See in Reader
6.6 KiB
21. Allahın Məsihin gəlişi barədə vədi
Allah dünyanı yaratdıqda artıq bilirdi ki, uzaq gələcəkdə dünyaya Məsihi göndərəcəkdir. Allah bunu Adəmə və Həvvaya vəd etmişdi. O, demişdi ki, Həvvanın nəslindən olan övlad ilanın başını əzəcəkdir. Bu ilan iblis idi. O, ilan kimi gələrək Həvvanı aldatmışdı. Allah, bu övladın ilanın başını əzəcəyi barədə dedikdə, O, gələcək Məsihin iblisi tamamilə məğlub edəcəyini nəzərdə tuturdu.
Allah İbrahimə söz vermişdi ki, nəslindən biri olan vasitəsilə bütün xalqlar xeyir-dua alacaqlar. Allah bu vədi gələcəkdə Məsihi göndərdiyi zaman həyata keçirəcəkdir. Məsih bütün xalqlardan olan insanları günahdan xilas edəcəkdir.
Allah Musaya vəd edir ki, gələcəkdə Musaya bənzər başqa bir peyğəmbər göndərəcək. Beləcə, Allah növbəti dəfə Məsihi göndərəcəyi barədə vəd verir.
Eyni zamanda, Allah Davud padşaha da söz vermişdi ki, onun nəslindən olan biri Məsih olacaqdır. Allah demişdi ki, O, Padşah olacaq və əbədi olaraq Allahın xalqına hökmranlıq edəcəkdir.
Allah Yeremya peyğəmbərə dedi ki, insanlarla Yeni Əhd bağlayacaqdır. Allahın Sina dağında İsrail ilə bağladığı Köhnə Əhddən fərqli olaraq, Yeni Əhddə insanlar Allahı yaxından tanıyacaqlar. Allah dedi ki, Öz qanunlarını insanların qəlblərinə qoyacaqdır və bu qanunları onların ürəklərində həkk edəcəkdir. Hər belə bir insan Allahı sevəcəkdir və Onun qanunlarına tabe olmağı arzulayacaqdır. O, onların Allahı olacaqdır, onlar isə Onun xalqı adlanacaqlar. Çünki Allah insanların günahlarını bağışlayacaqdır və heç bir vaxt yada salmayacaqdır. Bu Yeni Əhdi insanlarla Məsih bağlayacaqdır.
Həmçinin, Allahın peyğəmbərləri deyirdilər ki, Gələcək Məsih Peyğəmbər, Kahin, Padşah olacaqdır. Allahın sözlərini eşidən və xalqa çatdıran insanlara peyğəmbər deyilirdi. Allahın vəd etdiyi Məsih kamil peyğəmbər olacaqdır. O, Allahın sözlərini mükəmməl eşidəcək, dərk edəcək və insanlara çatdıracaqdır.
İsrail kahinləri xalq üçün Allaha dua edirdilər və xalqın adından Allaha qurbanlar gətirirdilər. Bu qurbanlar, Allahın insanları günahlarına görə cəzalandırmaması üçün gətirilirdi. İnsanlar kahinlərə qüsursuz heyvanlar gətirirdilər, kahinlər isə onları Allaha qurban kimi təqdim edirdilər. Məsih özünü Allaha qüsursuz qurban verən, kamil baş kahin olmalı idi. Bu o deməkdir ki, Məsih günahsız olacaqdır və Özünü qurban verəcəkdir. Və bu qurbandan sonra günahlara görə gətirilən başqa heç bir qurban lazım olmayacaqdır.
Hər xalqın öz padşahları və rəhbərləri var idi. Onlar Allaha hər zaman itaət etmirdilər və səhvlərə yol verirdilər. Əgər Davud yalnız israillilər üzərində hökmranlıq edirdisə, o zaman Davudun nəslindən olan Məsih bütün dünyada hökm sürəcəkdir. Onun hakimiyyəti ədalətli, müdrik və əbədi olacaq!
Allahın peyğəmbərləri Məsihin necə olacağını söyləyirdilər. Beləliklə, Malaki peyğəmbər Məsihin gəlişindən əvvəl İlyas peyğəmbərin gələcəyini söylədi. Onun xidməti xüsusi əhəmiyyət kəsb edəcək. Yeşaya peyğəmbər yazırdı ki, Məsih bakirə qızdan doğulacaq. Mikeya peyğəmbər isə Məsihin Bet-Lexem şəhərində doğulacağını söylədi.
Yeşaya peyğəmbər deyirdi ki, Məsih Qalileyada yaşayacaqdır. Kədərlilərə təsəlli verəcəkdir, əsirləri azad edəcəkdir. Məsih, hətta eşitməyən, görməyən, danışa bilməyən və yeriyə bilməyən xəstələrə də şəfa verəcəkdir.
Həmçinin, Yeşaya peyğəmbər söyləmişdir ki, Məsihə səbəbsiz yerə nifrət edəcəklər və Onu qəbul etməkdən imtina edəcəklər. Peyğəmbərlər bildirmişdilər ki, Məsihə məhz yaxın adamı tərəfindən xəyanət ediləcəkdir. Zəkəriyyə peyğəmbər isə dedi ki, bu adam xəyanətə görə 30 gümüş pul alacaqdır. Həmçinin, bəzi peyğəmbərlər deyirdilər ki, insanlar Məsihi öldürəcəklər və qatillər Onun paltarına görə püşk atacaqlar.
Peyğəmbərlər Məsihin nə cür öləcəyini söyləyirdilər. Yeşaya peyğəmbərlik etdi ki, xalq Ona tüpürəcək, ələ salacaq və Onu döyəcəkdir. Onlar Məsihi nizə ilə deşəcəklər və O, günahsız olduğu halda, dəhşətli əzab-əziyyət içində öləcəkdir.
Peyğəmbərlər, həmçinin, Məsihin günahsız bir insan olacağını deyirdilər. O, kamil insan olacaqdır. Lakin Məsih öləcəkdir, çünki Allah Onu bütün insanların günahlarına görə cəzalandıracaqdır. Onun ölümü Allahla insanlar arasına sülh gətirəcəkdir. Beləliklə, Allahın təyinatına əsasən, Məsih ölməli idi.
Peyğəmbərlər, həmçinin, Allahın Məsihi ölülər arasından diriltməsini söyləyirdilər. İsanın ölümü və dirilməsi Yeni Əhdin bağlanması üçün Allahın təyinatının bir hissəsi olduğunu təsdiq edir. İsa – Məsihə doğulduğu zaman veriləcək addır. Beləliklə, Allah Ona qarşı günah etmiş insanları xilas etmək istəyirdi.
Allah peyğəmbərlərə Məsih haqqında çoxlu həqiqətlər açırdı, lakin onların heç biri sağlığında Məsihi görmədi. Bu peyğəmbərliklərin sonuncusundan sonra 400 ildən çox keçdi və Allah təyin etdiyi vaxtda, Məsihi dünyaya göndərdi.
Müqəddəs Kitabdan hekayə. Yaradılış 3:15; 12:1-3; Qanunun Təkrarı 18:15; İkinci Şamuel 7:12 - 14; Yeremya 31; Yeşaya 7:14; 9:1-17; 35:3-5; 50:6; 53;61; Daniel 7:9;10:13; Malaki 4:5; 5:2; Zəkəriyyə 11:12-13; Zəbur 22:18; 41:9; 35:19;