cor_2020_cua_clt_rom_book/rom/5.json

{
  "1": "Anưq yôôych, vii heq jah xưng hyioh jăk gamưh xuum tuuôq, haay hnoq ik jah <strong> varơuq taguu hlê</strong> dii Kơy Plêêk, gamưh Lôôk haay, laa Lôôk 'Wơt Dêh Jê-xu,",
  "2": "đơu hlê Kơy nưq, haay gamưh xuum tuuôq kung heq e trôôk muut đom vanong kaxaay neq, laa aduq đơu haay dưk kajưk măn atalh, ji haay hlah hlaak gamưh tol xuum takôô gamưh truh tađnah tađnaak ku Kơy Plêêk.",
  "3": "Bơh leh vơơ đanưq, đơu haay măn hlah hlaak đom 'ngưưng pơl dal, vii xet đaneq pơl dal tawaay truh xuum praat chiuq unq;",
  "4": "măn praat chiuq unq neq <strong> tawaay truh</strong xuum klaak<strong> jah atuq xuum, </strong> măn xuum klaak jah atuq xuum neq <strong> yôôych tawaay truh varơuq </strong> takôô gamưh.",
  "5": "Măn varơuq takôô gamưh nưq be dơơp thâk vonq, bơyh kơq xung xiaq ku Kơy Plêêk heq jah kahrôôq uk muut xuum haay gamưh Kơy Phool Hiel, Kơy heq jah kahniq ka haay.",
  "6": "Kung koq lưưp dêq, tuôôy haay măn laa khơl adro ravoch, yôôych muut klip katuôôy kawah, Lôôk Wơt Dêh heq kaxêêt thêq ka khơl adro e kadrôp.",
  "7": "Dik leh hlơu e kơyq hnoq chiuq kaxêêt thêq ka manih hyioh jăk. Long hnoq e adro kung hôôk kaxêêt thêq ka adro xuum kaxaay.",
  "8": "Bơh Kơy Plêêk ăm hloq xung xiaq ku kadih Kadraq đôôiq dii haay, nưq laa tuôôy haay măn laa e kadrôp, yôôych Lôôk Wơt Dêh heq kaxêêt thêq ka haay.",
  "9": "Iaq nưq đnoyq, vii haay heq jah 'yo laa hyioh jăk gamưh vahaap Kadraq, đanưq haay hnoq jah wơt klơlh đơơt tôq jaraq ku Kadraq.",
  "10": "Vii atoh đong tuôôy haay măn laa tachơơl đơu \nwiih jah taguu hlê dii<strong>Kơy Plêêk</strong> gơmưh varơuq kaxêêt ku Koot Kadraq, yôôych juneq heq jah<strong>taguu</strong> yôôych, haay hnoq wiih jah wơt kơn iaq đnoyq gơmưh varơuq riilh ku Koot nưq.",
  "11": "leh anưq heq, haay kung hlaah hlaak đom Kơy Plêêk gơmưh Lôôk Wơt Dêh Jê-xu haay, gơmưh Kadraq haay jah varơuq <strong>taguu neq.</strong>",
  "12": "Anưq, bơyh muuyq dro đơu kadrôp maroh muut dêh araak, yôôych kadrôôk kaxêêt kung bơyh kadrôp maroh đơu muut dang đa nưq. Ji kadrôôk kaxêêt tabaa truh tôôy dro, vii tôôy dro raay lôôp kadrôp. ",
  "13": "Vii miek dong truh tuôôy e ganuun, yôôych kadrôp maroh heq e 'miêh đom dêh araak yôôych, bơh kadrôp leh jah 'yo laa kadrôp tuôôy koq lưưp e ganuun.",
  "14": "Lu anưq, varơuq kaxêêt yôôych măn dưk xanok xing đơơy A-đaam truh đơơy Môôi-xee, hloay tol adro leh lôôp kadrôp dang đaji kadrôp ku A-đaam, laa kwuôn mâuh ku Kơy pheq truh.",
  "15": "Bơh adrool leh dang đaji varơuq lôôp kadrôp. Vii atoh bơyh varơuq lôôp kadrôp ku muuyq dro đơu 'ngưưng dro pheq kaxêêt, yôôych vanong kaxaay ku Kơy Plêêk, ji adrool bơyh vanong kaxaay ku muuyq dro, 'ngưq laa Lôôk 'Wơt Dêh Jê-xu, wiih măn glơơh glaay iaq xet dong leq ka 'ngưưng dro!",
  "16": "Adrool nưq leh dang đaji tavơh varơuq ku muuyq dro lôôp kadrôp. Vii, dik, vơơ muuyq varơuq lôôp kadrôp khienq khơl drơơy pheq chiuq xưh xadrah ji biq atok xadrah, đom tuôôy adrool yôôych jah kahniq ăm atêq 'ngưưng lôôp kadrôp ji jarooy truh varơuq xưưng hyioh jăk.",
  "17": "Atoh jo lôôp kadrôp ku muuyq dro, đơu gamưh mainh nưq, varơuq kaxêêt heq dưk xanok, yôôych adro nhonq jah vanong kaxaay glơơh glaay kung adrool hyioh jăk hnoq gamưh muuyq dro, 'ngưq laa Lôôk 'Wơt Dêh Jê-xu, đơu dưk xanok đom varơuq riilh 'ngưưng iaq xet dong leq.",
  "18": "Đa nưq, bơyh muuyq varơuq lôôp kadrôp đơu tôôy dro biq xưh kadrôp yôôych, kung anưq, bơyh muuyq varơuq dơơp hyioh jăk đơu tôôy dro jah xưưng hyioh jăk ji jah riilh.",
  "19": "Vii đaji bơyh varơuq leh tameem ku muuyq dro đơu 'ngưưng manih vlôh jêêk manih kadrôp, yôôych kung anưq, bơyh varơuq tameen tyauq ku muuyq dro đơu 'ngưưng manih hnoq jah jêêk hyioh jăk.",
  "20": "Ganuun xalôôq muut, khienq varơuq lôôp kadrôp 'ngưưng athêêp. Bơh aduq leq kadrôp maroh athêêp 'ngưưng yôôych vanong kaxaay wiih kơn glơơh glaay iaq.",
  "21": "Varơuq xalih vlôh anưq, đaji kadrôp maroh dưk xanok jarooy truh varơuq kaxêêt đa leq, yôôych vanong kaxaay kung dưk xanok gamưh varơuq hyioh jăk jarooy truh varơuq riilh đơơy đơơy đa nưq, gamưh Lôôk 'Wơt Dêh Jê-xu, Lôôk haay."
}