TimYancev_az_obs_L3/17.md

17. Allahın Davud ilə Əhdi

İsrailin birinci padşahı Şaul idi. O, hündür və yaraşıqlı idi, bütün xalqın xoşuna gəlirdi. İsrail üzərində padşahlığının ilk illərində Şaul yaxşı padşah idi. Lakin daha sonra o qəddar oldu və Allaha itaətsizlik etməyə başladı. Buna görə Allah onun əvəzinə padşah olmaq üçün başqa adam seçdi.

Allah Davud adlı gənc israillini seçdi və onu Şauldan sonra padşah olması üçün hazırladı. Davud Bet-Lexemli bir çoban idi. Davud atasının qoyun sürülərini otardığı zaman sürüyə hücum edən aslan və ayını öldürməli olurdu. Davud həlim və saleh bir adam idi. O, Allaha sadiq idi və Ona itaət edirdi.

Davud hələ gənc ikən Qolyat adlı bir cəngavər ilə vuruşmuşdu. Qolyatın boyu təxminən üç metr idi və çox güclü və təcrübəli cəngavər idi. Lakin Allah Davuda Qolyatı öldürməyə və İsraili xilas etməyə yardım etdi. Bundan sonra Davud İsrailin düşmənləri üzərində bir çox qələbə çaldı. O, güclü bir döyüşçü oldu və dəfələrlə İsrail ordusunu döyüşə apardı. Davud israillilərin xoşuna gəlirdi və xalq ona tərif söyləyirdi.

Xalqın Davudu çox sevməyi Şaulda paxıllıq hissi yaratdı. O, Davudda öz rəqibini görürdü və onu öldürmək fikrinə düşdü. Onda Davud səhraya qaçıb Şaul və onun döyüşçülərindən orada gizləndi. Bir dəfə Şaul öz döyüşçüləri ilə Davudu axtarırdı. O, Davud gizləndiyi mağaraya girdi, lakin onu görmədi. Davud arxadan Şaula yaxınlaşıb paltarının ətəyindən bir parça kəsdi. Şaul mağaradan çıxıb bir qədər uzaqlaşandan sonra, Davud onu səslədi və ətəyindən kəsilən parçanı ona göstərdi. Beləliklə, Şaul başa düşdü ki, Davudun əlinə fürsət düşsə də, o,padşahlığı əldə etmək üçün onu öldürmək istəmirdi.

Bir müddət sonra Şaul savaşda həlak oldu, Davud isə İsrailin padşahı oldu. Allah ona xeyir-dua verdi və uğurlu etdi. O, müdrik padşah idi və xalq onu çox sevirdi. Davud çox döyüşlər aparmışdı və Allah ona İsrailin düşmənlərini məğlub etməkdə kömək edirdi. Davud Yerusəlim şəhərini fəth etdi və onu paytaxt edib orada yaşayır və ölkəni idarə edirdi. Davud 40 il padşahlıq etdi. Onun hakimiyyətdə olduğu illərdə İsrail qüdrətli və zəngin ölkəyə çevrilmişdi.

Davud bir məbəd tikmək istəyirdi ki, bütün israillilər orada Allaha səcdə edib qurban gətirsinlər. Ona görə ki, son 400 il ərzində xalq Musanın tikdiyi Hüzur çadırında Allaha səcdə edir, qurban gətirirdi.

Həmin dövrdə Natan adlı bir peyğəmbər yaşayırdı. Allah onu Davudun yanına bu sözləri söyləmək üçün yollayır. “Bu Məbədi mənim üçün sən tikməyəcəksən, çünki sən çox döyüşmüsən. Sənin oğlun onu tikəcəkdir! Lakin Mən sənə bol-bol xeyir-dua verəcəyəm! Sənin nəslindən olan biri Mənim xalqımı əbədi olaraq idarə edəcəkdir!” Davudun əbədi hökmranlıq edə biləcək yeganə varisi – Məsihdir. Məsih – Allahın Seçilmişidir, o, dünyada yaşayan bütün insanları onların günahlarından azad edəcəkdir.

Davud Natanın sözlərini eşidəndə, ona belə böyük şərəf və bol xeyir-dua verdiyinə görə, Allaha şükür və həmd etdi. Davud Allahın bu vədləri nə vaxt yerinə yetirəcəyini bilmirdi. Lakin biz bilirik ki, israillilər Məsihin gəlişini uzun müddət – təxminən 1000 il gözləməli oldular.

Davud uzun illər öz xalqına ədalətlə hökmranlıq edirdi. O, Allaha itaət edirdi və Allah ona xeyir-dua verirdi. Lakin sonradan Davud Allaha qarşı böyuk bir günah işlətdi.

Bir gün Davud öz sarayından çölə baxır və yuyunan gözəl bir qadın görür. Davud onu tanımırdı, amma xidmətçilərindən bu qadın barəsində xəbər alır və onlar deyirlər ki, onun adı Bat-Şevadır.

Davud üzünü çevirmək əvəzinə xidmətçilərini onun dalınca yolladı. O, qadınla yaxınlıq etdi və sonra onu evinə geri göndərdi. Bir müddət sonra Bat-Şeva hamilə olduğu haqqında Davuda xəbər göndərdi.

Bat-Şeva Uriya adlı bir kişidə ərdə idi. O, Davudun ən yaxşı döyüşçülərindən biri idi. Uriya döyüşdə iştirak edirdi. Davud Uriyanı döyüşdən geri çağırdı və ona arvadının yanına getməyi əmr etdi. Lakin o biri döyüşçülər vuruşarkən Uriya evə qayıdıb dincəlməkdən imtina etdi. Onda Davud Uriyanı döyüşə yenidən yolladı və ordu başçısına əmr etdi ki, onun öldürülməsi üçün onu qızğın döyüş nöqtəsinə göndərsin. Belə də oldu: Uriya döyüşdə həlak oldu.

Uriyanın ölümündən sonra Davud Bat-Şeva ilə evləndi. Sonra Bat- Şeva ona oğul doğdu. Allah Davudun belə hərəkətinə görə çox qəzəbləndi. O, Davudun yanına Natan peyğəmbəri yolladı ki, onun ağır günah etdiyini söyləsin. Davud tövbə etdi və Allah onu bağışladı. Bundan sonra Davud hətta çətin vaxtlarında belə, ömrünün axırına qədər Allaha itaət etdi.

Lakin Davudun oğlu hələ körpə ikən öldü. Allah Davudu belə cəzalandırdı. Bundan başqa Davudun bəzi ailə üzvləri ona qarşı çıxdı və bu onun ömrünün axırına qədər belə davam etdi. Onun hökmranlığı çox zəiflədi. Davudun Allahın sözündən çıxmasına baxmayaraq, Allah ona sadiq qaldı və verdiyi vədi yerinə yetirdi. Sonra Davudla Bat-Şevanın yenə də oğlu oldu və onun adını Süleyman qoydular.

Müqəddəs Kitabdan hekayə. 1 Şamuel 10; 15-19; 24; 31; 2 Şamuel 5; 7; 11-12