العساكر جابوا يسوع لمكان اسمو "جمجمة" سمروا يدينو ورجلينو في الصليب. لكن يسوع قال: "يا ابوي اغفر ليهم، لانو هم ما عارفين الحاجة البيعملوا". وبرضو ختوا علامة على الصليب من فوق راسو. بقول، "ملك اليهود". ده الكلام البيلاطس قال ليهم يكتبوه.
كان هناك برضو في اتين حرامية، الصلبوهم العساكر مع يسوع في نفس الوقت. ختوهم في الجنبتين ليسوع، واحد من الحرامية كان استفز يسوع، لكن التاني قال: "انت ما بتخاف انو الله حيعاقبك؟، نحن مذنبين علي الحاجات الكعبة الكتيرة العملناها، لكن الراجل ده بري". بعد داك قال لي يسوع: "ارجوك اذكرني لمن تكون ملك في ملكوتك". يسوع جاوبو: "الليلة بتكون معي في الفردوس".
بعد داك يسوع صرخ "انتهى! يا ابوي انا سلمت روحي في يديينك" بعد داك دنقر راسو وسلم روحه. لمن هو مات، كان في زلزال. الستارة الكبيرة البفصل الناس من حضور الله في الهيكل انشرطت لاتنين، من فوق لتحت.
بعد داك اتنين من قادة اليهود اسمهم نيقوديموس و يوسف جوا، هم امنوا انو يسوع كان المسيا. طلبوا من بيلاطس جثة المسيح، لفوا جثتو بقماش. بعد داك شالوا لقبر محفور في حجر، ختوا جوا. بعد داك جابوا حجر كبير قدام فتحة القبر عشان يقفلوا بيه.