3.1 KiB
24. Yəhya İsanı vəftiz edir
Zəkəriyyə və Elizavetin oğlu Yəhya böyüyüb peyğəmbər oldu. O, səhralıq yerlərdə yaşayır, çöl balı və çəyirtkə yeyirdi, özü də dəvə yunundan libas geyinirdi.
Bir çoxları Yəhyanı dinləmək üçün səhralıq yerlərə gəlirdilər. O, belə vəz edirdi: “Tövbə edin! Çünki Səmavi Padşahlıq yaxınlaşmışdır!”
Yəhyanın sözlərini eşidən bir çox insan tövbə edirdi və Yəhya onları İordan çayında vəftiz edirdi. Bir çox ruhani rəhbərlər də vəftiz olmağa gəlirdilər, lakin onlar öz günahlarını qəbul etmir və tövbə etmirdilər.
Yəhya ruhani rəhbərlərə deyirdi: “Siz – gürzələr nəsli! Tövbə edin və layiqli bəhrə verin! Allah yaxşı bəhrə verməyən hər ağacı kəsəcək və oda atacaqdır.” İnsanların çoxu Yəhyanı Allahdan gələn peyğəmbər sayırdı və ona hörmət edirdi. Yəhya peyğəmbərlərin dediklərini həyata keçirtdi: “Budur, Sənin önündə Öz elçimi göndərirəm. O, Sənin yolunu hazırlayacaqdır. Qoy bütün dərələr dolsun, dağlar ensin, dolama yollar düz olsun, əyri yollar hamar olsun.”
Bəzi ruhani rəhbərlər Yəhyadan soruşdular: “Sən Məsihsənmi?” Yəhya cavab verdi: “Mən Məsih deyiləm. O, Məndən sonra gələcəkdir və Məndən daha qüdrətlidir. Mən əyilib Onun çarıqlarının bağını açmağa belə layiq deyiləm.”
Ertəsi gün İsa vəftiz olunmaq üçün Yəhyanın yanına gəldi. Yəhya Onu görəndə dedi: “Baxın! Dünyanın günahını üzərinə götürən Allahın Quzusu budur.”
Sonra Yəhya İsaya dedi: “Mən Səni vəftiz etməyə layiq deyiləm. Məni vəftiz etməli olan Sənsən”. Amma İsa dedi: “Xeyr. Sən Məni vəftiz etməlisən, çünki Allahın iradəsi yerinə yetəcəkdir.” İsa heç vaxt günah etməsə də, Yəhya Onu vəftiz etdi.
İsa vəftiz olduqdan sonra sudan çıxdı, Allahın Ruhu göydən göyərçin şəklində İsanın üzərinə endi. Elə həmin an göylərdən Allahın sədası gəldi: “Bu, Mənim Oğlumdur! Mən Onu sevirəm və Ondan çox razıyam!”
Allah hər şeyin belə olacağını Yəhyaya öncədən söyləmişdi: “Müqəddəs Ruh vəftiz edəcəyin bir İnsanın üzərinə gələcəkdir. Həmin İnsan Allahın Oğlu olacaqdır.” Bu hekayə üç şəxsdə bir Allahın olduğunu göstərir. Yəhya İsanı vəftiz edəndə Ata Allahı eşitdi, Oğulu və Müqəddəs Ruhu gördü.
Müqəddəs Kitabdan hekayə. Matta 3; Mark 1:9-11; Yəhya 1:6-34 və Luka 3:1-23