tbl-x-southtboli_heb_text_reg/10/19.txt

\v 19 Duhen yó, kem dumuhu setwoli, lemwót bè yóm deng khamà Jisas litóen bè yóm tehe katayen, deng wen lan tekuy ne tódô husek elem tum Dfél gónóhen nô Dwata. \v 20 Deng lenungkà Jisas bélê tekuy yóm lomi lan yó, yóm lan hlowil tekuy. Bè yóm deng khamaen klowilen bélê tekuy, lómón ke deng kentóhen yóm tehe nes seng bè yóm Dfél hol gónóhen nô Dwata. \v 21 Tey geta yóm fen semblóng tekuy ebè Dwata, yóm fen mogot du yóm kun gónô Dwata. \v 22 Yó gónóm mon, hol tekuy hloni ebè Dwata dé. Hol hewót tekuy lem but blutut tekuy yóm kehloni tekuy yó, mung du yóm hol kehtahu tekuy béléen. Yakà deng hólósen tekuy Jisas, yó gónón deng mkó ta tekuy ne yó kem salà tehe gel hemblat tekuy. Hol lómón ke deng denyohen tu lem yóm tey él tikaw.