ach-SS-acholi_heb_text_reg/09/13.txt

\v 13 Remo dyegi ki twoni, ki buru roya ma giwaŋo, ka gikiro i kom jo mubalo kwer, romo lonyogi, kun lwoko komgi bedo maleŋ. \v 14 Remo pa Kricito pe kato maca mada? Pi Cwiny Maleŋ ma bedo matwal, omiyo en omine kene bot Lubaŋa kun roc mo pe i kome, pi lonyo cwinywu ma onoŋo ocido woko macol licuc pi tiyo tic ma kwo pe iye, wek wubed ma iwu leŋ, ka doŋ wawor Lubaŋa makwo. \v 15 Pi meno Kricito aye ŋat muyubo gicikke manyen, wek emi jo ma gilwoŋo gunoŋ lim ma ri nakanaka ma Lubaŋa ociko me miyone; pi to ma yam onen, omiyo jo ma yam gikalo wi cik i te gicikke mukwoŋo kombeddi doŋ gikokogi woko.