See in Reader
4.8 KiB
39. İsa Ali Şuranın önündə
Gecənin yarısı əsgərlər İsanı başçı kahinin evinə gətirdilər, çünki o, İsanı sorğu-sual etmək istəyirdi. Peter məsafə saxlayaraq onların ardınca gedirdi. Əsgərlər İsanı başçı kahinin yanına gətirdikdə, Peter həyətdə qalıb tonqala yaxınlaşdı. Bu tonqalın ətrafında nökər və mühafizəçilər isinirdilər.
Elə bu vaxt yəhudi nəsillərinin başçıları və qanunşünaslar başçı kahinin evində İsanı ittiham etməyə başladılar. Onlar İsanı mühakimə edən çoxlu yalançı şahidlər tapdılar. Lakin onların ifadələri bir-birinə uyğun gəlmirdi, buna görə İsanın günahını isbat edə bilmədilər. İsa isə Özünü müdafiə etmək üçün heç bir şey demirdi.
Nəhayət, başçı kahin İsadan birbaşa soruşdu: “Allahın Oğlu Məsih Sənsənmi?”
İsa cavab verdi: “Hə, Mən Məsihəm, siz Məni Allahın yanında oturan və buludların üzərində göydən gəldiyimi görəcəksiniz.” İsanın bu sözlərindən bərk qəzəblənən başçı kahin əynindəki paltarını cırdı. O, ucadan qışqırdı: “Artıq bizə bu adamın nə etdiyini bilən şahidlər lazım deyildir! Onun Özünü Allahın Oğlu saydığını siz eşitdiniz. Ona qarşı qərarınız nə olacaqdır?”
Orada olan hər kəs başçı kahinin cavabında: “O, ölüm cəzasına layiqdir!” – deyə, qışqırdılar. Onlar İsanın gözlərini bağlayıb üzünə tüpürməyə, döyməyə, lağ etməyə başladılar.
O zaman Peter həyətdə gözləyirdi. Onu kənizlərdən biri gördü. O, Peterə dedi: “Sən də İsa ilə birlikdə idin.” Peter bunu inkar etdi. Bir az sonra başqa qız eyni sözü dedi. Lakin Peter yenə də bunu inkar etdi. Nəhayət, başqa adamlar da dedilər: “Biz bilirik ki, sən İsa ilə birlikdə idin, çünki, hər ikiniz Qalileyadansınız.”
Peter and içərək deyirdi ki, İsanı tanımır. O deyirdi: “And olsun, mən bu Adamı tanımıram və dediklərinizi anlamıram.” Onda İsa dönüb Peterə baxdı və o, İsanın: “Bu gecə xoruz banlamazdan əvvəl sən Məni üç dəfə inkar edəcəksən.” sözünü yadına saldı.
Peter həyətdən çıxıb hönkür-hönkür ağladı. O zaman Yəhuda öyrəndi ki, xəyanət etdiyi İsanı edam etmək istəyirlər. O, peşman olaraq pulu baş kahinlərə və ağsaqqallara qaytardı, sonra isə gedib özünü asdı.
O zamanlar Pilat Yəhudeyada Roma valisi idi. Başçı kahinlər və ağsaqqallar İsanı Pilatın yanına gətirdilər. Onlar Roma valisinin İsanı mühakimə etməsini və Onu ölümə məhkum etməsini istəyirdilər. Pilat İsadan soruşdu: “Sən – Yəhudilərin Padşahısan?”
İsa cavab verdi: “Sən doğru söylədin. Amma Mənim Padşahlığım yer üzündə deyildir. Əgər belə olsaydı, onda Mənim qullarım Mənə görə burada mübarizə aparardılar. Mən Allah haqqında həqiqəti söyləmək üçün yer üzünə gəldim. Həqiqəti sevən hər kəs Mənim sözümə qulaq asır.” Pilat Ondan soruşdu: “Bəs onda həqiqət nədir?”
İsa ilə danışdıqdan sonra Pilat xalqın qarşısına çıxaraq dedi: “Bu adamın ölümə layiq olduğuna heç bir səbəb tapmadım.” Lakin baş kahinlər, ağsaqqallar və xalq qışqırmağa başladı: “Onu çarmıxa çək!” Pilat cavab verdi: “Sizin ittihamlarınızda Onun heç bir təqsiri yoxdur.” Amma onlar daha da ucadan qışqırmağa başladılar. Onda Pilat üçüncü dəfə dedi: “Onun heç bir təqsiri yoxdur!” Lakin izdiham daha da ucadan qışqırdı: “Onu çarmıxa çək!”
Xalqın üsyan edəcəyindən qorxaraq, Pilat onların tələbləri ilə razılaşdı və əsgərlərə İsanı çarmıxa çəkməyi əmr verdi. Roma əsgərləri İsanı qamçı ilə döydülər. Bundan sonra lağ edərək, əyninə bahalı libas geyindirib, başına tikandan hörülmüş çələng qoydular. Onlar deyirdilər: “Baxın, Yəhudilərin Padşahı budur!”
Müqəddəs Kitabdan hekayə. Matta 26:57-27:37; Mark 14:53-15:18; Luka 22:54-23:38; Yəhya 18:12-19:16