\c 1 \v 1 Tiago, sêvo dy Dêsu ku dy Sumu Jizu Kistu, ene kuin dôsu tibu dy xieru ny katxi ngué kumprimentu. \v 2 Ná mó un, konsidera kua é dy ngai gôsô ola ola mo ka pasa iô povason. \v 3 Té ka ta ku pova dy afé sê ka gi ô fika.
\v 4 Lega sô ta loké obra ô, pa ku sê bila plenamente dezenvolvidu ku sêtu, dy mora ku na ka fata sê kua wha. \v 5 Magi xi whã sê prisiza dy ta kua maxi, ku pindji Dêsu, sô Êlê ka ra nguê ka pindji sê kritika nkênu ka pindji, sa Êlê sô kadé.
\v 6 Magi ky pindji ku afé, sê duvira, punda nkênu ku duvira ê sa mora whã basa ny mionga, ma ventu ka bé kuê sô zugué dy whã kiba ba ôtô. \v 7 Nguê é, sô, na pô kunda ku tua kua do Sumu, \v 8 whã nguê axié ka kiê, só y ka sa sê sêgura ny turu mondja rê.
\v 9 Ene ná mo plobe té ku ngaba ne suli ré, \v 10 Magi ene omé liku té ku ngaba né rebaxa ré, punda ê ka muê mora floli ny mevia. \v 11 Punda sóló nansê ku kalôlô ku iô brasa ka kuta grama. Foli ka kiê, sô glavi rê ka muê. Dy mora é mé, sô liku, a na ka tô bê né turu nda rê wha.
\v 12 Ngoso sa ene homé ku supota ene povasó punda, so ola me ka pasa povasó é, ê ka ba tua koroa dy vira, ku ma ta pomêtê ene nkênu ku ka gogô ku Dêsu. \v 13 Né whã nguê, ola ê sa tentaru tê ku fa: " Ãn sa tentaru pa Dêsu", punda Dêsu na sa tentaru ny mali wha, so Êle mé na ka tenta nguê wha.
\v 14 Magi kara nguê sa tentaru ny vonté rê, kua poxima so ku bekuê. \v 15 Antó, sô ku vonté da, ra kandja dy pekaru. sa ola ku pekaru ka xiga atê diba, ka da kandja dy motxi, \v 16 Ene amaru ná mó un, na sa nganarô wha.
\v 17 Turu buaru ofeta y turu don sétu y ka bi ny diba. Dêsêru dy tata dy kandja. Ny Êle na tê muda wha ô kilembéka dy mura wha. \v 18 Dêsu koiê da non vira punda palava dy véré, pa non sa mora ene pimêlu futu kathi turu kua ma Êle kia.
\v 19 Éne amaru manu un, sê ta kué: turu home tê ku sa pontu pa ndê, ngosy pa fa, sô ngosy pa sa ku leva. \v 20 Punda leva ry homé na ka subi zustisa dy Dêsu wha. \v 21 Sô, liva sê dy turu mali pekaru sô iô mali. Resêbê ku umilha palava ku sa plantaru, ku sa kapaji dy sava alima sê.
\v 22 Sa so dy palava, na sa sô dy ka ndê wha, ngana sê mé. \v 23 Punda, si whã nkênu sa nguê ka ndê palava so y na sa whã pratikante wha, ê sa mora nkênu ku pia ônguê rê natural ny whã supê. \v 24 Ê ka pia popi onguê rê, so bêrê, sô ngosi ê ka kêsê dy mora mê tia. \v 25 Magi nkênu ku kuidadu, kuidadu pia buaru da alê setu dy liberdade, sô lêlê ka zi kué, na sa sô whã nkênu ki ka ndê kêsê wha, homé isi é ka sa abensuaru ny kua mê ka zi.
\v 26 Si whã nkênu xi analiza mê sa dy whã religion, maji na sa kontrola lingua rê wha, ê ka ngana koso rê, so religion rê sa sê valor. \v 27 Sô religion sétu sê manxa whê Dêsu Tata non, ê sa i ê: zura orfã, y viuva ne aflison rê, sô ta sê kontamina ry mundu é.
\c 2 \v 1 Ene ná mó un, na tê afé dy Sumu Jesu Kistu non, Sumu dy goia, ku favorêsê ene ligason dy un a ôtô nkênu. \v 2 Mgina ku nkênu kathi renion sê ka uza nény dy ôlô y kabichi fina, so ku té kathi whã homé pobli ku kabichi suzu. \v 3 Si é tenta ra ene nkênu ku sa ky kabichi fina so fa achi: " Gi favolô, tasó ingê ny lugué buaru", so fa ene homé pobli: " ta ny ingué ô tasó ô ny opé un", \v 4 na sa zuga ô ny kathi sê mé wha! Na bila sê zuxi ku pensamentu mali ngo!
\v 5 Ndê, ene amado ná mon un, na koiê Dêsu ene pobli dy mundu pa sa liku ny afé so leda reinu ku Êlê pomêtê ene ku ama Ô! \v 6 Maji ene té dezora ene pobli. Ê na sa liku ku oprimi sê wha! Ê na sa êlê ku ka rasta sê ba tibunali! \v 7 Na sa liku ku lumba mali ny buaru Nomy ma non sa pertêsê!
\v 8 Dy turu, ka kumpi alê véré, sêgundu a Eskitura: " Ngogô ku nkênu ku sa zuntu ô mora bô mé", dji buaru. \v 9 Maji, si bô zura sétu nkênu, bô sa komêtê pekaru bô sa kondenaru dy Alê mora pekaru.
\v 10 Sô kualikeru whã ku ka ndê turu Alê, maji ra topi ny whã uniku pontu ê ka sa kuparu dy kebia turu Alê. \v 11 Punda elê mé ku fé: Na komêtê adulterio, tô fa: " Na mata wha". Si na komêtê adulterio, maji mata nguê, antó ba bila pekaru dy Alê.
\v 12 Antó lumba ra ene so gi nora nkênu ku ka ba sa zugaru dy alê dy libedade. \v 13 Sô zugamentu ka bi sê mizerikodia ku na musa mizerikodia wha. Mizerikodia ka sêndê atê zugamentu.
\v 14 Kuali povetu mê tê, námo un, si nkênu fa mê tê afé, maji na tê obra wha! Afé nkênu é ka savé! \v 15 Majina ku whã mano ô whã mana, pesiza kabixi, y na tê mé da dia wha. \v 16 Si whã sê fa: dé: Bé dy paji, kenta ô so mé ô buaru, sê dé ene kua ku ra pa onguê, kué poveta e sa! \v 17 De mora é mé, a pê pa êlê so, si na tê obra wha ê sa motxi.
\v 18 Maji whã nguê po fa asi: " Bo tê afé, whã tê obra". Musa un afé ô sê obra, sô ãn ka musa ô afé un ku obra ma nga ji. \v 19 Bô kêlê mê tê whã uniku Dêsu, ji buaru! Maji atê ene demono kêlê ny kué, ene ka témmé. \v 20 Bô mêsê me ta, home si legula, ku afé sê obra êna sa buaru wha.
\v 21 Ena sa Abron, tata non, zustifikaru ny obra, ola ê ra ná rê Izaki diba altar! \v 22 Bê mora afé gi zuntu ku ene obra, so ku, afé rê bê kopletu subiru. \v 23 Kumpri Eskitura, ku ka fa: " Abron kêlê ny Dêsu, so isi ê responsabilidade mora justisa, sô ê bé samaru migu dy Dêsu". \v 24 Pia punda obra whã home sa justifikaru, y ê na sa punda afé wha.
\v 25 Sô té, dy mora é mé, na sa asi prostituta Raab justifikada ny obra, ola mê resêbê ene nkênu lekaru, sô manda ene ny ôtô mondja! \v 26 Sô, asi mora onguê fastaru ny supitu sa muêru, sa mora é afé fastaru ny obra sa muêru.
\c 3 \v 1 Ane manu un, txo nkênu ka sa mésé. Nota ku non resêbê zugamentu masi gosu. \v 2 Punda turu non ka da topi dy iô mora. Si whã nguê na da topi ny palava, ê sa whã kopletu subiru, kapazi dy kotrola atê né onguêrê têlu.
\v 3 Si non pê freiu ny boka dy kabalu pê ndê non, non pô té kolê turu onguê rê. \v 4 Pia té ku vapô y mora mê sa ngairu so koleru ku ventu forti, y sa koleru dy whã na ventoinha pê ba andji ma pilôto mêsê.
\v 5 Dy mora é mé, sô lingua sa whã tho kiba dy onguê, maji y ka ji kua ngairu. Pia té mora whã ngairu floresta é ka iêrê dy whã tho faiska. \v 6 Lingua sa té whã fôgô, whã mundu dy pekaru ny katxi dy onguê non, ku suza turu onguê so iêrê kursu dy vira. Popi lingua é sa dêiêru dy fenu.
\v 7 Sô turu tipu dy animal dy matu, bisu, repitil ku kiatura dy mionga sa domestikaru, y té sa mansaru dy nguê, \v 8 maji, ny lingua, né whã nguê ny katxi homé sa kapaji dy mansé wha. Ê sa whã mali ma a na ka pô mura wha, siaru dy venenu motxi.
\v 9 Ki lingua, non ka lova nu Sumu ku Tata non, so kuê non ka da mali ene home, ku sa ziru mora Dêsu. \v 10 Dy boka é mé ka siê bensa ku maldison. Ene ná amon un, ene kua é na ka pô sa wha.
\v 11 Ê ka pô sa whã boka aua lukua un ola é mé aua doxi ku aua mangaru! \v 12 Ene ná mo, ê ka pô sa whã figu da zatona! Ô whã videira da figu! Dy mora é mé, boka aua sagaru na pôsiê aua doxi wha.
\v 13 Nguei ny kathi sê sa tarô kua! Pa nguê é musa whã buaru dy mora dy gi dy obra ré, ny umildadi ku bi ny kua mê ta. \v 14 Maji, si ô tê whê xia leva ny kosó sa ambiso ny koso sê, na da fama ny siriga da véré wha.
\v 15 Isié na sa kua ma ta ku dêsê ny diba wha, inveji dy isié, ê sa dy tia é, giru dy demono, na dy supitu wha. \v 16 Punda andji ka tê whê xia ku ambison, y tê demanda ku turu tipu dy kua giru mali. \v 17 Maji ma ta ku ka bi ny diba, ê sa pimêlu puru, so dy paji buaru, ka komprendê, siaru dy mizerikoria so dy frutu buaru, imparcial so sêtu. \v 18 I frutu dy justisa sa ximiaru dy paji, né katxi ene nkênu ku gi nda paji.
\c 4 \v 1 Dy andji ka bi demanda kathi sê! Na bi ene dy vonte sê ku luta lêtu membro sê! \v 2 Mêsê y né whã na tê wha, mata so tê whê ra otô né whã kua bo kapaji dy tê, luta so dji demanda. Bo na tê wha, punda bo na pindji wha. \v 3 Pindji y bo na tué wha punda pindji mali, ku fin dy djié da conte ô.
\v 4 Adulterio! Na ta sê ku amizary ku mundu é sa ni mizary kontê Dêsu! Punda nkênu ku mêsê sa migu dy mundu ka bila numigu dy Dêsu. \v 5 Ô kunda ma Eskitura ka fa vón-vón: " Ku sumi, Dêsu ka dêzeja da supitu ma Êle gi ta ni non."
\v 6 Maji Dêsu ra gasa ngairu, punda kué ka fa Eskitura: Dêsu guênta ene whê xia, maji da gasa ene humildy. \v 7 Anto sê ka sujêta Dêsu, guênta ene diabu, y ene ka fuzi dy sê.
\v 8 Xiga Dêsu, sô Ê ka atê sê. Dipa mó sê, pekaru, thia mali ny koso sê, sê ku sa vasilanty. \v 9 Sa tristy, ngô, sô sua! Ku dy sê ka bila nguita, so ku ngoso sê, ka bila tristy. \v 10 Baza ntê sê ny whê dy Sumu, son Ê ka lata sê.
\v 11 Na lumba mali sê ku sê wha. Nkênu ku ka lumba mali dy whã lumó, ô ku zuga lumó rê lumba kontê Alê so zuga Alê. Siê zuga Alê, na sa ku Alê wha, maji zuxi. \v 12 Punda whã so sa legislador y zuxi. Ê sa Nkênu ku sa kapaji dy sava y dana. Nguê sa bô, ku ka zuga nkênu ku sa zuntu ô.
\v 13 Ndê aié, sê ku ka fa: " Ozé ô mungu no ka ba poso é, non ka ta nha whã anu, non ka zi negoxo so ka tê ganhu". \v 14 Nguê ta kua ku ka ra mungu! Y kua sa vira sê! Punda sê sa mora digo ma ka bê ola a ka bila a na ka tô bê wha.
\v 15 Ny luguê kuê é, sê tê ku fa: " Si Sumu mêsê, non ka vivê so zi ixié ô ixi za". \v 16 Maji aié sê xia dy planu sê aroganty turu whê xia mora ixié sa mali. \v 17 Punda nkênu ku ta jié buaru so na jié wha y sa ji pekaru.
\c 5 \v 1 Bi aié, sê ku sa liku y sua so nguinta punda kua dy mizeria ku so ka bi diba sê. \v 2 Likêza sê poré bêrê so kabisi sê bé meru dy trasa. \v 3 ôlô sê ku prata sê bila faluza, ku faluza é sa sesêmunha da sê. Ene ka mé kany sê mora fôgô. Lôkê likêza sê ra ola Sum kabi.
\v 4 Pia, lêlu dy ene nkênu ku ka taba ê sa nguita, so lêlu ku ene tia dy nkênu ku koiê ny mevia ene. Ene nguita dy ene nkênu ku ka taba siga ne oria dy Sumu Exersitu. \v 5 Sê vivê ku luxu ny tia, zi vonté sê. Ngoro koso sê ra ria dy matansa. \v 6 Sê pê mali so sê mata justu, ene na ji sê mali wha.
\v 7 Anto sê pasiente, lumo, atê Sumu ka bi. Pia, ene agrikultor ka whara valiza kolheta ny tia. Ê ka whara ku pasiensa ku paisensa a manda, atê ku tia ka tê pimêlu ku ene utimu suba. \v 8 Sa tê pasiensa. Kêlê ny Dêsu ny koso sê, punda bi dy Sumu sa petu.
\v 9 Na kêxa sê whã kontê ôtô wha, lumo, pa bo na ba sa zugaru wha. Pia, zuxi sa pota. \v 10 Tua mora zemplu, ene lumó, ene padisê so ku paxiênsa ry ene pofeta, ene ku lumba ny nomy ry Sumu. \v 11 Pia, non tê ingué gosô ene nkênu ku ta. Bô ndê ta dy Jó, so konsê ene kua ma Sum, mora kompasivu ku mizerikodizu Ê sa.
\v 12 Dy turu kua é, ene lumo un, na zula, né ra onsé ne ra tia né ri kuali keru ôtô zula. Maji, ku lumba sê ka sa sim, " ka sa" sim, so ku ô lumba sê sa Não. " Ku sa: Não" asi sê na ka kiê ny juizu wha.
\v 13 Ê tê nkênu kathi sê ka padisê! Sê ka zi lason. Ê tê nkênu ku ngosô! Sê ka kata lôvoru. \v 14 Ê tê nkênu kathi sê duêthi! Sê ka sama ene presbiteru dy nguêza, ene ka zi lason dé, ungié ku olió ny nomi dy Sumu. \v 15 Ene lason ku afé ê ka ba kula ene duêthi, sô Sumu ka lata. Si ê zi pekaru, Dêsu ka poré.
\v 16 Sô kofesa ene pekaru un da ôtô pa sê sa kularu. Laosn dy justu so ku pore ku setu. \v 17 Elia bê whã omé asi mora non. Ê zi lason ku fosa fosa, pa na sôbê wha, so na sôbê ny tia dy trêxi anu ku sêxi mêzi. \v 18 Sô Elia to zi lason, so onse ra suba, sô tia ra ene frutu.
\v 19 Ene lumon un, si whã sê siê ny vere, so whã onguê tô bi kuê dingui. \v 20 Bô tê ku ta ku nguê ku ba tua whã pekarô dy mondja re mali ê salvé dy mothi, y kubié re iô re pekaru.