TimYancev_az_obs_L3/26.md

26. İsa xidmətinə başlayır

İsa iblisin sınaqlarına qalib gəldikdən sonra yaşadığı Qalileya bölgəsinə qayıtdı. Müqəddəs Ruh Ona böyük güc verirdi. İsa Qalileyada bir şəhərdən digərinə, müxtəlif yerlərə gedərək insanlara nəsihətlər verirdi. Hamı Onun haqqında xoş sözlər deyirdi.

Bir dəfə İsa uşaqlığını keçirdiyi Nazaret şəhərinə yola düşdü. Şənbə günü İsa sinaqoqa, dua evinə getdi. Orada Ona Yeşaya peyğəmbərin sözləri olan tumar verdilər ki, bu kitabdan bir parçanı ucadan oxusun. İsa tumarı açdı və oxumağa başladı.

O, ucadan oxudu: “Allah Mənə Öz Ruhunu verdi ki, Mən Xoş Xəbəri yoxsullara bəyan edim. O Məni məhbusları azad etməyə, korların gözünü açmağa və zülmdə olanları azadlığa buraxmağa göndərib. Bu, Allahın Bizə mərhəmət göstərəcəyi və kömək edəcəyi vaxtdır.”

Sonra İsa oturdu. Orada olan hər kəs diqqətlə Ona baxırdı. Onlar bilirdi ki, İsanın Müqəddəs Kitabdan oxuduğu ayə Məsih haqqındadır. İsa dedi: “Mənim sizin üçün oxuduğum indi icra olunur.” Hamı çox təəccübləndi. Onlar deyirdilər: “Məgər bu, Yusifin oğlu deyilmi?”

Sonra İsa dedi: “Doğrudur, insanlar onun böyüdüyü şəhərdə peyğəmbəri heç vaxt qəbul etmirlər. İlyas peyğəmbərin dövründə İsraildə çoxlu dul qadın var idi. Amma üç il yarım yağış yağmayanda Allah İlyası İsraildən olan dul qadının yanına deyil, başqa millətdən olan dul qadının yanına göndərdi.”

İsa davam etdi: “Elişa peyğəmbərin dövründə İsraildə dəri xəstəliklərindən əziyyət çəkən çoxlu insan var idi. Lakin Elişa onların heç birinə şəfa vermədi. O, yalnız İsrailin düşmənlərinin ordu başçısı Naamanın dəri xəstəliyini sağaltdı.” İsanı dinləyən insanlar yəhudi idi. Ona görə də Ondan belə sözləri eşidəndə qəzəbləndilər.

Nazaret sakinləri İsanı tutub sinaqoqdan çıxartdılar. Onu qayadan atıb öldürmək üçün uçurumun kənarına gətirdilər. Lakin İsa izdihamın arasından keçib Nazaretdən çıxıb getdi.

Bundan sonra İsa Qalileya şəhərində gəzirdi və Onun yanına çoxlu insan gəlirdi. Onun yanına çoxlu xəstə, görmə, eşitmə qabiliyyəti olmayan, danışa bilməyənləri və şikəstləri gətirirdilər. İsa onlara şəfa verirdi.

Həmçinin, İsanın yanına cinə tutulmuş insanları da gətirirdilər. İsa cinlərə insandan çıxmağı əmr edirdi və onlar çıxırdılar. Çox vaxt cinlər çığırırdı: “Sən – Allahın Oğlusan!” Amma İsa onlara Onun kim olması barədə danışmağı qadağan edirdi. Bütün camaat heyrətə gəlib İsanın belə gücü və hökmü olmasına görə Allaha həmdlər edirdilər.

İsanın ardınca çoxlu insan gedirdi və onlardan bəziləri Onun şagirdi olurdu. İsa şagirdlərinin arasından 12 nəfər seçdi, onlar Onun xüsusi nümayəndələri oldu. İsa onları “həvari” adlandırdı. Həvarilər İsanın ardınca gedirdilər və Ondan öyrənirdilər.

Müqəddəs Kitabdan hekayə. Matta 4:12-25; Mark 1:14-15; 35-39 3:13-19 və Luka 4:14-30; 38-44