klero
/
lot_mat_text_reg
1
0
Fork 0
Files Issues Pull Requests Releases Wiki Activity See in Reader

Wed Mar 01 2023 20:08:45 GMT+0200 (GMT+02:00)

This commit is contained in:
klero 2023-03-01 20:08:45 +02:00
parent 840801f7e9
commit 5db3229b74
1 changed files with 37 additions and 0 deletions
Show Stats Download Patch File Download Diff File Expand all files Collapse all files

37
13/01.txt Normal file
View File

@ -0,0 +1,37 @@
\c 13 1 To oloŋ ania ojiŋu nya Yesu to haji ette itoŋo ilotifor hari. 2 Ofwonni eluluŋi wati arryai jihonyi tania ojiŋak inyi itogol ette itoŋo bwo fe eluluŋ wati daŋ itoŋoi ilotifor hari. 3 Ittiyenio inyi isi erre arryai ta narryamarita ette jaran, Olo obo atulo yehina enyomo honyi. 4 Ninya layehi inyi ette omuk enyomo fodoŋoro ikoi bwo aheny ette fwanna ikubuna isi. 5 Bwo fe omuk ette fodoŋoro ihiji morwoi, tania obeŋi isi onyurani aboro hun olwaji, ette isi isuruna kokwak nyo obeŋ amaji hosi ojon. 6 Al onok oloŋ ette itayoho afarawa hosi nyo obeŋi nadde jihosi. 7 Ati ofodoŋonie nya omuk bwo fe ihiji hikwa ette isuruna arabotye iko nekwa ette nekwa itabunara isi. 8 Hun okwahinie’to jyo aboro hun oyiji’to isuruni bwo ihalu ette fwanna ŋerihina ema esiha abotye, bwo
obo atomwana ille, bwo fe obo atomwana hunihoi. 9 Lya ol owon’to iko ayyaha ijara inyi hetaniŋu.
Awoyo Hiram ono Arryamarita
Mk 4:10-12; Lk 8:9-10
10 Ofwonni leyiyanak jihonyi ette ifiyo, ?Nyo ikyana iye jihosi ta narryamara? 11 Itarraŋ inyi jihosi, Italeyehi Hollum jihatai nelahode ninya idimani ono olobye honyi, ati obeŋi italeyehi jihosi erre hwa. 12 Nyo ofonihini adi erre jyo lya ol owon’to iko erre, tania owoni adi hun olwaji jihonyi. Ati jyo lya ol obeŋ iko erre iyarai adi erre honyi addi. 13 Ekyana ni jihosi ta narryamara nyo igonyuni isi ati obeŋi isi igonyuni ahode. Itayirye isi ati obeŋi isi itaniŋuni bwo fe obeŋi omijani ahode. 14 Itasiruni ekyana Isaya jihosi an ojo,
“Itayiryete adi itai ahode ati ibyaŋata adi itai itaniŋuna.
Imijyete adi itai ahode ati ibyaŋata adi itai igonyuna.
15 Ottuhoi ayyaha huno aati hulya
Ŋadi isi itayirye.
Imuti isi oŋite hosi
Ŋadi isi igonyuni.
Itadwari isi atajya hosi
Ŋadi isi itaniŋuni.
Tania obeŋi isi iloiti atajya hosi
Bwo fe abeŋ ni etaŋida isi.”
16 Hotomunohi oŋite hatai nyo igonyuni isi bwo fe hotomunohi ayyaha hatai nyo itaniŋuni isi. 17 Ahode eramak ni itai jo, awahi nya eyak sayyo arryai iko ayijok igonyuniere erre hun igonyuna tai ati obeŋi isi
igonyuni. Bwo fe awahi nya isi itaniŋuniere erre hun itaniŋuna tai ati obeŋi nya isi itaniŋuni.
Etaleyehina Yesu Arryamara ono Layani Hinyomo
Mk 4:13-20; Lk 8:11-15
18 Hulo, itaniŋuna arryamara ono layani hinyomo. 19 Al itayiryo obo atulo nekyana ono Hollum ati obeŋ itaniŋu, ottu adi olorroho ette kwararu ekyana addi to taji honyi. Ara ana ihwa enyomo hun ofodoŋoroi iger ikoi. 20 Hun ofodoŋonie imorwoi arai ihwa atulo al itayiru’to nekyana ette ifwotuna ta amuno. 21 Ati obeŋi nadde honyi. Iruk inyi do ati al ofwonni ettigemita kuyya netahawwata ta neram Hollum ette inyi ipal addi. 22 Hun ofodoŋonie ihiji hikwa arai ihwa atulo al itayiru nekyana Hollum, ati ihawwa inyi ta nerre hutta haŋ honyi, kuyya ogori ebariti nekyana Hollum, tania ette lak ŋijuna. 23 Hun okwahinie ifau on oyyu arai ihwa atulo al itayiryo nekyana bwo fe itaniŋu. Oŋiju inyi aŋer esiha abotye, bwo obo atomwana ille, bwo obo atomwana hunihoi.
Ema iko Alabali
24 Inyyak Yesu ikyana jihosi ta narryamara ojo, Ara olobye ono Hollum ihwa atulo ol oyehi enyomo hun oyiji imana honyi. 25 Ati al ojotoi legyamak honyi ofwonni amyorok honyi iyehiniere alabali ihiji hima ette isi fwatan addi. 26 Al isuruni ema ette bolori oleyo bwo fe alabali. 27 Ofwonni apiti jyo eleittok ette ifiyo, Leittok, ?ibeŋ nya iye iyehi enyomo hun oyiji imana hoi? ?Ofwonni alabali huna tai? 28 Ojo inyi jihosi, Amyotononi oyehi huna. Ette apiti itarraŋ jihonyi, ?Iwak iye hohoi erutu isi? 29 Ojo inyi jihosi, Obeŋ, nyo ŋadi itai irutuna iko ema al
ijatta tai erutu alabali. 30 Obusana daŋ obobolororoi arabotye many iholoŋ dyoŋo, bwo ajo adi ni jyo adyoŋok jo, Ahosyere, orutuna alabali, ittittirata isi ittata swahina ihima, ati ottubana ema imugu hoŋ.
Narryamara ono Aŋeryo Bule
Mk 4:30-32; Lk 13:18-19
31 Inyyak Yesu ikyana jihosi ta narryamara ojo, Orrijori olobye ono Hollum iko aŋeryo bule an iyaro atulo ette dulana imana honyi. 32 Omuta inyi agalik aŋer daŋ, ati al obobolororo inyi obolo inyi agalik ayyani daŋ, bwo owon inyi iko atanata arryai hun oremehini aheny duhori asik hosi.
Narryamara ono Abula
Lk 13:20-21
33 Ikyana inyi narryamara obo jihosi on ojo, Orrijori olobye ono Hollum iko abula hun iduhu aŋotte ette iharrwahina iko efwa many ayafutarik daŋ.
Ettiyenio Yesu ta Arryamarita
Mk 4:33-34
34 Ikyana Yesu erre huna daŋ jyo eluluŋ wati ta narryamara. Obeŋ bu inyi ittiyenio omuk erre jihosi arari ta narryamara. 35 Nyo oŋida itasiruni ekyana ono eyani sayyo Isaya al ojo inyi, “Ettiyenio ni ta narryamara. Ekyana adi ni on okwat erre hunya idimani many t’etteri fau.”
Etaleyeuna Yesu Arryamara ono Ema iko Alabali
36 Tania obusak inyi eluluŋ wati ette jiŋana ihaji. Ati ofwonni leyiyanak honyi jihonyi ette jaran, Itahutak jihohoi awoyo ono alabali
hun isuri’to imana. 37 Itarraŋ inyi jihosi jo, Lya ol oyehi’to enyomo hun oyiji’to inyi Lonyi tulo. 38 Ara amana ihwa afau. Arai enyomo hun oyiji ihwa lonyirok hulo olobye. Arai alabali ihwa lonyirok hulo olorroho. 39 Ara amyotononi ol oyehi’to alabali ihwa etisyahani. Ara adyoŋo ihwa esidi fau. Arai adyoŋok ihwa anjelohyen. 40 Ihwa aharanyuni isi alabali ette swahina ihima, ihanie adi ihwo nya te esidi fau. 41 Ifak adi Lonyi tulo anjelohyen honvi isuduhaniere to lobye honyi addi hya daŋ hul itipalye’to omuk iko hul ihanie’to on orroho, 42 ette bironia isi ihima on onok’to. Owon adi ayyo iko aŋutta hala dia. 43 Tania afaŋi adi ayijok ihwa oloŋ ilobye Monyosi. Lya ol owon’to iko ayyaha ijara inyi hetaniŋu.
Ebariti hun Idimani
44 Ara olobye ono Hollum ihwa ebariti hun idimani imana. Onyurak atulo ebariti hwa ati inyyak inyi dimana isi. Alo inyi ta amuno itinyyaŋaniere erre honyi daŋ inyyaŋari amana ania.45 Bwo fe ara olobye ono Hollum ihwa apoconi ol ottifya’to onoroi hun obwori’to bwo fe ogoli te enyyaŋa. 46 Onyurak inyi onoro abotye on ogol bebe te enyyaŋa ette inyi leten itinyyaŋaniere erre honyi daŋ ette inyyaŋa onoro ania. 47 Bwo fe ara olobye ono Hollum ihwa aboy an ibironi ayafohok ihari ette yafohuno aham ta awoi hosi daŋ. 48 Al ifut aboi ipihuni isi inyi addi many ilotifor hari ette isi itoŋo ihuroniere aham hun oyiji’to isahani hosi, ati ibirori isi hun orrohoji’to addi. 49 Ara adi ihwo nya te esidi fau. Ofwonni adi anjelohyen igigyalari laati hul orrohoji’to addi jyo hul oyiji’to, 50 ette bironia isi ihima on onok’to. Owon adi ayyo iko aŋutta hala dia. 51 Itaniŋuna tai erre huna daŋ? Ojori isi jihonyi, Afe, etaniŋu hohoi. 52 Ojo inyi jihosi, Tania arai legyorok daŋ hul ittiyenie’to eram ono olobye Hollum ihwa monye haji al iduhu’to erre aŋejuho iko erre amarwahi addi to mugu honyi. 53 Latuhok Yesu narryamarita hunia idyaharu inyi amaji ania. 54 Afany inyi ifau hosi ette ittiyenio ihaji imojit hosi bwo fe laati ette illilliha ette jaran, ?Orumak inyi olofyoro huna aja iko egyamita hun obolori’to huna? 55 ?Ilak ara inyi adi olo lonyi hehuhumani bau? ?Ilak ara so honyonyi Maria? ?Obeŋi so ho Yakobo, Yosefo, Simone iko Yuda illarak honyi? 56 Amanyai bwo fe haniarak honyi daŋ iŋati hohoi. ?Ati orumak atulo olo ofyoro huna daŋ aja? 57 Ette isi ihara inyi. Attati Yesu jaran jihosi ojo, Itahabuye laati daŋ eyani sayyo, ati obeŋi aati hutta haŋ hosi iko hutto miji hosi itahabuye inyi. 58 Obeŋ inyi oremik ihanio egyamita arryai dia nyo obeŋi isi iruhi jihonyi.