See in Reader
4.9 KiB
46. Paul İsanın şagirdi olur
Həmin dövrdə Şaul adlı bir insan yaşayırdı. O, İsanın təliminə qarşı idi. Şaul Stefanın daşqalaq olunduğu vaxt da orada idi və onu öldürən insanların geyimlərini qoruyurdu. Daha sonra Şaul imanlıları təqib etməyə başladı. O, Yerusəlimdə evdən-evə gəzir, kişi və qadınları tutaraq zindana atırdı. Bir dəfə Şaul başçı kahinin yanına gəlib ondan Dəməşqdə olan sinaqoqlara ünvanlanmış məktublar istədi ki, orada olan İsanın ardıcıllarını həbs edib, Yerusəlimə göndərmək hüququ olsun.
Belə məktublar alıb Şaul Dəməşqə yola düşdü. O, şəhərə yaxınlaşdıqda, səmadan gələn parlaq nur ətrafı işıqlandırdı və Şaul yerə yıxıldı. O, Kiminsə onunla danışdığını eşitdi: “Şaul! Şaul! Nə üçün Məni təqib edirsən?” Şaul soruşdu: “Ey Ağam, Sən kimsən?” Səs cavab verdi: “Mən sənin təqib etdiyin İsayam!”
Şaul yerdən qalxdı, amma heç nə görə bilmirdi. Şaulla birlikdə yola çıxanlar onu Dəməşqə apardılar. Üç gün ərzində o nə yedi, nə də içdi.
Dəməşqdə Xananya adlı bir şagird yaşayırdı. Allah ona dedi: “Şaul qaldığı evə get. Əllərini onun üzərinə qoy ki, o, yenidən görə bilsin.” Xananya dedi: “Ya Rəbb! Bu insanın imanlıları təqib etməyindən çox eşitmişəm.” Allah ona cavab verdi: “Get! Mən onu seçmişəm ki, yəhudilərə və başqa xalqlardan olan insanlara Mənim haqqımda danışsın. O, Mənim uğrumda çoxlu əzablardan keçməli olacaqdır.”
Xananya Şaulun yanına getdi, əllərini onun üzərinə qoydu və dedi: “Bura gələrkən yolda sənə görünən İsa məni bura göndərdi ki, sən yenidən görə biləsən və Müqəddəs Ruhla dolasan.” Həmin an Şaul görməyə başladı və Xananya onu vəftiz etdi. Sonra Şaul bir az yemək yedi və taqətə gəldi.
Şaul bir neçə gün Dəməşqdə İsanın şagirdləri ilə qaldı və sinaqoqlarda yəhudilərə vəz etdi. O deyirdi: “İsa – Allahın Oğludur!” Yəhudilər çox təəccübləndilər, çünki Şaul əvvəl şagirdləri təqib edirdi, indi isə o özü də İsaya inanmağa başladı! Şaul yəhudilərlə mübahisə edərək onlara İsanın Məsih olduğunu sübut edirdi.
Aradan xeyli gün keçdi. Yəhudilər Şaulu öldürmək qərarına gəldilər və sui-qəsd hazırladılar. Onu öldürmək üçün adamları şəhər darvazalarının qarşısında gözləməyə göndərdilər. Amma onların bu qəsdi haqqında xəbər Şaula çatdı və dostları ona qaçmağa kömək etdilər. Gecə onu götürüb bir səbətin içinə qoyaraq şəhər divarlarından aşağı endirdilər. Şaul Dəməşqdən qaçdıqdan sonra İsa haqqında təbliğ etməyə davam etdi.
Şaul həvarilərlə görüşmək üçün Yerusəlimə getdi, lakin hamı ondan qorxurdu və onun İsanın davamçısı olduğuna inanmırdılar. Onda Barnaba adlı bir imanlı Şaulu həvarilərin yanına gətirdi. O, Şaulun Dəməşqdə İsanın adını necə cəsarətlə bəyan etdiyini onlara danışdı. Bundan sonra həvarilər Şaulu qəbul etdilər.
Yerusəlimdəki təqiblərdən qaçmış bəzi imanlılar uzaq Antakya şəhərinə yollandılar və orada İsa haqqında vəz edirdilər. Antakyada yaşayan əhalinin çoxu yəhudi deyildi, amma İsanın şagirdlərinin vəzlərini eşitdikdən sonra imanlı oldular. Onlar İsanın Allahın Oğlu olduğuna inanan, ilk yəhudi olmayan insanlar idi. Barnaba ilə Şaul yeni şagirdlərə İsa haqqında daha da çox danışmaq və imanlı cəmiyyətinin ruhani böyüməsi üçün Antakyaya yollandılar. İsaya iman edənlər ilk dəfə olaraq məhz Antakyada “məsihçi” adlandırıldılar.
Bir dəfə İsanın şagirdləri Antakyada oruc tutub dua edərkən, Müqəddəs Ruh onlara dedi: Barnaba ilə Şaulu Mənim üçün ayırın ki, onlar üçün təyin etdiyim işləri görsünlər. Antakyada olan imanlılar əllərini Barnaba və Şaulun üzərinə qoyub, onlar üçün dua etdilər. Bundan sonra Barnaba ilə Şaul Antakyadan çıxıb getdilər. Onlar başqa millətlərə vəz edirdilər və onlardan çoxları İsaya iman etdi.
Müqəddəs Kitabdan hekayə. Həvarilərin İşləri 8:3; 9:1-31; 11:19-26; 13:1-3