See in Reader
5.0 KiB
47. Paul və Sila Filipidə
Şaul Roma imperiyasında səyahət edib Məsih haqqında vəz etdiyi zaman, onu roma adı ilə “Paul” olaraq çağırmağa başladılar. Bir dəfə Paul və onun dostu Sila İsa Məsih haqqında vəz etmək üçün Filipiyə yollandılar. Onlar şəhərdən kənara, imanlıların dua etmək üçün yığışdığı çay sahilinə getdilər. Toplananlar arasında bahalı parçaların ticarəti ilə məşğul olan Lidiya adlı bir qadın var idi. Lidiya Allahı sevir və Ona itaət edirdi.
Allah Lidiyanın ürəyini Paulun vəzlərini anlamaq üçün hazırladı və o, İsaya iman etdi. Paul və Sila Lidiyanı və onun ailəsini vəftiz etdilər. Bundan sonra o, həvariləri öz evinə dəvət etdi və orada qalmalarına təklif elədi. Onlar razılıq verdilər.
Paul və Sila tez-tez dua yerində imanlılarla görüşürdülər. Bir dəfə onlar həmin yerə getdikləri zaman qarşılarına baxıcılıq etməyi bacaran, şər ruha tutulmuş bir kəniz çıxdı. Kəniz falçılıq edərək, öz ağaları üçün külli miqdarda pul qazanırdı.
Hər gün bu kəniz Paul və Silanın arxasınca düşərək qışqırırdı: “Bu insanlar Allah-Taalanın qullarıdır. Onlar sizə xilas yolunu göstərirlər!” O bunu günbəgün təkrar edirdi və Paul bundan bezdi.
Günlərin biri, həmin kəniz yenə qışqırmağa başlayanda, Paul ona tərəf dönüb ondakı şər ruha dedi: “İsa Məsihin ismi ilə sənə əmr edirəm, o qızdan çıx!” Ruh dərhal qızdan çıxdı.
Kənizin ağaları bərk qəzəbləndilər. Onlar başa düşdülər ki, bu şər ruh olmadan onların kənizi daha falçılıq edə bilməyəcəkdir. Bu isə o demək idi ki, onlar qazanclarını itirəcəklər.
Kənizin ağaları Paulla Silanı Roma hökmdarlarının yanına gətirdilər və şəhərdə qarışıqlıq salmaqlarında ittiham etdilər. Bu ittihamlara çoxlu insanlar da qoşuldular. Hakimlər həvariləri dəyənəklə döyüb, sonra zindana atmağı əmr etdilər.
Paul və Silanı zindanın ən çox mühafizəçilər olduğu hissəyə yerləşdirdilər və onların ayaqlarını kündəyə saldılar. Gecə yarısına yaxın Paul və Sila Allaha həmd edərək ilahilər oxumağa başladılar.
Birdən güclü zəlzələ oldu. Zindanın bütün qapıları açıldı və məhbusların üzərindən zəncirlər töküldü.
Mühafizəçi oyanıb zindanın qapılarını açıq gördü. Elə bildi ki, məhbusların hamısı qaçıb. Məhbusların qaçdığına görə edam olunacağından qorxaraq canına qəsd etmək istədi. Paul bunu görəndə bərkdən qışqırıb dedi: “Dayan! Canına qıyma, hamımız buradayıq!”
Mühafizəçi qorxudan titrəyə-titrəyə Paul və Silaya yaxınlaşdı və onları zindandan çıxardı. Sonra o sual verdi: “Mən xilas olmaq üçün nə etməliyəm?“ Paul cavab verdi: “Rəbb İsaya iman et, sən də, ev əhlin də xilas olarsınız.” Mühafizəçi Paul və Silanı evinə aparıb onların yaralarını yudu. Orada Paul bütün ev əhlinə İsa haqqında danışdı.
Mühafizəçi ailəsi ilə birgə İsaya iman etdi və Paul onları vəftiz etdi. Bundan sonra mühafizəçi Paulla Sila üçün süfrə açıb onları yedizdirdi, ev əhli Allaha iman etdiklərinə görə şad idilər. Paulla Sila isə zindana qayıtdılar.
Ertəsi gün hakimlər Paulun Roma vətəndaşı olduğunu bildilər, Paul və Silanın zindandan azad olunmasına əmr verdilər və onların Filipidən çıxıb getməsini xahiş etdilər. Paulla Sila Lidiya və başqa dostları ilə görüşdülər və bundan sonra şəhərdən çıxıb getdilər. İsa haqqında təlim yayılırdı və imanlılar cəmiyyəti böyüyürdü.
Paul və imanlılar cəmiyyətinin başqa rəhbərləri bir çox şəhərləri gəzir və orada İsa haqqında vəz edərək insanları öyrədirdilər. Onlar imanlıların təlimi və təşviqi üçün müxtəlif imanlı cəmiyyətlərinə çoxlu məktub yazdılar. Bu məktublardan bəziləri Müqəddəs Kitabın yazıları oldu.
Müqəddəs Kitabdan hekayə. Həvarilərin İşləri 16:11-40