cor_2020_cua_clt_rev_book/rev/16.json

{
  "1": "Yôôch gô tek muuyq apok kôt xing hnhư hơu đnooy dii pơơh kơy yaak: \"Dayh hooy ji uuk pơh dooy tôq jaraq ku Kơy Plêêk pôôt vari.\"\n\n\\ts\\*\n\\p",
  "2": "Nưq laa kơy thưq yưk hooy ji uuk dooy kơy pôôt vari, yôôych plee talook ramêq ji dơơp jiq jiêh xalih vlôh tol oot, khơl adro e dơuq hlêêl ku ôôq, kung khơl adro kuh kuul vangưưl ni.\n\n\\ts\\*\n\\p",
  "3": "Yôôch kơy thưq vaar uuk dooy kơy pôôt tahlii, yôôych tahlii jêêk vlôh vahaap, đaji ku manih kaxêêt, ji kaluh proh riilh đom tahlii raay kaxêêt.\n\n\\ts\\*\n\\p",
  "4": "Atêq nưq, kơy thưq pee uuk dooy kơy pôôt kaluh daak tavook ji alook daak, yôôych ni jêêk vlôh vahaap.",
  "5": "Gô tek kơy yaak ku daak đnooy: \\q “Kuh Kơy đong e ji heq e, laa Kơy Vah, \n\\q2\n Kadraq laa hyioh jăk vii Kadraq heq xưh xadrah kaluh varơuq neq.\\q\n\\f +\\ft Muuyq sôôq rahlăăp đok: \\fqa Wơơy Lôôk, Kơy đong e, heq e, ji măn e, Kadraq dik hyioh jăk vii Kadraq heq xưh xadrah kaluh varơuq nưq \\fqa*.\\f*\n\\q",
  "6": "Vii oot heq dơơp ahngok vahaap ku khơl vah ji khơl hlit, \n\\q2\nanưq Kadraq heq ăm oot hôôch vahaap; \n\\q\noot dik xưnq chiuq đanưq.”\n\\m",
  "7": "Yôôch gô tek para hơu đnooy: \"Jơq, kuh Lôôk laa Kơy Plêêk, Kơy Taay Yaak, \n\\q2 \nkaluh varơuq xưh xadrah ku Kadraq raay  dong dik ji hyioh jăk.”\n\n\\ts\\*\n\\p",
  "8": "Yôôych kơy thưq poot uuk dooy kơy tol mot hngơy, yôôych ni ik pheep vuh oot bơơn ôôlh.",
  "9": "Nưq laa oot biq vuh jaq vii xaal tôq paq ik, ji oot đnooy katơk dalơh yal ku Kơy Plêêk, Kơy e qwuyen tol kaluh pơơl dal neq, đơu oot be chiuq rawiit xuum xôq tơơk tưp tađnah tađnaak ka Kadraq.\n\n\\ts\\*\n\\p",
  "10": "Yôôch kơy thưq dăp uuk dooy kơy tol ngaai ku ôôq, yôôych daak dêh ni yuôôl vlôh kamưưng jaluk, ji oot kek kapiek oot vii jiq jiêh.",
  "11": "Oot đnooy katơk dalơh Kơy Plêêk tol plêêk vii varơuq jiq jiêh oot ji vii kaluh hlêêl katôôt ku oot, nưq đơu oot leh wiit xuum truh kaluh varơuq dơơp ku oot.\n\n\\ts\\*\n\\p",
  "12": "Yôôch kơy thưq drơu uuk dooy kơy pôôt daak vook kôt Ơ-phơ-raat, yôôych daak vook biq kateh hreek xôq trôôk hooy ku khơl vuua xing pi mot hngơy vlok jah 'meq 'miêh.",
  "13": "Gô hloq vlôh xing huuy ôôq vayaa, xing huuy ôôq, ji xing huuy hlit pa ôôh, e pee kamuuych a'moh dang đaji ajii,",
  "14": "Vii oot laa yaak ku kaluh kamuuych dưk dơơp 'ngưưng dơuq akêh, đơu oot truh dii khơl vuua tol dêq dêh araak xôq ahluk hlê oot ka varơuq tahmot muut hngơy kôt ku Kơy Plêêk, Kơy Taay Yaak.\n\n\\ts\\*",
  "15": "(\"Dayh 'yo! Gô hnoq truh đaji adro atôôk! Vanoong ka dro prol takôô ji hloay hlưưp auu, xôq be huq hooy hlê lalôk ji biq khơl drơơy 'yo hloq varơuq kamưưl ku ni.\")",
  "16": "Yôôych oot anguuk taguum oot hlê ka muuyq aduq đom apok Hi-baq-laai tayh ji Ha-ma-gê-đôn.\n\n\\ts\\*\n\\p",
  "17": "Yôôych Kơy Yaak thưq pơơh uuk dooy kơy muut khôông khiq, yôôych e muuyq apok đnooy kôt xing ngaai đom hnhư hơu ahnaa vlôh, đaneq: \"Anưq laa yôôych!\"",
  "18": "Yôôych e ka'meek tađnah, hưưm grung grung, hnưưm kơy kataa, ji kung e muuyq đơơt ahrưưng vari kôt - koq hmưưq e xing tuôôy koot manih e mot tol vari, đơơt ahrưưng vari nưq thier kaalh ji thier kôt.",
  "19": "Theng kôt biq aklah vlôh dơơp pee, ji kaluh theng kôt ku kaluh daak hrưưp lalaak. Yôôych Kơy Plêêk văch hlê Baa-by-lôôn kôt, ji Kadraq ăm ni hôôch dooy lok aluq bơơn đơơt tôq jaraq rahưưk rahưưk ku Kadraq.\n\n\\ts\\*",
  "20": "Tuôôy nưq, kaluh ngok tahlii raay xadăk klôôlq, ji be măn hloq ngok đoot đnoyq.",
  "21": "Kaluh kuuk jiit prier kôt prêq chưnq ta-lââng xing plêêk klêh pôôt tol koot manih. Koot manih đnooy katơk dalơh Kơy Plêêk vii kưk nanq jiit prier, vii kưk nanq nưq ramêq dik.\n\n\\ts\\*"
}