TimYancev_az_obs_L3/48.md

48. İsa – vəd edilmiş Məsihdir

Allah dünyanı yaratdıqda hər şey kamil idi. Günah mövcud deyildi. Adəm və Həvva Allahı və bir-birini sevirdilər. Dünyada xəstəliklər və ölüm yox idi. Allah dünyanın məhz belə olmasını düşünürdü.

Lakin iblis ilan vasitəsilə danışaraq Həvvanı aldadır və Adəmlə Həvva Allaha qarşı günah işlədirlər. Onlar günah işlətdikləri üçün dünyaya ölüm gəldi və indi hər bir insanın həyatı ölümlə bitir.

Bu günaha görə Adəm və Həvva Allahın iradəsinə itaətsizlik edən Allah düşməninə çevrildilər. Həmin andan Adəm və Həvvanın nəslindən olan hər kəs günahkar olaraq dünyaya gəlir. O, Allaha və Onun iradəsinə qarşı itaətsizlik edir. Allah və insanlar arasında sülh pozulmuşdur. Lakin Allah hər zaman Onunla insanlar arasında əvvəldə olan münasibətləri qaytarmaq istəyirdi.

Allah vəd etmişdi ki, Həvvanın nəslindən olan Biri iblisin başını əzəcəkdir, iblis isə Onu dabanından çalacaqdır. Bu o demək idi ki, iblis Məsihi öldürəcəkdir, lakin Allah Onu yenə də həyata qaytaracaqdır. Məsih iblisin hakimiyyətini əbədi olaraq dağıdacaqdır. Uzun illərdən sonra Allah bəşəriyyətə vəd edilmiş Məsihi göndərir. Bu Məsih İsa idi.

İsanın doğulmasından çox əvvəl, Allah Nuha bir gəmi qurmağı əmr etdi. Çünki Allah istəyirdi ki, Onun Yer üzünə göndərəcəyi daşqından Nuhun ailəsi xilas olsun. Allah günahkar insanları daşqının sularında məhv etməklə cəzalandırmaq istəyirdi. Nuh Allaha inandı və gəmini qurdu. Yalnız Nuh və onun ailəsi xilas oldular. Eləcə də bu günlərdə, hər bir insan ölümə layiqdir, çünki o, günahkardır və Allahın düşmənidir. Lakin Allah İsanı göndərdi ki, Ona inanan hər kəsi xilas etsin.

Yüz illərlə kahinlər günahlardan təmizlənmək üçün Allaha qurbanlar gətirirdilər. Qurbanlar gətirmək insanlara onların günah etmələrini və Allahın cəzasına layiq olduqlarını dərk etməyə kömək edirdi. Lakin qurbanlar insanları günahdan birdəfəlik azad edə bilmirdi. Kahinlərin edə bilmədiklərini İsa etdi. O öz həyatını qurban verdi və hər bir insanın günahını tamamilə məhv etməyə qadir olan yeganə qurban oldu. Bizim öz günahlarımıza görə alacağımız cəzanı, İsa öz üzərinə götürdü. Buna görə İsa – qüdrətli Baş Kahindir.

İbrahim Yer üzündə yaşadığı zaman Allah ona demişdi: “Sənin vasitən ilə Yer üzündə olan bütün xalqlara xeyir-dua verəcəyəm.” İsa İbrahimin nəslindən idi. Bu gün də Allah İbrahimin vasitəsilə İsaya iman edən bütün xalqlardan olan insanlara xeyir-dua verir. Allah onları günah cəzasından azad edir və onları İbrahimin ruhani nəsli hesab etməyə başlayır.

Bir gün Allah İbrahimə oğlu İshaqı qurban verməyi əmr etdi. Lakin İbrahimin itaətini görən Allah ona İshaqın yerinə qurbanlıq üçün bir qoç göndərdi. Biz hamımız günah etdiyimizə görə ölümə layiqik, lakin Allah İsanı bizim yerimizə ölmək üçün qurban verdi. Buna görə də biz İsanı Allahın Quzusu adlandırırıq.

Allah Misirə son cəzanı göndərəndə, hər bir israilli ailəyə bir quzu kəsməyi əmr etdi. Bu, israillilərə Misirə görə cəzadan – hər bir ailənin böyük oğlunun ölümündən qurtarmağa kömək etdi. Qurbanlıq quzunun heç bir qüsuru olmamalı idi. Yəhudilər qapı dirəklərinə quzunun qanını vurmalı idilər. Allah bu qanı görüb yan keçirdi və bu evə cəza gəlmirdi. Allah bu hadisəni Pasxa adlandırdı.

İsa heç vaxt günah etmədi və heç bir şeydə günahkar olmadı. O, Pasxa bayramında öldürülmüş Pasxa Quzusuna bənzəyir. İnsan İsaya iman etməyə başlayanda öz günahlarından İsanın Qanı bahasına qurtulur və Allah onu cəzalandırmır. Sanki Allah bu adamın cəzasını ondan yan keçirir.

Allah israillilərlə əhd bağladı, çünki Allah bu xalqı Özü üçün seçmişdir. Amma Allah Yeni Əhdi bütün xalqlar üçün bağladı. İndi hər kəs Allahla Yeni Əhd bağlayıb Allahın xalqı ola bilər. Bu, İsaya iman etməyin sayəsində baş verir.

Musa Allahın Kəlamını böyük hökmranlıq ilə vəz edən əzəmətli peyğəmbər idi. Amma İsa – bütün peyğəmbərlərdən ən əzəmətlisi idi. O – Allahdır, buna görə də Onun bütün dedikləri və gördükləri işlər Allahın işləri və sözləridir. Məhz buna görə Müqəddəs Kəlamda İsa Allahın Kəlamı adlandırılmışdır.

Allah Davuda söz vermişdi ki, onun nəslindən bir Şəxs Allahın xalqı üzərində əbədi hökmranlıq edəcək. İsa Davudun nəslindən olan həmin Şəxsdir. O, əbədi hökmranlıq edəcəkdir Allahın Oğlu və Məsihdir.

Davud İsrailin padşahı idi, İsa isə bütün Kainatın Padşahıdır! O yenə gələcəkdir və Öz Padşahlığında sülh və ədalətlə əbədi hökmranlıq edəcəkdir.

Müqəddəs Kitabdan hekayə. Yaradılış 1-3; 6; 15; 22; Çıxış 12; 20; İkinci Şamuel 7; İbranilərə 3:1-6; 4:14-5:10; 7:1-8:13; 9:11-10:18; Vəhy 21