TimYancev_az_obs_L3/04.md

4. Allahın İbramla Əhdi

Daşqından sonra uzun illər keçdi və dünyada insanların sayı yenə də çoxaldı. Onlar hələ də qəddar idilər, Allaha və bir-birilərinə qarşı günah edirdilər. O zaman bütün insanlar bir dildə danışırdılar. Allahın onların dünyaya yayılmalarına əmr etməsinə baxmayaraq, onlar əksinə, bir yerə toplaşdılar və birlikdə şəhər tikməyə başladılar.

İnsanlar çox qürurlu idilər. Allaha itaət etmək və Onun tələb etdiyi kimi yaşamaq istəmirdilər. Hətta onlar öz adlarını izzətləndirmək və dünyaya yayılmamaq üçün səmalara qədər ucalan bir qüllə tikməyə başladılar. Allah gördü ki, əgər onlar öz çirkin məqsədlərinə davam etsələr, daha çox günah edəcəklər.

Onda Allah insanların danışdıqları ümumi dili müxtəlif dillərə dəyişdi və onları yer üzünə yaydı. İnsanların tikməyə başladıqları şəhər Babil adlandırıldı. Onun mənası “qarışmış” deməkdi.

Yüzilliklər keçdi. Allah İbram adlı bir insana müraciət etdi. Allah ona dedi: “Öz ölkəni və qohumlarını tərk et və sənə göstərəcəyim torpağa get. Mən sənə xeyir-dua verəcəyəm və səndən böyük bir xalq yaradacağam. Sənin adını yüksəldəcəyəm. Sənə xeyir-dua verənlərə xeyir-dua verəcəyəm, səni lənətləyənləri lənətləyəcəyəm. Sənin sayəndə bütün xalqlar xeyir-dualı olacaqlar”.

İbram Allaha itaət etdi. O öz arvadı Sarayı, bütün kənizlərini və sahib olduğu hər şeyi götürüb Kənana – Allahın ona göstərdiyi torpağa getdi.

İbram Kənana gəldikdə Allah ona dedi: “Ətrafına bax. Bütün bu torpağı sənə verəcəyəm və sənin nəslin əbədi olaraq ona sahib olacaqdır”. Onda İbram bu torpaqda məskunlaşdı.

Orada Melkisedeq adlı bir insan var idi. O, Uca Allahın kahini idi. Bir gün qardaşı oğlunu əsirlikdən azad etdiyi döyüşdən sonra İbram Melkisedeqlə görüşdü. O, İbrama xeyir-dua verdi və dedi: “Qoy, Uca Tanrı, yerin və göyün Sahibi İbrama xeyir-dua versin!” Bundan sonra İbram sahib olduğu hər bir şeyin onda bir hissəsini Melkisedeqə verdi!

Uzun illər keçdi, lakin İbramla Sarayın hələ də varisi yox idi. Allah yenə də İbrama müraciət etdi, ona oğul verəcəyinə və göydəki ulduzların sayı qədər nəsilləri olacağına vəd verdi. İbram Allahın vədinə inandı və Allah İbramı Onun vədinə iman etməsinə görə saleh elan etdi.

Bundan sonra Allah İbramla əhd bağladı. Adətən, əhd iki insan arasında müəyyən öhdəlikləri yerinə yetirmək üçün bağlanır. Lakin bu dəfə Allah Özü İbramla əhd bağladı, və ona, İbramın varisi olacaq oğlunun doğulacağını vəd etdi. Həmçinin, Allah İbramla bu əhdi bağladıqda Kənan torpağını onun nəslinə verdi. Bundan sonra Allah İbrama onun nəsli ilə nə baş verəcəyini yuxuda göstərdi. Bütün bu hadisələrdən sonra xeyli vaxt keçdi, lakin İbramın hələ də oğlu doğulmamışdı.

Müqəddəs Kitabdan hekayə. Yaradılış 11-15