See in Reader
4.7 KiB
9. Allah Musanı çağırır
Yusifin ölümündən sonra onun bütün qohumları Misirdə qaldılar. Onlar və nəsilləri uzun illər orada yaşayırdılar. Onların uşaqlarının sayı çox idi. Onları “israillilər” adlandırırdılar.
Yüzilliklər keçdi. İsraillilərin sayı çox artmışdı. Misirlilər artıq Yusifi və onun onlar üçün bütün etdiklərini xatırlamırdılar. İsraillilər o qədər artmışdılar ki, misirlilər onlardan qorxmağa başladılar. Beləliklə, həmin dövrdə hökmdarlıq edən firon israilliləri köləyə çevirdi.
Misirlilər israilliləri çoxlu bina və hətta şəhərlər tikməyə məcbur edirdilər. Ağır işə görə israillilərin həyatı çox dözülməz və əziyyətli idi. Lakin Allah onlara xeyir-dua verirdi və onların daha çox uşağı doğulurdu.
Firon gördü ki, israillilərin çoxlu uşağı olur. Buna görə öz xalqına əmr etdi ki, yeni doğulan israilli oğlan uşaqlarını Nil çayına ataraq öldürsünlər.
O vaxtlar bir israilli qadının oğlu doğuldu və o, uzun zaman körpəsini gizlədirdi.
Elə bir vaxt gəldi ki, daha körpəni gizlətmək mümkün deyildi. Ana oğlunu səbətə qoyub Nil çayının qırağındakı qamışların arasında gizlətdi ki, onu ölümdən xilas etsin. Körpənin böyük bacısı yaxınlıqda dayanıb nə baş verəcəyini izləyirdi.
Bu zaman fironun qızı Nil çayına çimməyə gəldi. Səbəti görüb içinə baxdı. Orada körpəni görüb ona rəhmi gəldi. Körpənin böyük bacısı yaxınlıqda idi, o, fironun qızına körpə üçün israilli süd anası tapmağı təklif etdi. Və fironun qızı bir israilli qadını süd anası kimi götürdü, lakin bu qadının körpənin doğma anası olduğunu bilmirdi. Körpə böyüdü və ana südünə ehtiyacı olmadıqda, anası onu fironun qızına qaytardı. Fironun qızı uşağı oğulluğa götürüb adını Musa qoydu.
Musa böyüdü. Bir gün o, bir misirlinin israilli nökərini döydüyünü gördü. Musa öz xalqından olan bir insanı xilas etməyə cəhd etdi.
Musa ətrafında heç kəsin olmadığını görəndə misirlini öldürdü və onun cəsədini qumda basdırdı. Lakin bu hadisə gizli qalmadı.
Musanın bu hərəkəti barədə hətta firon da xəbər tutdu. O əmr etdi ki, Musanı öldürsünlər, ancaq Musa Misirdən səhraya qaçdı. Fironun əsgərləri onu orada tapa bilmədilər.
Səhrada, Misirdən uzaq bir yerdə, Musa çoban oldu. Həmin yerdən olan bir qızla ailə qurdu və onların iki oğlu doğuldu.
Musa öz qayınatasının qoyunlarını otarırdı. Bir dəfə o, od içində kolun sönmədən yanmasını gördü. Musa kola yaxınlaşdı ki, ona nəzər salsın. O, yanan kola yaxınlaşanda Allah ona dedi: “Musa, çarıqlarını çıxart! Sən müqəddəs torpaqda dayanmısan!”
Sonra Allah dedi: “Mən Öz xalqımın əzabını gördüm. Mən səni fironun yanına göndərəcəyəm ki, israilliləri Misirdən, onların indi kölə olduğu yerdən çıxarasan. Mən onlara Kənan torpağını verəcəyəm – İbrahimə, İshaqa və Yaquba vəd verdiyim torpağı.”
Musa soruşdu: “Bəs xalq mənim kim tərəfindən göndərildiyimi bilmək istəsə? Mən onlara nə deyim?” Allah cavab verdi: “Var Olan Mənəm.” Onlara de: “Var Olan, məni sizin yanınıza göndərib”. Həmçinin onlara de: “Mən – Rəbb, əcdadlarınız İbrahim, İshaq və Yaqubun Allahıyam. Mənim adım əbədidir.”
Musa qorxdu, fironun yanına getmək istəmirdi, çünki o, səlis danışa bilmirdi. Buna görə Allah Musaya onun qardaşı Harunu kömək üçün yolladı.
Müqəddəs Kitabdan hekayə. Çıxış 1-4