See in Reader
7.5 KiB
19. Peyğəmbərlər
Allah dəfələrlə israillilərə peyğəmbərlər göndərirdi. Peyğəmbərlər Allahın sözlərini eşidirdilər və onları xalqa ötürürdülər.
Axav İsrailin padşahı olduğu zaman İsraildə İlyas adlı peyğəmbər yaşayırdı. Axav pis insan idi. O, xalqı Baal adlı yalançı allaha sitayiş etməyə çağırırdı. İlyas Axava dedi: “Bütlərə sitayiş etdiyinizə görə, mən yağışın yağmasına əmr etməyincə, İsraildə nə yağış yağacaq, nə də şeh düşəcəkdir.” Bunu eşidən Axav İlyasa elə qəzəbləndi ki, onu öldürmək qərarına gəldi.
O zaman Allah İlyasa vadiyə gedib Axavdan gizlənməyi əmr etdi. İlyas Allah onu yönləndirdiyi çayın yanına getdi. Hər səhər və axşam qarğalar İlyasa çörək və ət gətirirdi. Bu müddət ərzində Axav və onun ordusu İlyası axtarırdı, lakin tapa bilmirdi.
Yağış yağmadığına görə, bir müddət sonra çay qurudu. O zaman İlyas Allahın əmri ilə qonşu ölkəyə getdi. Orada öz oğlu ilə yaşayan kasıb bir dul qadın var idi. Onların yeməyi, demək olar ki, bitmişdi, çünki ölkədə quraqlıq idi. Ancaq onlar İlyasın qayğısına qaldılar və Allah onları yemək ilə təmin edirdi: Allah yağış göndərənə qədər, qablarında un və yağ tükənmirdi. Buna görə, ölkədə quraqlıq və aclıq olmasına baxmayaraq, onların hər zaman yeməyi var idi. Bu, təxminən, üç il davam etdi.
Nəhayət, Allah İlyasa dedi ki, yenə də yağış verəcəkdir. Allah İlyasa əmr etdi ki, İsrailə qayıtsın və Axavın yanına getsin. İlyas padşahın yanına getdi. Padşah Axav onu gördükdə dedi: “Budur, İsrailə bəla gətirən gəldi.” İlyas onun cavabında dedi: “İsrailə bəlanı sən gətirmisən. Sən Rəbbi – həqiqi Allahı qoyub, Baala səcdə edirsən. İsrailin bütün sakinlərini və yalançı allahların peyğəmbərlərini Karmel dağına yığ!”
Axav elə də etdi. İsrailin bütün sakinləri Karmel dağına yığışdı. Baalın adından danışan insanlar da gəldilər. Bunlar Baalın peyğəmbərləri idi. İlyas insanlara dedi: “Nə vaxta qədər siz tərəddüd edəcəksiniz? Əgər Rəbb Allahdırsa, Rəbbə səcdə edin! Əgər Baal allahdırsa, Baala səcdə edin!”
Bundan sonra İlyas Baalın peyğəmbərlərinə dedi: “Buğanı kəsin, hissələrə doğrayın və qurbangahın üzərinə qoyun, lakin alovu yandırmayın. Sonra mən də eyni şeyi edəcəyəm və heyvanı Allah üçün düzəldilmiş qurbangahın üzərinə qoyacağam. Qurbangaha alov göndərən Allah – həqiqi Allahdır!” Baalın peyğəmbərləri qurbanı hazırladılar,lakin alovu yandırmadılar.
Sonra onlar öz allahlarına dua etməyə başladılar: “Ey Baal, bizi eşit!” Onlar bütün günü dua edirdilər, qışqırırdılar, hətta özlərini bıçaqla kəsirdilər,lakin Baal cavab vermirdi və alov göndərmirdi.
Baalın peyğəmbərləri bütün günü ona dua etdilər, axşama yaxın duanı dayandırdılar. Onda İlyas qurbanı Allahın qurbangahına qoydu. O, əmr etdi ki, su ilə dolu on iki iri səhəng götürüb qurbanın üzərinə dayanmadan su töksünlər. Və qurban özü, odunlar, hətta qurbangahın ətrafında olan torpaq tam islanana qədər bunu davam etsinlər.
Sonra İlyas dua etdi: “Ey İbrahimin, İshaqın və İsrailin Allahı Rəbb! Qoy bu gün bilinsin ki, İsraildə Sən Allahsan və mən Sənin qulunam. Səsimi eşit, ya Rəbb, mənə cavab ver. Qoy bu xalq bilsin ki, Sən həqiqi Allahsan.”
Həmin anda göydən od düşdü, yandırma qurbanını, odunları, daşları, torpağı yandırıb-yaxdı və hətta qurbangahda olan suyu yandırdı. Bütün xalq bunu gördü və onlar üzüstə düşüb dedilər: “Rəbb, həqiqətən, Allahdır! Rəbb, həqiqətən, Allahdır!”
Bundan sonra İlyas dedi ki, Baal peyğəmbərlərindən heç birinin qaçmasına imkan verilməsin! Camaat Baal peyğəmbərlərini tutdu, onları oradan aparıb öldürdü.
İlyas padşah Axava dedi: “Dərhal evə qayıt, çünki yağış yağacaqdır.” Tezliklə göy qaraldı və güclü leysan başladı, çünki Rəbbin əmri ilə quraqlıq başa çatdı. Bu, Onun həqiqi Allah olduğunun təsdiqi idi.
İlyas yer üzündəki xidmətini başa vurduqda, Allah Elişa adlı bir adamı Öz peyğəmbəri seçdi. Allah Elişa vasitəsilə çoxlu möcüzələr etdi. Möcüzələrdən biri düşmən ordusunun başçısı Naamanın başına gəldi. Naaman ağır dəri xəstəliyindən əziyyət çəkirdi. O, Elişa haqqında eşidəndə onun yanına gedib, ona şəfa verilməsini dilədi. Lakin Elişa Naamanın qarşısına çıxmadı, nökəri vasitəsilə ona xəbər göndərdi ki, o, yeddi dəfə İordan çayında yuyunsun.
Əvvəlcə Naaman qəzəblənib bunu etmək istəmədi, çünki Elişa hətta onun qarşısına belə çıxmadı. Lakin sonra o, fikrini dəyişdi, İordan çayına getdi və orada yeddi dəfə yuyundu. O, sudan çıxanda Allah ona şəfa verdi.
Allah İsrail xalqına Elişadan sonra çoxlu peyğəmbərlər yollayırdı. Onlar hamısı insanları bütlərə sitayiş etməməyə, başqaları ilə ədalətli və mərhəmətli davranmağa çağırırdılar. Peyğəmbərlər insanlara xəbərdarlıq edirdilər ki, əgər pislikdən əl çəkməsələr və Allaha itaət etməyə başlamasalar, Allah onları mühakimə edəcək və günahlarına görə cəzalandıracaqdır.
Lakin insanlar çox vaxt Allaha itaət etmirdilər, peyğəmbərlərə qarşı sərt davranırdılar. Beləliklə, Yeremya adlı peyğəmbərlərdən birini boş quyuya atdılar ki, orada qalıb ölsün. O, quyunun dibində palçığın içində oturmuşdu. Lakin padşahın ona yazığı gəlir və nökərlərinə əmr edir ki, nə qədər ki ölməyib, onu oradan çıxartsınlar. İnsanlar Allahın peyğəmbərlərinə nifrət edir, hətta onlardan bəzilərini öldürürdülər.
Bu nifrətə baxmayaraq, peyğəmbərlər Allahın sözlərini insanlara çatdırmağa davam edirdilər. Onlar insanlara xəbərdarlıq edirdilər ki, tövbə etməsələr, Allah onları məhv edəcəkdir və insanları Allaha itaət etməyə çağırırdılar. Həmçinin,peyğəmbərlər insanlara xatırladırdılar ki, Allah onlara Məsihi göndərəcəyini vəd etmişdir.
Müqəddəs Kitabdan hekayə. 1 Padşahlar 16-18; 2 Padşahlar 5; Yeremya 38