TimYancev_az_obs_L3/37.md

37. İsa Lazarı ölülərdən dirildir

O zaman Lazar adlı bir insan yaşayırdı. Onun iki bacısı var idi – Marta və Məryəm. Lazar, Marta və Məryəm İsanın yaxın dostları idi. Bir dəfə İsaya dedilər ki, Lazar çox bərk xəstələnmişdir. İsa bu barədə eşitdikdə dedi: “Bu xəstəlik Lazarın ölümü ilə bitməyəcəkdir. Lakin onun vasitəsilə insanlar Allahı izzətləndirəcəklər.”

İsa dostlarını sevirdi, buna baxmayaraq, Lazarın xəstəliyi haqqında xəbər tutsa da, həmin yerdə əlavə iki gün də qaldı. Bundan sonra Öz şagirdlərinə dedi: “Gəlin Yəhudeyaya qayıdaq.” Lakin şagirdləri cavab verdilər: “Müəllim, bu yaxınlarda Yəhudeyada yaşayanlar Səni öldürmək istəyirdilər!” İsa dedi: “Dostumuz Lazar yuxuya gedib və Mən onu oyatmalıyam.”

Şagirdlər İsaya dedilər: “Müəllim, əgər Lazar yuxuya gedibsə, deməli, sağalacaqdır.” Onda İsa onlara açıq dedi: “Lazar ölmüşdür. Mən sevinirəm ki, orda deyildim, çünki indi Mənə olan imanınız artacaqdır.”

İsa dostları yaşadığı kəndə gəldikdə, Lazar artıq dörd gün idi ki, ölmüşdü. Marta İsanı qarşılamağa çıxdı və dedı: “Ya Rəbb, Sən burada olsaydın, mənim qardaşım ölməzdi. Ancaq inanıram ki, Sən Allahdan nə istəsən, O, Sənə verəcəkdir.”

İsa dedi: “Dirilmə və həyat Mənəm. Mənə iman edən ölsə də, yaşayar. Mənə iman edən hər kəs heç vaxt ölməz. Buna inanırsanmı?” Marta cavab verdi: “Bəli, ya Rəbb! İnanıram ki, Sən – Allahın Oğlu Məsihsən!”

Sonra Məryəm gəldi. O, İsanın ayaqlarına düşüb dedi: “Ya Rəbb, əgər Sən burada olsaydın, qardaşım ölməzdi.” İsa bacılardan: “Lazarı haraya qoymusunuz?” – deyə, soruşdu. Onlar Ona: “Məzara. Get, bax.” – dedilər. İsa ağladı.

Məzar bir mağara idi və girişi böyük bir daş ilə bağlanırdı. İsa məzara yaxınlaşanda dedi ki, daşı götürsünlər. Amma Marta dedi: “Lazar dörd gündür ki, ölmüşdür. Artıq cəsədi iylənmişdir.”

İsa dedi: “Məgər Mən sənə söyləmədimmi, Mənə iman etsən, Allahın qüdrətini görəcəksən?” Camaat isə məzarın girişindəki daşı götürdü.

İsa göyə baxıb dedi: “Ata, Məni eşitdiyin üçün Sənə minnətdaram. Mən bilirəm ki, Sən həmişə Məni eşidirsən. Amma Mən bütün bunları ona görə deyirəm ki, burada duran insanlar Mənim Sən tərəfindən göndərildiyimə iman etsinlər.” Sonra İsa ucadan söylədi: “Lazar, məzardan çıx!”

Lazar məzardan çıxdı! O, kəfənə bürünmüş idi. İsa camaata dedi: “Kəfəni açıb Lazarı azad edin!” Bu möcüzəni görən yəhudilərin çoxu İsaya iman etdi.

Amma yəhudi kahinləri və fariseylər qorxdular ki, bütün xalq İsaya Məsih kimi iman etməyə başlayar. Buna görə onlar İsa ilə Lazarı necə öldürəcəklərini müzakirə etmək üçün bir yerə toplaşdılar.

Müqəddəs Kitabdan hekayə. Yəhya 11:1-47