See in Reader
5.2 KiB
45. Stefan və Filip
İmanlılar cəmiyyəti böyüyürdü və həvarilər cəmiyyəti idarə etmək üçün özlərinə köməkçilər seçmişdilər. Onlardan biri hamının hörmət etdiyi Stefan adlı bir adam idi. O, Müqəddəs Ruhun qüdrəti və müdrikliyi ilə dolu idi və çoxlu möcüzələr edirdi. Bir çoxları Stefanın vəzlərindən sonra İsanın şagirdi olurdu.
Bir dəfə Stefan İsa haqqında öyrədərkən, digər vilayətlərdən olan yəhudilər onunla mübahisə etdilər, lakin onun müdrikliyinə qarşı dura bilmədilər. O zaman onlar şaiyələr yaymağa başladılar ki, guya Stefan Musa və Allaha qarşı təhqiredici sözlər demişdir. Bu şaiyələr rəhbərləri və qanunşünasları qəzəbləndirdi. Onlar Stefanı tutaraq başçı kahinin yanına gətirdilər. Bura eləcə də yalançı şahidlər də gəlib, Stefan haqqında yalan danışırdılar.
Başçı kahin Stefandan soruşdu: “Bu insanların sənin haqqında dedikləri həqiqətdir?” Stefan İbrahimdən başlamış İsaya qədər olan müddət ərzində, Allahın İsrail xalqı üçün etdiyi möcüzələri haqqında danışmaqla ətraflı cavab verdi. Lakin insanlar Allahı dinləmək istəmirdilər və Onun iradəsinə qarşı hərəkət edirdilər. Stefan dedi: “Siz inadkar və Allaha itaət etməyən insanlarsınız! Sizin əcdadlarınız Allahı inkar edib Onun peyğəmbərlərini öldürdükləri kimi, siz də Müqəddəs Ruhu inkar edirsiniz! Lakin siz daha da pis etdiniz! Siz Məsihi öldürdünüz!”
Orada olan insanlar bunları eşidib çox bərk qəzəbləndilər, qulaqlarını tutub haray qopardılar və Stefanın üstünə hücum etdilər. Onu tutub şəhərdən kənara çıxartdılar və daş-qalaq edib öldürdülər.
Stefan daş-qalaq edilən vaxt deyirdi: “Rəbb İsa, ruhumu qəbul et!” Sonra diz çöküb ucadan nida etdi: “Ya Rəbb, bunu onlara günah sayma!” Bu sözlərdən sonra o, gözlərini bu dünyaya yumdu.
Həmin günlərdə Yerusəlimdə olan çox adam İsanın şagirdlərini təqib etməyə başladı. Buna görə imanlılar Yəhudeya və Samariyanın hər tərəfinə qaçdılar. Lakin təqiblərə baxmayaraq, onlar hara getsələr, İsa haqqında təbliğ edirdilər.
Həvarilərin köməkçilərindən biri də Filip adlı bir adam idi. O, digər şagirdlərin çoxu kimi Yerusəlimdən qaçdı. Filip Samariyaya getdi və orada İsa haqqında vəz edirdi. Çox adam ona inandı və xilas oldu. Bir gün Allahın mələyi Filipin yanına gəldi və ona müəyyən bir yolla səhraya getməyi tapşırdı. Filip belə də etdi. O, səhraya getdi və yolda arabada gedən bir adam gördü. Həmin adam Həbəşdən olan mühüm bir məmur idi. Müqəddəs Ruh Filipə dedi ki, o adama yaxınlaşıb onunla danışsın.
Filip arabaya yaxınlaşdı və həbəşlinin Allahın Kəlamını oxuduğunu eşitdi. Bu, Yeşaya peyğəmbərin kitabından olan sözlər idi: “Onu quzu kimi kəsməyə apardılar. Quzu susduğu kimi O da bir söz demədi. Onu alçaltdılar, haqsız yerə məhkum etdilər və canını Ondan aldılar.”
Filip həbəşlidən soruşdu: “Nə oxuduğunu başa düşürsən?” Həbəşli ona belə cavab verdi: “Xeyr. Kimsə mənə izah etməsə, başa düşə bilməyəcəyəm. Zəhmət olmasa, qalx və yanımda otur. Yeşaya kimdən bəhs edir, özündən, yoxsa başqasından?”
Filip arabaya minib həbəşliyə izah etdi ki, Yeşaya bu peyğəmbərliyi İsa haqqında yazır. Filip həm də Allahın Kəlamındakı bir çox başqa ayələrdən danışaraq, həmin insana İsa haqqında Xoş Xəbəri çatdırdı.
Həmin vaxt Filip və həbəşli suyun yanından keçirdilər. Həbəşli soruşdu: “Bax, budur su. Mən burada vəftiz ola bilərəm?” Filip ona cavab verdi: “Əgər bütün qəlbinlə iman edirsənsə, ola bilərsən. Həbəşli cavabında dedi: “Bəli, mən iman edirəm ki, İsa Allahın Oğludur.” Bundan sonra o, arabanın dayanmasını əmr etdi.
Onlar suya girdilər və Filip həbəşlini vəftiz etdi. Onlar sudan çıxandan sonra Müqəddəs Ruh, birdən Filipi göturüb başqa yerə apardı. Orada Filip İsa haqqında insanlara vəz etməyə davam etdi.
Həbəşli yoluna davam etdi. O, İsaya iman etdiyinə görə çox xoşbəxt idi.
Müqəddəs Kitabdan hekayə. Həvarilərin İşləri 6:8-8:5; 8:26-40