See in Reader
2.6 KiB
30. İsa beş min nəfəri doydurur
İsa Öz həvarilərini müxtəlif kəndlərə göndərdi ki, onlar insanlara Səmavi Padşahlıq haqqında vəz etsinlər. Şagirdlər İsanın yanına qayıtdıqda, Ona bütün etdiklərini danışdılar. İsa onlara Onunla birgə gölün qarşı tərəfində sakit bir yerə getməyi təklif etdi. Onlar qayığa mindilər və digər sahilə yola düşdülər.
Bir çox insan İsa və Onun şagirdlərinin qayıq ilə yola düşdüyünü gördü. Bu adamlar digər sahilə İsadan qabaq çatmaq üçün gölün qırağı ilə qaçdılar. Buna görə İsa və onun şagirdləri sahilə çatdıqda, onları artıq böyük bir izdiham gözləyirdi.
Bu izdihamda qadın və uşaqlardan savayı, 5000-dən çox kişi var idi. İsanın ürəyi bu insanlara qarşı şəfqətlə doldu. İsa üçün onlar çobansız qoyunlar kimi idi. Buna görə O, onlara çox şeylərin təlimini keçdi və xəstə olanlara şəfa verdi.
Axşam şagirdlər İsaya dedilər: “Artıq gecdir. İnsanları burax, qoy gedib yaxın kəndlərdə özlərinə yemək alsınlar.”
Lakin İsa şagirdlərinə dedi: “Onlara yeməyi siz verin!” Şagirdlər soruşdular: “Biz bunu necə edə bilərik? Cəmi beş çörək və iki balaca balığımız vardır.”
Onda İsa şagirdlərinə tapşırdı ki, insanları çəmənin üstündə əlli nəfərlik qruplarla oturtsunlar.
Bundan sonra İsa beş çörək və iki balıq götürdü, göyə baxdı və yemək üçün Allaha şükür duası etdi.
Sonra İsa balıq və çörəkləri hissələrə bölüb şagirdlərə verdi ki, onlar bunu camaata paylasınlar. Şagirdlər yeməyi paylayırdılar amma yemək qurtarmırdı. Yemək hamıya çatdı, hamı doyunca yedi və hətta artıq qaldı.
Bundan sonra şagirdlər artıq qalan hissələrdən 12 dolu zənbil yığdılar. Bütün bu yeməklər möcüzəvi şəkildə beş çörək və iki balıqdan alındı.
Müqəddəs Kitabdan hekayə. Matta 14:13-21; Mark 6:31-44; Luka 9:10-17; Yəhya 6:5-15