See in Reader
4.7 KiB
3. Daşqın
Əsrlər keçdi və dünyada insanlar çoxaldı. Onlar çox qəddar və zalım idilər. İnsanlar o qədər günaha batmışdılar ki, Allah daşqın vasitəsilə dünyanı məhv etmək qərarına gəldi.
Bütün insanlar arasında Allah yalnız Nuhdan razı idi, çünki o, günahkarlar arasında yeganə saleh adam idi. Allah Nuha dedi ki, dünyada daşqın etmək qərarına gəlib. Buna görə Nuh nəhəng bir gəmi tikməlidir.
Ağacdan olacaq bu nəhəng gəminin uzunluğu 140 metr, eni 23 metr və hündürlüyü 13,5 metr olmaqla, gəmi üç mərtəbəyə, çoxlu bölmələrə, tavan və pəncərəyə malik olmalı idi. Nuh, onun ailəsi və quruda yaşayan bütün növ heyvanlar bu gəmi vasitəsilə daşqından xilas olmalı idilər.
Nuh Allaha itaət etdi. O, üç oğlu ilə birlikdə gəmini, məhz Allah dediyi kimi tikdi. Bu gəminin tikilməsi uzun illər tələb etdi, çünki o çox böyük idi.
Allah Nuha əmr etdi ki, özünə, öz ailəsinə, heyvanlara yetərincə ərzaq götürsün. Hər şey hazır olduqdan sonra, Allah Nuha dedi ki, ona, arvadına, üç oğluna arvadları ilə birgə gəmiyə minmək vaxtı çatmışdır. Onlar cəmi səkkiz nəfər idi.
Allah, həmçinin, Nuha əmr etdi ki, daşqından xilas olmaq üçün yer üzündə olan bütün növ heyvan və quşların erkək və dişisindən, qurban üçün yararlı heyvanlardan isə yeddi cüt gəmiyə götürsün. Onlar hamısı gəmiyə daxil olduqdan sonra, Allah Özü gəminin qapısın bağladı.
Bundan sonra leysan başladı və qırx gün, qırx gecə dayanmadan yağdı. Həm də yeraltı sular yer səthinə qalxırdı. Su bütün yer üzünü bürüdü, hətta ən uca dağlar suyun altında qalmışdı.
Yer üzündə olan bütün canlılar məhv oldu. Lakin gəminin içində olanlar xilas oldu.
Yağış kəsildikdən sonra gəmi beş ay suyun üzərində üzürdü. Sonra su çəkilməyə başladı. Bir gün gəmi dağ başında dayandı, lakin yer üzü hələ də su ilə örtülmüşdü. Üç ay keçdikdən sonra dağların zirvələri göründü.
Daha qırx gün keçdi və Nuh gəmidən bir qarğa buraxdı, görsün ki, su quruyub, yoxsa yox. Qarğa ətrafı uçub dolaşdı, lakin özünə qonmaq üçün quru yer tapmadı.
Sonra Nuh bir göyərçin buraxdı, lakin o da quru yer tapmayıb Nuhun yanına geri döndü. Bir həftə sonra Nuh göyərçini yenidən buraxdı və o, dimdiyində bir zeytun yarpağı ilə geri döndü! Su çəkilirdi və yer üzündə yeni bitkilər bitməyə başladı!
Nuh bir həftə də gözlədi və göyərçini üçüncü dəfə buraxdı. Bu dəfə göyərçin özünə qonmaq üçün yer tapdı və geri dönmədi. Torpaq quruyurdu!
İki aydan sonra Allah Nuha dedi: “İndi sən gəmini ailən və bütün heyvanlarla birgə tərk edə bilərsən. Qoy sizin çoxlu övladlarınız və nəvələriniz olsun! Törəyib dünyanı doldurun!” Bundan sonra Nuh ailəsi ilə birlikdə gəmidən çıxdı.
Sonra Nuh qurbangah düzəltdi və qurban üçün istifadə edilə bilən hər növ heyvanlardan bir neçəsini qurban gətirdi. Allah bu qurbandan razı qaldı, Nuha və onun ailəsinə xeyir-dua verdi.
Həmçinin, Allah dedi: “Mən söz verirəm ki, insanların pis əməllərinə görə yer üzünü daha heç vaxt lənətləməyəcəyəm və insanların uşaqlıqdan günahlar etməsinə baxmayaraq, dünyanı daşqın ilə məhv etməyəcəyəm”.
Allah verdiyi vədin əlaməti olaraq ilk göy qurşağı yaratdı. O dedi ki, hər dəfə səmada göy qurşağı görünəndə verdiyi vədi yadına salıb, Yer üzündə bir daha daşqın etməyəcəkdir.
Müqəddəs Kitabdan hekayə. Yaradılış 6-8