See in Reader
4.8 KiB
43. İmanlılar cəmiyyətinin yaranması
İsa göylərə qayıtdıqdan sonra, Onun şagirdləri O əmr etdiyi kimi Yerusəlimdə qaldılar. Onlar dua etmək üçün daim bir araya gəlirdilər.
Hər il Pasxa bayramından 50 gün sonra yəhudilər Əllinci Gün adlanan məhsul bayramını qeyd edirdilər. Bütün dünyada olan yəhudilər bayramı bir yerdə qeyd etmək üçün Yerusəlimdə yığışırdılar. İsa çarmıxa çəkilib və sonra ölülərdən dirildiyi il, Əllinci Gün bayramı Onun göylərə qayıtmasından təxminən bir həftə sonraya təsadüf etmişdi.
Əllinci gün bayramı zamanı bütün imanlılar bir yerə yığılmışdı. Birdən güclü külək uğultusu kimi göydən bir səs gəlib, onlar olduqları evin hər tərəfini bürüdü. Qəfildən onların başı üzərində alov dillərinə bənzər nə isə peyda oldu. İmanlılar hamısı Müqəddəs Ruhla doldu və Allahı müxtəlif dillərdə izzətləndirməyə başladılar. Onlar bu dilləri bilmirdilər, lakin bu dillər Müqəddəs Ruhun onlara danışmaq üçün verdiyi dillər idi.
Yerusəlimdə yaşayan insanlar bu səsləri eşidib bir yerə yığışdılar. Nə baş verdiyini hamı görmək istəyirdi. Bura yığışan adamlar müxtəlif ölkələrdən idilər və müxtəlif dillərdə danışırdılar. İsanın şagirdləri isə Qalileyadan idilər və yalnız aramey və yunan dilində danışa bilirdilər. Lakin bu gün İsanın şagirdləri müxtəlif dillərdə danışırdılar və insanlar çox təəccübləndilər, cünki izdihamda olan hər bir insan Allahın əzəmətli işləri haqqında xoş xəbəri öz doğma dilində eşidirdi.
İzdihamda olan bəzi insanlar istehza edib dedilər ki, şagirdlər şərab içiblər və sərxoşdurlar. Lakin Peter onlara ucadan dedi: “Mənə qulaq asın! Bu insanlar sərxoş deyillər! Amma sizin gördükləriniz Yoel peyğəmbərin əvvəlcədən dediyi hadisədir: “Allah dedi ki, axır zamanda bütün insanların üzərinə Öz Ruhundan bol-bol tökəcəkdir.”
Ey israillilər, qulaq asın! İsa Kim olduğunu göstərmək üçün bir çox əlamətlər və möcüzələr yaradan bir Şəxs idi. Allahın gücü ilə O, bir çox möcüzə yaratmışdır. Və sizin bundan xəbəriniz vardır, çünki bunun hamısını siz görmüsünüz. Lakin siz Onu çarmıxa çəkdiniz!
Siz İsanı öldürsəniz də, Allah Onu ölülər arasından diriltdi. Beləliklə, peyğəmbərlik yerinə yetdi və orada yazılmışdı: “Sən, Müqəddəsinin qəbirdə çürüməsinə imkan verməyəcəksən.” Biz də şahidik ki, Allah İsanı diriltdi.
Ata Allah İsaya sağında oturmaq şərəfini verdi. İsa vəd etdiyi kimi, bizə Müqəddəs Ruhu göndərdi. Hal-hazırda gördüyünüz və eşitdiyiniz hər şeyi edən Müqəddəs Ruhdur.
Siz İsa adlı bu Şəxsi çarmıxa çəkdiniz. Ancaq bilin ki, Allah sizin çarmıxa çəkdiyiniz bu İsanı mövcud olan hər şeyin üzərində həm Rəbb, həm də Məsih təyin etmişdir.”
Peteri dinləyənlər onun sözlərindən çox təsirləndilər. Onlar Peterdən və şagirdlərdən soruşdular: “Qardaşlar, bəs biz nə edək?”
Peter cavab verdi: “Hamınıza Allahdan günahlarınızın bağışlanması lazımdır. Beləliklə, qoy hər biriniz tövbə etsin və İsa Məsih ismi ilə vəftiz olunsun. Onda Allah sizə bəxşiş olaraq Müqəddəs Ruhu göndərəcəkdir.”
Həmin gün 3000 nəfər Peterin dediklərinə inandı. Onlar öz günahlarına görə tövbə edib vəftiz oldular və İsanın şagirdləri olub imanlılar cəmiyyətinə qoşuldular.
İmanlılar tez-tez birlikdə yığışırdılar. Onlar həmişə həvarilərin öyrətdiklərinə qulaq asırdılar, dua edirdilər və Allahı izzətləndirirdilər. Onlar birlikdə yemək yeyir və sahib olduqları hər bir şey ilə bir-biri ilə bölüşürdülər. Şəhərdə hamı onlar haqqında yaxşı fikirdə idi. Hər gün iman edənlərin sayı artırdı.
Müqəddəs Kitabdan hekayə. Həvarilərin İşləri 2