2.9 KiB
33. Əkinçi barədə məsəl
Bir dəfə İsa gölün sahilində idi. O, böyük izdihamı öyrədirdi. İsanı dinləmək üçün çoxlu insan gəlmişdi. Buna görə O, qayığa minib sahildən aralandı ki, adamlar Onu yaxşı görsün və eşitsinlər. O, qayığa minib insanları öyrətməyə başladı.
İsa onu dinləyən insanlara belə bir məsəl danışdı: “Bir əkinçi toxum səpməyə çıxdı. O, toxumları səpərkən, toxumların bəzisi təsadüfən yol kənarına düşdü. Quşlar gəldi və bu toxumları dənlədi.
Digərləri torpağı az olan daş-kəsəkli yerə düşdü. Toxumlar daş-kəsəkli torpaqda tez cücərdi, lakin kökləri torpağın dərinliyinə çata bilmədi. Günəş çıxıb yer üzünü qızdıranda, cücərtilər quruyub məhv oldular.
Elə toxumlar da var idi ki, tikanlı kolların arasına düşdü. Bu toxumlar cücərməyə başladı, lakin tikanlar onları boğdu. Buna görə, tikanlar arasında böyüyən bitkilər heç bir bəhrə vermədi.
Münbit torpağa düşən toxumlar da var idi. Onlar böyüyüb artdı, otuz, altmış və hətta yüz qat artıq səmərə verdi. Allahın ardınca getmək istəyənlər Mənim dediklərimə diqqət yetirsinlər!”
Şagirdlər bu məsəli başa düşmədilər, lakin onlar İsa ilə tək qalanda O, məsəlin mənasını izah etdi. “Toxum – Allah Kəlamıdır. Yol – Allah Kəlamını eşidən, lakin onu anlamayan insandır. İblis gəlib ondan Kəlamı oğurlayır ki, həmin insan iman etməsin və xilas olmasın.
Daş-kəsəkli yer – bu, Allahın Kəlamını eşidən və sevinclə onu qəbul edən insandır. Ancaq həmin insan əziyyətə düşən kimi və başqa insanların təqibinə məruz qalan kimi Allahdan uzaqlaşır və artıq Ona etibar etmir.
Tikanlı torpaq – Allahın Kəlamını eşidən insandır. Lakin o, dünyanın qayğılarını çəkməyə başlayır, daha çox pul qazanmağa, varını artırmağa çalışır. Bir müddətdən sonra o, daha Allahı sevməyə qadir olmur. Allahın Kəlamından öyrəndikləri Allahı razı salmaq üçün daha ona yardım etmir. Belə insan dənsiz sünbülə bənzəyir.
Ancaq münbit torpaqda olan toxumlar - Allahın Kəlamını eşidib Ona iman edən və bunun sayəsində bəhrə gətirən insandır.”
Müqəddəs Kitabdan hekayə. Matta 13:1-8; Mark 4:1-20 Luka 8:4-15