cor_2020_cua_clt_rev_book/rev/14.json

{
  "1": "Yôôych gô 'yo hloq, ji hơq, Trưưu Koot dưk tol đoot Sii-ôôn. Kung dii Kadraq laa 144.000 dro e yal Kadraq ji yal Vaq Kadraq jah vlơk tol ngưưr ku oot.",
  "2": "Ji gô tameen xing tol plêêk e hnưưm đaji hnưưm grung grung ku 'ngưưng alook daak, ji đaji hnưưm kơy kata kaalh. Hnưưm đơu gô tameen nưq kung dang đaji hnưưm khơl e tii agưưt varoo haak oot.\n\n\\ts\\*",
  "3": "Oot kacheeu muuyq baai kacheeu đơơu kangưưl ngaai ji kangưưl poot poop ôôq kung khơl draq. Be kơyq hnoq ik hok xet baai kacheeu nưq đêh vlôh 144.000 manih heq jah wơơt root tol vari.",
  "4": "'Ngeq laa khơl adro koq lưưp dơơp xăk biq a'mooh nhơơy vii khơl drê, vii oot măn riin jaa. Khơl manih neq tyauq atêq paq kêê aduq leq Trưưu Koot hooy. Oot heq jah root xing tuul koot manih đaji plaay adrooyq dik ka Kơy Plêêk ji Trưưu Koot.",
  "5": "Aduq huuy oot be hloq varơuq pa ôôh lar leq, vii oot leh e kajoq xôq đnooy ik.\\p\n\\f +\\ft Muuyq sôôq rahlăăp hnu iaq athêêp: \\fqa kangưưl ngaai Kơy Plêêk\\fqa*.\\f*\n\n\\ts\\*\n\\p",
  "6": "Yôôych gô hloq muuyq kơy yaak kadrơơy pool di tuul plêêk, đnooy padooh hêêl kaxaay đơơy đơơy ka koot manih tol vari - ka kaluh daak dêh, kaluh adrơơk tamooi, kaluh apok thêêk, kaluh tamooi.",
  "7": "Kơy Yaak đnooy kôt apok, đaneq: \"Dayh kuul yôq Kơy Plêêk ji tơk tưp tađnah tađnaak ka Kadraq. Vii wat xưh xadrah ku Kadraq heq truh. Dayh vnê ayuuôt Kơy panưk pajêêk plêêk, vari, tahlii ji kaluh alook daak.\"\n\n\\ts\\*\n\\p",
  "8": "E muuyq Kơy Yaak kadrơơy - Kơy Yaak thưq vaar - tyauq atêq, đnooy đaneq: \"Gưưlh hrưưp yôôych, Baa-by-lôôn kôt hơq, adro ahluuk kaluh tamooi hôôch lok apuq atrăp tôq jaraq ku ni, heq hrưưp pôôt yôôych.\"\n\n\\ts\\*\n\\p",
  "9": "Muuyq Kơy Yaak kadrơơy đnooyq - Kơy Yaak thưq pee -  tyauq atêq oot, đnooy kôt apok, đaneq: \"Atoh adro leq kuh ayuuôt ôôq kung vangưưl ni, ji nhonq hlêêl dơu ni tol ngưưr long tol tii oot,",
  "10": "yôôych adro nưq kung hnoq hôôch lok tôq jaraq ku Kơy Plêêk, laa thưq lok leh waa cheet muut dooy tôq jaraq ku Kadraq. Adro nưq hnoq biq jiq ra ool bơơn ôôlh ji lưưu hwiinh kangưưr khơl Kơy Yaak vah ji kangưưr Trưưu Koot.\n\n\\ts\\*",
  "11": "'nhuuy xing aduq jiq jiêh ku oot kưq pool tok đơơy đơơy, miek miek, ji oot hnoq be jah padơơy padoo ka hngơy hloay ka klôôy - 'ngưq laa khơl adro kuh kwaay ôôq kung vangưưr ni, ji khơl adro nhonq xok hlêêl dơu ơnơng ku ni.",
  "12": "'Ngeq ji varơuq chiuq atuq xuum ku khơl vah, khơl manih tameen jưư kaluh ganuun ku Kơy Plêêk ji xuum tuuôq aduq Lôôk Jê-xu.\"\n\\ts\\*\n\\p",
  "13": "Gô tameen apok đnooy xing plêêk, đaneq: \"Dayh vlơk apok neq: Xing neen kơơn atêq, vanoong ka adro leq kaxêêt laa kaxêêt đom Lôôk.\" Kơy Phool Hiel xanooh: \"Jơq, xôq oot jah padơơy padoo klơlh kaluh parêq prơơh ku oot, vii kaluh varơuq oot dơơp hnoq tyauq oot.\"\n\\ts\\*\n\\p",
  "14": "Yôôych gô 'yo hloq, ji hơq, e muuyq kuk kluk koo. Măn tol kluk laa kơyq nưq dang Koot Manih. Tol akoq Kadraq anhiil đoat tađnah bơơn vayaang ,ji adrơk muuyq poop lahaaiq xưưl đom tii.",
  "15": "Yôôych muuyq Kơy Yaak kadrơơy xing hnhư hơu hooy vlôh, kôt apok taayh Kơy đong 'ngôôy tol kluk: \"Vôôch dayh xok laa haaiq Kadraq đơu goch, vii muua goch tol vari heq dôôp ji heq truh tuôôy pheq goch yôôych.\"",
  "16": "Nưq ji Kơy 'ngôôy tol kluk avih laa haaiq Kadraq tol vari, ji vari biq goch.\n\n\\ts\\*\n\\p",
  "17": "Yôôych muuyq Kơy Yaak kadrơơy xinh hnhư hơu tol plêêk hooy vlôh; kơy neq kung e muuyq poop lahaaiq xưưl.",
  "18": "Wih e athêêp muuyq Kơy Yaak đnoyq xing paraa hơu hooy vlôh, laa kơy e qwuyen tol ôôlh, Kadraq tayh kôt Kơy Yaak e lahaaiq xưưl, đaneq: \"Dayh xok lahaaiq đơu goch xok kaluh 'môôk nhoo xing kaluh ưưk nhoo 'lăălq vari, vii nhoo neq heq dôôp.\"\n\n\\ts\\*",
  "19": "Nưq ji Kơy Yaak avih lahaaiq pôôt vari ji goch xok muua nhoo ka vari, yôôych qweel ni muut thung lok kôt tôq jaraq ku Kơy Plêêk.",
  "20": "Khơl drơơy joaq thung ranieq nhoo măn pii gôk theng ji vahaap đom thung ahngok vlôh ngôôp truh moon ôôq ahleh, hoot xangưưi 1.600 êêt-taa-đơơ.\n\n\\ts\\*"
}