See in Reader
2.9 KiB
41. Allah İsanı ölülərdən dirildir
Əsgərlər İsanı çarmıxa çəkdikdən sonra, başçı kahinlər və fariseylər Pilatın yanına gəldilər və dedilər: “Bu yalançı hələ sağ ikən deyirdi ki, üç gündən sonra ölülərdən diriləcəkdir. Onun məzarının qarşısına üç gün ərzində gözətçilər qoy ki, şagirdləri Onun cəsədini oğurlayıb xalqa deməsinlər ki, O ölüb dirildi.”
Pilat dedi: “Gözətçi götürün və Onun məzarını istədiyiniz kimi mühafizə edin.” Onlar getdilər və məzarın girişində olan daşı möhürlədilər və qarşısına gözətçilər qoydular ki, heç kəs İsanın cəsədini oğurlamasın.
İsanın ölən gününün səhəri şənbə günü idi. Bu gündə işləmək və başqa işlərlə məşğul olmaq qadağan olunmuşdu. Buna görə İsanın şagirdləri Onun məzarına gedə bilmədilər. Şənbə günü keçəndən sonra, bir neçə qadın səhər tezdən İsanın məzarına getmək qərarına gəldilər. Qadınlar Onun bədəni üçün ətirli məlhəm və yağlar hazırladılar.
Qadınlar məzara çatmamış möhkəm zəlzələ başladı. Bu vaxt göydən bir mələk endi. Məzarın girişini bağlayan daşı qırağa çəkib üstündə oturdu. Mələk ildırım kimi işıq saçırdı. Məzarın gözətçiləri onu görüb qorxdular və yerə ölü kimi düşdülər.
Qadınlar məzara gələndə bir mələk gördülər. O, onlara dedi: “Məndən qorxmayın. Bilirəm ki, siz İsanı axtarırsınız, amma O, burada deyildir. O, dediyi kimi, ölülərdən dirildi! Məzarın içinə baxın və özünüz görəcəksiniz”. Qadınlar məzarın içinə baxıb İsanın qoyulduğu yeri gördülər. Onun cəsədi orada yox idi!
Mələk qadınlara dedi: “Gedin və şagirdlərə deyin ki, İsa ölülər arasından dirildi və sizi Qalileyada qarşılayacaqdır.”
Qadınlar çox təəccübləndilər və sevindilər. Onlar bu xoş xəbərlə bölüşmək üçün İsanın şagirdlərinin yanına qaçdılar.
Qadınlar yolda gedərkən İsa qəflətən onların qarşısına çıxdı. Onlar diz çöküb İsanın ayaqlarına sarıldılar. İsa dedi: “Qorxmayın. Gedin, Mənim şagirdlərimə deyin ki, Qalileyaya getsinlər. Məni orada görəcəklər.”
Müqəddəs Kitabdan hekayə. Matta 27:62-28:15; Mark 16:1-8; Luka 24:1-12; Yəhya 20:1-18