See in Reader
6.1 KiB
14. İsraillilərin səhrada dolaşması
Allah israillilərə bütün qanunları verdikdən sonra onları Sina dağından apardı. İsraillilər Onunla olan əhdə görə bu qanunlara riayət etməli idilər. Allah xalqın qarşısında buxar dirəyi kimi gedirdi, xalq isə Onun ardınca gedirdi. O, onları Kənan adlanan Vəd edilmiş Torpağa gətirmək istəyirdi.
Allah İbrahim, İshaq və Yaquba vəd etmişdi ki, bu torpaqları onların nəsillərinə verəcəkdir, lakin həmin dövrdə bu ərazidə müxtəlif xalqlar yaşayırdı. Onları kənanlılar adlandırırdılar. Kənanlılar Allaha sitayiş etmirdilər və Ona itaətli deyildilər. Onlar yalan allahlara səcdə edirdilər və müxtəlif şər işlərlə məşğul idilər.
Allah israillilərə dedi: “Siz Vəd edilmiş Torpağa daxil olduqda bütün kənanlıları qovmalısınız. Onlarla əlaqəyə girməyin və nikah bağlamayın. Siz onların bütün bütlərini məhv etməlisiniz. Əgər Mən sizə dediyim kimi etməsəniz, Mənə deyil, onların bütlərinə səcdə etməyə başlayacaqsınız.”
İsraillilər Kənanın sərhədlərinə yaxınlaşdıqda, Musa İsrailin hər bir nəslindən bir nəfər olmaqla, on iki nəfər kişi seçdi. O, bu insanları həmin torpağa kəşfiyyata göndərdi ki, onlar bu torpaq haqqında məlumat toplasınlar. Onlar eləcə də kənanlılar haqqında, onların güclü və ya zəif olmaları barədə məlumat toplamalı idilər.
On iki kişi qırx gün Kənanı gəzdilər, sonra geri qayıtdılar. Onlar hamısı xalqa deyirdilər: “Oranın torpağı yaxşıdır və çoxlu məhsul verir!” Lakin onlardan on nəfəri təsdiqləyirdi: “Oranın şəhərləri möhkəmlənmiş, insanları isə çox nəhəngdir! Biz onlara hücum etsək, sözsüz, onlar bizi öldürəcəklər!”
Başqa iki kəşfiyyatçı – Kalev və Nun oğlu Yeşua dedilər: “Bu doğrudur, Kənanın insanları hündür və güclüdürlər. Lakin biz onlara qalib gələ biləcəyik! Rəbb bizim tərəfdə döyüşəcəkdir!”
Amma xalq Kalev və Nun oğlu Yeşuaya qulaq asmadı. İnsanlar Musa ilə Haruna qəzəbləndi və dedilər: “Bu dəhşətli yerə bizi niyə gətirdiniz? Kaş ki biz Misirdə qalardıq. Əgər biz bu torpağa girsək, döyüşdə məhv olacağıq, bizim arvad-uşaqlarımız isə kənanlıların qulu olacaqdır.” Xalq onları geriyə – Misirə aparacaq yeni rəhbər seçmək istədi.
İnsanların bu sözlərini eşidib Allah bərk qəzəbləndi. O, Hüzur Çadırına gəldi və dedi: “Mənə qarşı çıxdığınıza görə bütün xalq səhrada gəzib dolaşacaqdır. İyirmi və ondan yuxarı yaşda olan bütün insanlar orada qalıb öləcəklər və Mənim Vəd etdiyim Torpağa heç vaxt girməyəcəklər. Bu Torpağa yalnız Nun oğlu Yeşua və Kalev girəcəkdir.”
İnsanlar Allahın bu sözlərini eşidib günah etdiklərinə görə peşman oldular. Onlar Kənan əhalisinə qarşı döyüşmək qərarına gəldilər. Musa onlara xəbərdarlıq etdi ki, Kənana qarşı müharibə etməsinlər, çünki Allah onlarla getməyəcəkdir, lakin onlar Musaya qulaq asmadılar.
Allah israillilərlə birlikdə bu döyuşə getmədi və buna görə də kənanlılar onları məğlub edib çoxlarını öldürdülər. Onda israillilər Kənandan geri çəkildilər. Bundan sonra onlar qırx il səhrada gəzib dolaşdılar.
Səhrada olduqları bu qırx il ərzində Allah onların qayğısına qaldı. O, onlara göydən “manna” adlı çörək verdi. Bütün bu müddət ərzində Allah onların geyimlərini və çarıqlarını qoruyub saxladı, onlar köhnəlmirdi.
Allah onlara möcüzəvi şəkildə qayadan su verirdi. Lakin bütün bunlara baxmayaraq, İsrail xalqı Allahdan və Musadan gileylənirdi və deyinirdi. Allah isə yenə də Öz vədlərinə sadiq qaldı. O, İbrahimin, İshaqın və Yaqubun nəsli ilə vəd etdiyi kimi davranırdı.
Bir gün xalqın suyu qurtardı. Allah Musaya dedi: “Bu qayaya de ki, sənə su versin və qayadan su axacaqdır”. Lakin Musa bütün xalqın qarşısında Allaha itaətsizlik etdi. O, qayaya: “Su ver” demədi, bunun əvəzinə, əsası ilə iki dəfə qayaya vurdu. Qayadan su axdı və hamı içdi, lakin Allah Musaya qəzəbləndi və dedi: “Sən bu cür hərəkət etdiyinə görə Vəd edilmiş Torpağa girməyəcəksən!”
Qırx il səhrada dolaşdıqdan sonra, Allaha qarşı üsyan edən hər kəs öldü. Onda Allah xalqını yenə də Vəd edilmiş Torpağın sərhədinə gətirdi. Musa artıq qocalmışdı və Allah Nun oğlu Yeşuanı xalqın rəhbəri seçdi. Musaya isə söz verdi ki, O, bir gün insanlar üçün Musa kimi başqa peyğəmbər yollayacaqdır.
Allah Musaya əmr etdi ki, Vəd edilmiş Torpağı görmək üçün dağın başına qalxsın. Musa Vəd edilmiş Torpağı gördü, lakin Allah onun ora girməsinə icazə vermədi. Bundan sonra Musa öldü və israillilər otuz gün yas tutdular. Nun oğlu Yeşua xalqın yeni rəhbəri oldu. O, Allaha inandığı və itaət etdiyi üçün xalqı yaxşı idarə edirdi.
_Müqəddəs Kitabdan hekayə. Çıxış 16-17; Saylar 10-14; 20; 27; Qanunun Təkrarı 34