See in Reader
4.4 KiB
18. Bölünmüş padşahlıq
Davud İsrail üzərində 40 il padşahlıq etdi. Davudun ölümündən sonra onun oğlu Süleyman padşahlıq etməyə başladı. Allah Süleymana müraciət etdi və ondan ən böyük istəyini soruşdu. Süleyman Allahdan xalqı idarə etmək üçün hikmət istədi. Bu, Allaha xoş gəldi və O, Süleymanı dünyada ən müdrik insan etdi. Allah Süleymana müdrikliklə yanaşı, çoxlu var-dövlət verdi.
Süleyman Yerusəlimdə atası Davudun tikmək istədiyi məbədi tikdi. Hələ sağ ikən Davud məbədin tikilməsi üçün bütün ləvazimatları toplamışdı. Artıq xalq Allaha Hüzur Çadırında deyil, məbəddə sitayiş edir və qurban gətirirdi. Allahın hüzuru məbəddə, Öz xalqının arasında idi.
Süleyman, müdrik olmasına baxmayaraq, Allaha itaətsizlik etdi. O, Allahın qadağan etməsinə baxmayaraq, yad xalqlardan olan qadınlarla nikah bağladı. Bu qadınların çoxu özləri ilə birgə allahlarını da gətirmişdilər və onlara sitayiş edirdilər. Süleyman qocalanda, o da həmin allahlara sitayiş etməyə başladı.
Buna görə Allah Süleymana qəzəbləndi və dedi ki, İsrail xalqını iki padşahlığa bölməklə onu cəzalandıracaqdır. Bu, Süleymanın ölümündən sonra baş verəcəkdir.
Süleymanın ölümündən sonra, onun oğlu Rexavam padşah oldu. Bütün İsrail xalqı onu padşah qəbul etmək üçün bir yerə toplaşdı. İnsanlar Rexavama şikayət etdilər ki, Süleyman onları çox ağır işlər görməyə və böyük vergilər odəməyə məcbur edirdi. Onlar Rexavamdan xahiş etdilər ki, işlərini yüngülləşdirsin.
Lakin Rexavam onlara çox sərt cavab verdi: “Siz deyirsiniz ki, mənim atam Süleyman sizə çox ağır iş gördürürdü. Mən isə sizə daha da ağır iş verəcəyəm və daha da ağır cəzalandıracağam!”
Xalq bu sözləri eşidəndə onlardan çoxu Rexavama qarşı üsyan etdi. İsrailin on qəbiləsi Rexavamın hakimiyyəti altında qalmaq istəmədi və onu öz padşahı hesab etməkdən imtina etdi. Rexavamın yanında Yəhuda padşahlığı və ya Yəhuda kimi tanınan yalnız iki qəbilə qaldı.
Digər on qəbilə Yarovam adlı bir adamı padşah seçdi. Bu on qəbilə ölkənin şimal hissəsində yaşayırdı. Onlar İsrail padşahlığı adlandırıldı.
İsrail padşahı Yarovam pis padşah oldu. O, Allaha qarşı itaətsizlik etdi və insanlara günah içində yaşamağı öyrətdi. Yarovam öz xalqı üçün iki büt düzəltdi və xalq daha Yəhuda ərazisində olan Yerusəlimə getmədi və məbəddə Allaha ibadət etmədi.
Yəhuda və İsrail düşmənçilik edirdilər və öz aralarında tez-tez vuruşurdular.
Yeni İsrail padşahlığında bütün padşahlar çox pis hökmdar idilər. Onların yerinə padşah olmaq istəyən digər israillilər bir çoxunu öldürdülər.
İsrail padşahlığının sakinlərindən çoxu və bütün padşahları bütlərə sitayiş edirdilər. Çox vaxt onların ibadətləri pozğunluqla müşayiət olunurdu, hətta onlar bəzən övladlarını da bütlərə qurban gətirirdilər.
Yəhuda padşahları Davudun nəslindən idi. Onlardan bəziləri yaxşı adam idi, düzgün hökmdarlıq edirdi və Allaha itaət edirdi. Yəhuda padşahlarının əksəriyyəti isə pis hökmdarlar idi və bütlərə sitayiş edirdi. Bu padşahların bəziləri öz övladlarını yalançı allahlara qurban gətirirdi. Yəhuda sakinlərinin çoxu da başqa allahlara sitayiş edirdi və bununla Allaha qarşı çıxırdılar.
Müqəddəs Kitabdan hekayə. Birinci Padşahlar 1-6; 11-12