TimYancev_az_obs_L3/49.md

49. Allahın yeni Əhdi

İsanın doğulmasından əvvəl mələk Məryəm adlı bir qızın yanına gələrək, onun Allah Oğlunu dünyaya gətirəcəyini dedi. Məryəm bakirə idi, lakin Müqəddəs Ruh onun üzərinə endi və o, hamilə qaldı. Məryəm bir Oğul doğdu və adını İsa qoydu. Buna görə, İsa həm Allah, həm də İnsandır.

İsa Onun Allah olduğunu göstərən bir çox möcüzələr etmişdi. O, suyun üzərində gəzir və fırtınaları sakitləşdirirdi. O, xəstələrə şəfa verirdi və şər ruhları qovurdu. İsa ölüləri dirildirdi və beş çörək və iki kiçik balıqla 5000-dən çox adamı yedirdə bilirdi.

İsa dahi Müəllim idi. Onun bütün təlimi Həqiqət idi. Buna görə biz İsanın əmr etdiklərinə riayət etməliyik, çünki O, Allahın Oğludur. İsanın əsas təlimlərindən biri başqalarını özümüz kimi sevmək idi.

O, eləcə də öyrədirdi ki, Allahı hər şeydən çox, hətta malik olduqlarından da çox sevməyimiz vacıbdir.

İsa demişdir ki, bütün dünyanın var-dövlətinə malik olmaqdansa, Allahın Padşahlığına daxil olmaq daha yaxşıdır. Onun Padşahlığına daxil olmağın üçün, Allah səni etdiyin günahların nəticəsi olan cəzadan xilas etməlidir.

İsa dedi ki, Onu qəbul edən insanlar olacaqdır və Allah onları xilas edəcəkdir. Lakin elə insanlar da olacaqdır ki, Onu qəbul etməyəcəklər. İsa dedi ki, bəzi insanlar münbit torpaq kimidirlər. Allahın Kəlamı toxum kimi bu torpağa düşür və cücərir. Belə insanlar İsanı qəbul edir və Allah onları xilas edir. Lakin digər insanlar yol qırağında olan daş-kəsəkli torpağa bənzəyir. Allahın Kəlamı toxum kimi bu torpağa düşür, lakin cücərmir. Belə insanlar İsanı inkar edirlər. Onlar Onun Səltənətinə girməkdən imtina edirlər.

İsa öyrədirdi ki, Allah bütün insanları, hətta günahkarları da çox sevir. O, hamını bağışlamaq və Öz övladları kimi qəbul etmək istəyir.

Adəm və Həvva günah işlədəndən sonra, onların bütün nəsilləri günahkar doğulur. Bütün insanlar günah edir və Allahdan uzaq olur. Hər bir insan doğulan gündən Allaha və Onun iradəsinə qarşı çıxır.

Lakin Allah insanları elə sevdi ki, Öz yeganə Oğlunu qurban verdi. İsaya iman edənləri Allah cəzalandırmayacaqdır və bütün imanlılar Onunla əbədi yaşayacaqdır.

Sən ölümə layiqsən, çünki sən günahkarsan. Allah üçün səni cəzalandırmaq düzgün olardı. Lakin sənin günahlarına görə sənin əvəzinə İsa cəza çəkmişdir. Allah sənin cəzanı, İsanı çarmıxa çəkəndə Onun üzərinə qoydu.

İsa heç vaxt günah etməmişdir. Lakin O, çarmıxda dəhşətli ölümü ilə günahın cəzasını çəkdi. İsa sənin günahlarını və bu dünyada hər bir insanın günahlarını götürmək üçün kamil qurban oldu. İsa Özünü günahlara görə qurban etdi və buna görə də Allah İsaya iman edən hər kəsin ən ağır günahını belə bağışlayacaqdır.

Hətta çoxsaylı yaxşı əməllər belə səni günahın cəzasından xilas edə bilməz. Allahla barışmaq və Onun dostu olmaq üçün təkbaşına heç nə edə bilməzsən. Amma sən İsanın Allahın Oğlu olduğuna, sənin əvəzinə çarmıxda öldüyünə və Allahın Onu yenidən həyata qaytardığına inanmalısan. Əgər buna inansan, Allah bütün günahlarını bağışlayar.

Allah İsaya iman edən və Onu öz Rəbbi kimi qəbul edən hər kəsi xilas edəcəkdir. Lakin Allah Ona iman gətirməyənləri xilas etməyəcəkdir. Sənin varlı və ya kasıb, kişi və ya qadın, yaşlı və ya gənc olmağından, yaşadığın yerdən asılı olmayaraq Allah səni sevir və O istəyir ki, sən İsaya iman gətirəsən və O sənin Dostun olsun.

İsa səni Ona iman etməyə və vəftiz olunmağa çağırır. İsanın Məsih və Allahın vahid Oğlu olduğuna inanırsanmı? Sən günahkar olduğuna və günahlarına görə Allahın cəzasına layiq olduğuna inanırsanmı? İnanırsanmı ki, İsa sənin günahlarını üzərinə götürmək üçün çarmıxa çəkilmişdir?

Əgər sən İsaya iman etsən, Onun sənin üçün etdikləri barədə danışıb açıq şəkildə etiraf etsən, onda sən İsanın davamçısı olacaqsan. İblis bir daha səni idarə edə bilməyəcəkdir və şər səltənətinin sənin üzərində hökmranlığı olmayacaqdır. Allah Öz salehlik səltənətindən sənə yol göstərəcəkdir. Allah sənə həyatda günaha qarşı durmağa güc verəcəkdir. Allah sənin həyat tərzini dəyişdirib yeniləşdirəcəkdir.

Əgər sən İsaya iman etdinsə, deməli, Allah sənin bütün günahlarını İsanı qurban gətirməklə bağışladı. İndi Allah səni Özünə düşmən deyil, yaxın dost sayır.

Əgər sən indi Allahın dostusansa və İsa sənin Rəbbin, sən isə Onun qulusansa, onda sən İsanın sənə öyrətdiklərini yerinə yetirmək istəyəcəksən. Amma sən İsaya iman etsən belə, iblis səni günah etməyə vadar edəcəkdir. İblis səni sövq edəcəkdir ki, İsaya sadiq şagird olmayasan. Ancaq Allah həmişə vədinə əməl edir. O söz vermişdi ki, əgər sən öz günahlarını etiraf edib onları Allaha söyləsən, onda O səni bağışlayıb günaha qarşı durmağına güc verəcəkdir.

Allah istəyir ki, sən Allahın Kəlamını oxuyasan və dua edəsən. O həmçinin istəyir ki, sən İsanın davamçıları ilə birgə ona ibadət edəsən. Eləcə də sən başqa insanlara Allahın sənin üçün nə etdiyini danışmalısan. Əgər sən Allahın bütün dediklərini yerinə yetirsən, onda sənin Allahla dostluğun daha da möhkəmlənəcəkdir.

Müqəddəs Kitabdan hekayə. Romalılara 3:21-26; 5:1-11; Yəhya 3:16; Mark 16:16; Kolosselilərə 1:13-14; 2 Korinflilərə 5:17-21; 1Yəhya 1:5-10