêêt kua Kadraq, vii leh xet aneq xuum kaxaay  ku Kơy Plêêk jarooy ay truh varơuq wiit xum?",
  "5": "Bơh 'yo tyauq varơuq găk xuum ku ay ji xuum klaak leh chiuq wiit xuum, ay măn  agoop xôq varơuq tôq dayq  kadih ka ay đom hngơy tôq  tơh ji kahnoq vlôh truh varơuq xưh xadrah hyioh jăk ku Kơy Plêêk,",
  "6": "ji Kơy hnoq bla ka tôôy dro xatyauq kaluh dơơp ku adro nưq:",
  "7": "Muuyq panưh ji  varơuq riirh đơơi đơơi jeng ka dro leq axek akhiim tađnah tađnaak ji kuul vado kung jaq triq măn miêt miêt tyauq varơuq kajưk xuum ku varơuq kaxaay,",
  "8": "măn panưh hơq ji varơuq tôq dayq kung tôq jaraq rahưk jeng ka khơl adro bơyh xuum hmưch kalih ji leh tamăn tyauq varơuq dik đơơu biq aluut tyauq varơuq leh hyioh jăk.",
  "9": "Pơơl dal ji pơơl hwơl măn tol tôôy phool iel ku manih dơơp varơuq xơk, ku manih Jo Thaiq adroyq nhưk, hloay ku manih Hi Laap.",
  "10": "Bơh tađnah tađnaak ji kuul vado kung varơuq hrok hrol jeng ka dêq dro dơơp varơuq kaxaay, ka manih Jo Thaiq adroyq dik, hloay ka manih Hi Laap.",
  "11": "Vii leh e varơuq bing kơyq đom varơuq e mot ku Kơy Plêêk.",
  "12": "Long adro leq heq lôôp kadrôp tyauq trôôk leh e ganuun, thii kung hnoq kaxêêt hlơơp tyauq trôôk leh e ganuun, ji long dro leq heq lôôp kadrôp đom katuul ganuun, thii hnoq biq xưh xadrah bơơn ganuun.",
  "13": "Vii lưp aalq khơl adro tamăn ganuun ji hyioh jăk kangưưr Kơy Plêêk, bơh khơl adro dơơp tyauq ganuun thii hnoq ik taayh hyioh jăk.",
  "14": "Vii tuôy khơl tamooi kadrưy, ji kaluh tamooi leh e ganuun, tyauq trôôk e 'miah dơơp kaluh varơuq ku ganuun, thii long leh e ganuun, oot  ji ganuun ka kadih oot,",
  "15": "nưq ji khơl adro ăm hloq kaluh varơuq dơơp kua ganuun ik vlơk đom xuum oot, tuôy xuum klaak oot dơơp xanưk, ji kaluh xuum biit rôôp xadrah long atoh tagêh  katuul kadih oot dii mamuuyq",
  "16": "đom hngơy đơu Kơy Plêêk hnoq xưh xadrah kaluh varơuq padu kadook ku khơl drưy hlulh hlê Lôôk Wơt Dêh Jêê-xuu, tyauq đaji Hêêl Kaxaay ku gô.",
  "17": "Măn atoh ay xok yal ji manih Jo Thaiq, gamưh muut ganuun, akwoe akwoak đom Kơy Plêêk,",
  "18": "hlolh xet iq trôôch Kadraq, xet 'yo kahraa kaluh varơuq đêh xateek glơh iaq ik pato dayh xing đom ganuun,",
  "19": "kung anưq, ay tuôq kadih xăk ji manih jarooy trôôk khơl adro apưl, xaal tađnah ka khơl leq măn đom kamưng jaluk,",
  "20": "adro pato dayh bing vlôô apoop, thơy pato bing adro vlôô khưlq, vii jah e  trôôk daak ku xahok ji ku varơuq dik đom ganuun,",
  "21": "anưq thii, nee adro pato dayh adro kadrưy hơq, ay leh pato kadih ay? Nee adro  padooh pato te xatôk hơq, ay e xatôk?",
  "22": "Nee adro dach leh ik katơq bơơyq hơq, ay e katơq bơơyq? Nee adro  ramêq kaluh vangưl  hơq, ay atôk valong đôô hnhư đơơp?",
  "23": "Ay akwoe xăk laa manih măn đom ganuun, ay e đnooy leh raa kajoq Kơy Plêêk bơơn varơuq  gưưlh lôôp ganuun be?",
  "24": "Bơyh \" yal Kơy Plêêk biq đnooy ra ơơh katuul kaluh tamooi daak kadrơơy vii kơq êêp,\" dang đaji apok heq jah vlơk.",
  "25": "Dik, tyauq pheep goch kađuh tawaay truh e iit atoh ay hnoq ik dưk dơơp ganuun, bơh atoh ay laa adro gưưlh lôôp ganuun, yôôych varơuq goch kađuh ku ay heq vlôh jêêk be goch kađuh ",
  "26": "Yôôych anưq, atoh muuyq dro koq goch kađuh tameen jưư kaluh băt dơơp ku ganuun, yôôych be aalq varơuq koq goch kađuh ku dro nưq hnoq jah 'yo đaji varơuq heq goch kađuh leh aalq?",
  "27": "Ji tuôôy dơơp xaleep ganuun, dro koq goch kađuh aduq xăk xamơk hnoq xưh xadrah ay, nưq laa adro xing chưh vlơk ji pheep goch kađuh laa adro gưưlh lôôp ganuun.",
  "28": "Vii be aal muuyq dro bơyh kaphook pi gôk laa manih Jo Thaiq, kung be aal thưq măn pi gô tol xăk xamơk laa pheep goch kađuh,",
  "29": "tađôôi muut đnư, manih Jo Thaiq laa xuum klaak măn aduq kadook pii 'lăăp, ji pheep goch kađuh laa ku xuum klaak xing Kơy Phool Hiel, leh aal bơơn chưh vlơk; đơu varơuq xưnq vadoo ku dro nưq be aal xing koot manih bơh laa xing Kơy Plêêk."
}