cor_2020_cua_clt_rom_book/rom/4.json

{
  "1": "Nưq, haay hnoq đnooy Ap-ra-haam, mo kơy ku haay tyauq trôôk xăk xơmơk, heq nhonq jah kajoq?",
  "2": "Vii atoh Aap-ra-haam jah 'yo hyioh jăk gơmưh varơuq dơơp, yôôych kơy e kơq xôq akwoe, bơh leh aalq laa kangưưl Kơy Plêêk.",
  "3": "Vii Rahlăăp Vah đnooy kajoq? \"Aap-ra-haam tuuôq gamưh Kơy Plêêk, ji varơuq nưq jah ‘yo laa hyioh jăk ka kơy.\"",
  "4": "Mot kadrơơy đôôiq dii kơyq dơơp varơuq, yôôych jêêt hngơy dơơp leh jah 'yo đaji vanong, bơh laa đaji lôôkq.",
  "5": "Măn đôôiq dii kơyq leh dơơp varơuq, đơu tuuôq aduq Kơy khienq adro leh tuuôq vlôh hyioh jăk, yôôych xuum tuuôq ku adro nưq jah 'yo laa hyioh jăk.",
  "6": "Pheq đnooy đaji Đa-vik kung đnooy truh vanong kaxaay ku kơy đơu Kơy Plêêk ‘yo laa hyioh jăk be aalq varơuq dơơp:",
  "7": "Vanong ka dro leq đơu kaluh varơuq xơk tauq ni jah ka'lăăk, ji  <strong> kaluh kadrôp maroh ni heq jah katuh glôôp</strong>!",
  "8": "Vanong ka adro đơu Lôôk kajưk dik heq leh jauq truh kadrôp maroh ku ni.\"",
  "9": "Nưq yôôych vanong kaxaay neq jeen ka adro chiuq goch kađuh, long kung jeen ka adro leh goch kađuh? Bơyh haay đong đnooy:\" Xuum tuuôq nưq jah 'yo laa hyioh jăk ka Aap-ra-haam.\"",
  "10": "Anưq, xuum tuuôq nưq heq jah ‘yo đaji luleq? Laa đom tuôôy heq goch kađuh long đom tuôôy koq lưưp goch kađuh? Leh aalq đom tuôôy heq goch kađuh, bơh laa đom tuôôy koq goch kađuh.",
  "11": "Kơy heq nhonq hlêêl goch kađuh đaji hlêêl xanưk ku varơuq hyioh jăk gơmưh xuum tuuôq, nưq laa xuum tuuôq đom tuôôy koq goch kađuh, xôq ka kơy laa mo kơy ku dêq hloay dro leq e xuum tuuôq long koq goch kađuh, jarooy truh varơuq hyioh jăk jah 'yo ka khơl adro nưq;",
  "12": "kung xôq ka kơy laa mo kơy ku adro chiuq goch kađuh đôôiq dii khơl leq leh vơơ vlôh xing pheep goch kađuh, đơu măn laa khơl adro dơơp tyauq dơuq jôôk xuum tuuôq ku Aap-ra-haam, mo kơy haay, đom tuôôy koq goch kađuh.",
  "13": "Vii be aalq gơmưh ganuun đơu apok taveek laa manih dưk hlê dih dêh jah kahinq ăm Ap-ra-haam ji koot xauu kơy, đơu gơmưh varơuq hyioh jăk gơmưh xuum tuuôq.",
  "14": "Vii atoh adro riilh tyauq ganuun laa manih<strong>dưk hlê</strong>, yôôych xuum tuuôq vlôh jêêk be iit kajoq ji apok taveek vlôh jêêk paq ik xung liq.",
  "15": "Vii ganuun jarooy truh tôq jaraq, ji aduq leq leh e ganuun, yôôych aduq nưq kung leh e  varơuq lôôp ganuun.",
  "16": "Đanưq 'ngưq laa gơmưh xuum tuuôq, xôq apok taveek laa gơmưh vanoong kaxaay ji jah jưư kajưk ka dêq hloay koot xauu Aap-ra-haam, - leh aalq ăm adro măn 'lăălq ganuun heq, đơu măn ka adro e kung xuum tuôôq đaji Aap-ra-haam. Kơy laa mo kơy ku dêq hloay khơl haay,\n",
  "17": "đaji e vlơk: \"Gô heq khienq koot yuuôr vaq ku 'ngưưng kaluh tamooi, \"kangưưr Kơy Plêêk đơu kơy tuuôq gơmưh, Plêêk kahniq kadrôôk riilh ka adro kaxêêt ji khienq kaluh varơuq leh e jêêk vlôh e.",
  "18": "Kơy <strong>tuuôq gamưh,</strong> xuum glaay takôô gamưh <strong>tuôôy paq măn takôô gamưh, </strong> đaneq kơy hnoq vlôh jêêk vaq 'ngưưnq kaluh tamooi, tyauq đaji apok heq taveek ka kơy, đaneq: \"adrơơk Koot hnoq đa nưq.\"",
  "19": "Xuum tuuôq kơy leh hraap suut, long kơy 'yo xăk xơmơơk kơy đaji heq kaxêêt ( vii kơy heq jah kơh hreek xanưm) - kung klaak koot heq kateh ha'yauq ku Saa-raa.",
  "20": "Bơh gơmưh apok taveek ku Kơy Plêêk, Aap-ra-haam leh manưưng manưưl đom varơuq leq tuuôq. Tađôôi muut đnư kơy kơn kaalh athêêp đom xuum tuuôq ji ayuuôt kacheeu Kơy Plêêk.",
  "21": "Kơy hloay hloay tuuôq kajưk đaneq varơuq kajoq Kơy Plêêk heq taveek, yôôych Kadraq kung hnoq ik dơơp jêêk.",
  "22": "Đa nưq xuum tuuôq nưq jah 'yo laa hyioh jăk ka kơy.",
  "23": "Apok vlơk \"xuum tuuôq jah 'yo ka kơy\" 'ngưq leh vơơ xôq ka Aap-ra-haam,",
  "24": "bơh kung xôq ka haay, adro jah 'yo laa hyioh jăk gơmưh tuuôq aduq Kơy heq khienq Lôôk Jê-xu haay riilh hlê xing aduq kaxêêt.",
  "25": "'Ngưq laa Kơy heq biq noop vii varơuq lôôp kadrôp ku haay bơh kung heq riilh hlê vii varơuq xưng hyioh jăk haay. "
}