See in Reader
5.0 KiB
المملكة المنقسمة
الملك داؤد حكم لمدة اربعين سنة. بعد داك مات ، ولدو سليمان بدا يحكم على اسرائيل . الله كلم سليمان و سالو شنو اكتر حاجة داير انو الله يعملو ليهو . سليمان طلب من الله يبقيه حكيم شديد . و ده خلى الله فرحان ، عشان كده هو بقا سليمان احكم راجل فى العالم . سليمان اتعلم حاجات كتيرة و كان قائد حكيم شديد . برضو الله بقاه غنيان شديد .
فى اورشليم ، سليمان بنى الهيكل الكان ابوه داؤد خطط ليهو و جمع مواد . و هسه الشعب بقوا يعبدوا الله و يقدموا ليه الذبائح فى الهيكل بدل من خيمة الاجتماع . الله جاء وكان حاضر فى الهيكل و سكن هناك مع شعبه .
لكن سليمان احب نسوان من بلدان تانية . هو خالف الله بزواجو من نسوان كتار ، تقريبا ١٠٠٠ منهم ! وكتار من النسوان ديل جوا من بلدان اجنبية و جابوا الهتهم معاهم و استمروا يعبدها . لمن سليمان عجز هو كمان عبد الهتهم .
بسبب ده الله كان زعلان من سليمان . هو قال انو حيعاقبه بتقسيم شعب اسرائيل لمملكتين . هو حيعمل ده بعد موت سليمان .
بعد موت سليمان ، ولده رحبعام بقى ملك . كل شعب اسرائيل جو ليهو مع بعض عشان يقبله كملكهم . اشتكوا لرحبعام انو سليمان خلاهم يشتغلوا شديد و يدفعوا ضرائب عالية هم طلبوا من رحبعام عشان يقلل ليهم الشغل .
لكن رحبعام جاوبهم بطريقة غبية شديد . هو قال ،" انتو قلتوا ابوي سليمان خلاكم تشتغلوا شديد . لكن انا بخليكم تشتغلوا اكتر من ماهو عمل و اخليكم تتعبوا اكثر من ما هو عمل ليكم . "
لمن الشعب سمعوه قال ده ، معظمهم اتمردوا ضده . عشرة قبائل خلوه و قبيلتين بس بقوا معاه . القبيلتين ديل سموا نفوسهم مملكة يهوذا .
القبائل العشرة التانية عملوا راجل اسمه يربعام عشان يكون ملك ليهم . القبائل دي كانت فى الجزء الشمالي من الأرض . سموا انفسهم مملكة إسرائيل.
لكن يربعام اتمرد ضد الله و اتسبب انو الشعب يخطى . هو بنى اتنين صنم لشعبه عشان يعبدو . هم تاني ما بقوا يمشوا لاورشليم في مملكة يهوذا عشان يعبدوا الله في الهيكل .
مملكة يهوذا و اسرائيل بقوا اعداء و دائما بحاربوا ضد بعض .
فى مملكة اسرائيل الجديدة ، كل الملوك كانوا اشرار . كتار من ملوك ديل اتقتلوا بواسطة اسرائليين التانين الكانوا دايرين يكونوا ملك فى محلهم .
كل ملوك و معظم الشعب من مملكة اسرائيل عبدوا اصنام . لمن عملوا ده ،هم دائما بنوموا مع الزانيات و مرات كمان بقدموا اطفال كذبيحة لاصنام .
ملوك يهوذا كانوا من نسل داؤد ، بعض من الملوك ديل كانوا رجال كويسين حكموا بعدل وعبدوا الله . لكن معظم ملوك يهوذا كانوا اشرار . حكموا بطريقة ما كويس ، و عبدوا اصنام . بعض من الملوك ديل قدموا اطفالهم كذبيحة لالهة كاذبة معظم شعب يهوذا برضو اتمردوا ضد الله و عبدوا الهة اخرى .
القصة من الكتاب ماخوذة من سفر ملوك الاولى الاصحاحات 1 - 6 : 11 - 12